E Mata, e Mafai o Kau Atu Koe ki te Galuega Talai i Aso Sa?
1. Se a te mea e mafai o tauloto ne tatou mai i faifaiga a Paulo mo ana taugasoa i Filipi?
1 A te Sapati, se aso telā e malō‵lo ei a te tokoukega o tino Iutaia i Filipi. Ne āsi atu a Paulo mo ana taugasoa ki te fa‵kai i se malaga e tasi o olotou malaga fakamisionale. E seai se tino ne ‵tau o taku fakamasei ne ia latou moi ne malō‵lo faka‵lei aka latou mai i te lotou galuega talai i te aso foki eiloa tenā. Kae ne iloa ne latou me ne maopoopo a te kau Iutaia mai tua o te fa‵kai ke ‵talo, kae ne fakaaoga faka‵lei ne latou a te avanoaga tenā ke talai atu ki a latou. Ko oko eiloa i te fia‵fia o Paulo mo ana taugasoa i te taimi ne fakalogologo atu ei a Litia kae ne papatiso foki tena kāiga kātoa! (Galu. 16:13-15) Ona ko te mea e malō‵lo a tino e tokouke i aso nei i te Aso Sa, kaia e se fakaaoga ei se vaega o te aso tenei ke talai atu ki a latou?
2. Ne a tulaga faiga‵ta ne manumalo i ei a tino o Ieova ko te mea ke talai atu i Aso Sa e aunoa mo ne fakalavelave?
2 Te Faigata ke Talai Atu i te Aso Sa: I te 1927, ne fakamalosi atu ki tino o Ieova ke fakaaoga se vaega o te aso i Aso Sa katoa i te galuega talai. Ne iku atu a te mea tenei ki te ‵tekeatuga fakavave. Ne puke fakapagota a tino e tokouke i te Iunaite Sitete mō te solitulafono ki te Sapati i te Aso Sa, te fakamakosu o te filemu, mo te fakatau atu e aunoa mo se laisene. Kae ne seki fakagata ne tino o Ieova a te lotou talaiga. I te 1930, ne fakatoka ne latou a “potukau,” ko te mea ke mafai o ‵kau atu a tino talai mai fakapotopotoga ‵pili ke mafai ei o fakaoti faka‵lei se koga talai. I nisi taimi e puke fakapagota ei a tino talai, ko se mafai o fakagata ne tino pule a latou ona ko te tokouke o latou. E mata, e fakatāua tonu eiloa ne koe a te alofa sē fakapito ne fakaasi atu ne taina konā ko te mea ke mafai ne tatou o talai atu i Aso Sa e aunoa mo ne fakalavelave?
3. Se a te mea e fai ei a te Aso Sa mo fai se aso ‵lei ke kau atu ki te galuega talai?
3 Se Aso Tafasili i te ‵Lei ke Talai Atu i ei: E ‵nofo atu i fale a tino e tokouke i te Aso Sa. E masani o malō‵lo latou. Kāti a nisi tino ‵lotu e fia sau‵tala atu e uiga ki te Atua i te aso tenei. Kafai e fai ‵tou fakatasiga i te Aso Sa, ko oti eiloa ne fai faka‵lei ‵tou gatu e pelā me ko olo atu tatou i te galuega talai, tela la, kaia e se fakatoka ei ke kau atu koe ki te galuega talai mai mua io me mai tua o te fakatasiga? Kafai e manakogina, ke fakatoka ne au mū meakai ke fano mo koe.
4. Se a te fiafia e mafai o maua ne tatou māfai e fakaaoga se vaega o te Aso Sa i te galuega talai?
4 Kafai e fakaaoga ne tatou se vaega o te Aso Sa mō te galuega talai, ka mafai eiloa o lava a te taimi mō se malōlōga telā e manakogina ne tatou. Kae ka mafai eiloa o malō‵lo tatou fakatasi mo te lotomalie telā e iku mai i te kau atu ki te taviniga tapu. (Faata. 19:23) Kāti e mafai eiloa o maua ne tatou a te fiafia ke maua atu se tino e pelā mo Litia!