Fakamanuiaga Mai i te Galue i Koga Kolā e se Talai ‵Soko i ei

1. Se a te kilokiloga a Iesu ki tino kolā ne fetaui mo ia i tena galuega talai?

¹ Ne pefea a lagonaga o Iesu ki tino kolā ne fetaui mo ia i te galuega talai? “I te laveaatuga ne ia i te tokouke o tino, ne tupu ake ei tona loto alofa mō latou, me ko se toka olotou loto i te seai o se tino e fesoasoani atu, ko pelā mo mamoe e seai se lotou tino tausi.” (Mata. 9:35, 36) I te laveaga ne ia o te tulaga ma‵tiva o tino i te feitu faka-te-agaga, ne fakamalosi aka ei a Iesu ke fai atu ki ana soko, “Ko oko eiloa i te lasi o te saito e fia ‵kati, ka ko tino ga‵lue i te saito e se tokouke. Fakatagi atu ki te tino e a ia te fatoaga, ke uga mai se kau faigaluega e tai tokouke atu o fakaputu te saito.” Kafai e onoono tatou ki te fatoaga, e mata, e maua ne tatou a lagonaga tai ‵pau e pelā mo Iesu?

2. Se a te fakasologa o mea e ‵tau o fai ke mafai ei o galue koe i koga kolā e se talai ‵soko i ei?

² Fakamolemole Atu mō se Galuega: Ne iloa ne Iesu a te lasi o te koga talai ne ‵tau o fanatu a ia ki ei. (Luka 4:43) E mafai pefea o fakaakoako atu tatou ki tena kilokiloga e uiga ki tena koga talai? E mafai ne tatou o akai atu ki toeaina ke talia mai tatou ke ga‵lue i koga kolā e se talai ‵soko i ei. Kafai e taumafai tatou ke maua a te taliaga a toeaina kae tau‵tali atu ki te lotou takitakiga, e fakaasi atu ei me e āva tatou ki fakatokaga mai te Atua kae ka fakamanuiagina eiloa tatou.—1 Koli. 14:33, 40.

3. Ne a fakamanuiaga ne maua ne tino kolā ne fai ne latou a te galuega tenei?

³ Fakamanuiaga Kolā e Mafai o Maua ne Tatou: Kafai ko oti ne ‵tofi aka a ‵tou taina ke olo atu ki koga kolā e se talai ‵soko i ei, ne a fakamanuiaga e maua ne latou mai ei? Ne tusi mai se taina e tokotasi: “I te taimi muamua ne fai mai ei ki a au e uiga ki te manatu ke avatu ne au se potukau ki se koga telā e se talai ‵soko i ei, ne tai tuai eiloa o talia ne au. Kae ne fakaiku aka ne au ke talia a te galuega tenā. E se gata fua i toku sē salamō kae ne ‵fuli foki i ei toku olaga. E fakafetai au ki a Ieova i aso katoa mō te tauliaga ke aofia au i te malaga tenei.” Ne fai mai se talavou telā ne aofia i te potukau tenā: “Tenei eiloa te ‵toe mea gali ne tupu ki a au i toku olaga!”

4. Se a te taimi ‵lei ke fakamolemole atu mō se taliaga ke fanatu koe ki koga kolā e se talai ‵soko i ei?

⁴ E uke ‵ki a koga talai kolā e se talai ‵soko i ei mai lalo i ‵tou ofisa lagolago. E mata, e mafai o fanatu koe o fesoasoani atu ki a latou? Kāti e mafai o molimau atu koe i tou fenua io me ko te fa‵kai ne fanau ei koe io me e isi ne koga e pili atu ki tou fa‵kai kolā e se talai ‵soko i ei. E mata, e mafai o fakaaoga ou taimi malōlō io me se taimi malōlō o akoga ke avatu tou kāiga ki koga kolā e se talai ‵soko i ei? Kafai e talia ne tatou a mea faiga‵ta ke fesoasoani atu ki nisi tino, e masani eiloa o fakamanuiagina tatou. Ke na tofotofo aka koe mo tou kāiga “ki te lasi o te aga‵lei” o Ieova mai i te taumafai ke maua te taliaga ke olo atu ki koga kolā e se talai ‵soko i ei.—Sala. 34:8.