Ke Fesoasoani ki Au Tama‵liki ke ‵Viki Atu ki a Ieova

1. Ne a fakaakoakoga o tama‵liki tagata mo tama‵liki fafine kolā ne ‵viki atu ki a Ieova kae e maua i te Tusi Tapu?

¹ E fakamalosi atu a te Salamo 148:12, 13 ki tama‵liki tagata mo tamaliki fafine ke ‘‵viki atu ki te igoa o Ieova.’ E maua eiloa i te Tusi Tapu a fakaakoakoga e uke o tama‵liki kolā ne fai penā. E mafai pefea ne mātua o akoako olotou tama‵liki ke ‵viki atu ki a Ieova?

2. Kaia e tāua ei ke tuku atu ne mātua se fakaakoakoga ‵lei mō olotou tama‵liki?

² Fakaakoakoga: A koi tuai o fakaoko atu a te munatonu ki loto o olotou tama‵liki, ne fakatonu atu ki tamana Isalaelu ke a‵lofa muamua latou ki a Ieova kae tausi ana fakatonuga i olotou loto. (Teu. 6:5-9) Kafai e tavae faeloa ne koe a te galuega talai kae fai mo fai se vaega o au mea e ‵tau o fai i vaiaso katoa, ka ‵kilo atu eiloa au tama‵liki ki te galuega talai e pelā me se mea tāua ‵ki kae fakafiafia.

3. Se a te uiga o te akoako malielie atu o au tama‵liki?

³ Te Akoako Malielie o Tama‵liki: Ke aofia au tama‵liki i te taimi e kau atu koe ki te galuega talai. Kāti e mafai o tuku atu ne latou ki te tino i te fale se tamā pepa io me e faitau atu se tusi faitau. Ka fakamalosi aka ne te mea tenei a te lotou fia‵fia kae fesoasoani atu ke maua te loto talitonu ki te mafai ne latou o fakaasi atu a te fekau o te Malo. I te taimi e gasolo aka ei latou o ma‵tua, e ‵tau foki o momea aka olotou mea e fai i te galuega talai. Tela la, ke fesoasoani atu ki a latou ke ga‵solo ki mua kae ke mafau‵fau foki ki fakamoemoega faka-te-agaga.

4. Ne a mea e manakogina ko te mea ke mafai o fai se tamaliki mo fai se tino talai kae seki papatiso?

⁴ Ke faipati atu ki toeaina i te taimi eiloa ko mafai ei o fai au tama‵liki mo fai ne tino talai kae seki papatiso mo te taimi ko fia fai ei latou penā. A te fai mo fai ne tino talai ka fai ei ke matea ne latou a te tāua o te lotou tiute totino ke ‵viki atu ki a Ieova. Masaua me e se ‵tau o iloa ne se tamaliki a mea e uke e pelā mo tino papatiso ma‵tua ke fetaui ‵lei ei latou. E mata, ko malamalama tau tamaliki i akoakoga fakavae i te Tusi Tapu? E mata, e tautali a ia ki tulaga o te Tusi Tapu i mea tau amioga? E mata, e fia kau atu a ia ki te galuega talai kae ke fai foki mo fai se tokotasi o Molimau a Ieova? Kafai e penā loa, ko mafai ei o fakaiku aka ne toeaina me ko fetaui ‵lei a ia ke fai mo fai se tino talai kae seki papatiso.—Ke onoono ki te Ne Fakatoka ke Fai te Loto o Ieova, te itulau e 79-82, te itulau e 5 mo te 6.

5. Kaia e aoga ei ke akoako atu ne mātua olotou tama‵liki?

⁵ A te akoakoga o tama‵liki ke ‵viki atu ki a Ieova mai i olotou loto eiloa e manakogina i ei a galuega e uke. Kae ne nai mea fua e fai ei ke fia‵fia malosi a mātua i lō te lavea atu me e ga‵solo ki mua olotou tama‵liki i te feitu faka-te-agaga. Kae e sili atu i te tāua, e fiafia eiloa a Ieova māfai ko fai‵pati atu a tama‵liki e uiga ki ana galuega fakaofoofogia.