E Mata, e Toka Koe Māfai ko Manakogina Fakavave se Togafiti Fakatokita?
E mafai eiloa o manakogina fakavave se togafiti fakatokita e aunoa mo te fakailoa mai. (Iako. 4:14) Tela la, a te tino atamai ka fakatoka faka‵lei ne ia a mea katoa e ‵tau o fai. (Faata. 22:3) E mata, kai tusi ne koe ki lalo a togafiti fakatokita mo faifaiga fakatokita kolā ko oti ne fakaiku aka me ka talia ne koe? Ke fesoasoani atu ki a koe, ko oti eiloa ne fakatoka a te vitiō ko te Transfusion-Alternative Health Care—Meeting Patient Needs and Rights, mo te lua o fakamatalaga i te DVD telā e fakaulutala penei Transfusion-Alternatives—Documentary Series. I te taimi e onoono ei koe ki ei, onoono aka me e mafai ne koe o tali mai a fesili kolā e ‵soko mai. Ona ko te mea e aofia a te faiga o tipitipiga i te vitiō, e ‵tau o fakaaoga ne mātua a te loto malamalama i te taimi e onoono fakatasi ei latou mo tama‵liki fo‵liki.
(1) Kaia ko ‵fuli ei ne nisi tokita mo nēsi olotou mafaufauga e uiga ki te fagai ki toto? (2) Tuku mai ne fakaakoakoga e tolu o tipitipiga faigo‵fie kolā ne fai e aunoa mo te fagai ki te toto. (3) Kaia ko loto fia‵fia ei a te fia afe o tokita mo tokita tipitipi ke fai ne latou a ma‵saki o tino ma‵saki e aunoa mo te fagai ki te toto? (4) Ne a mea ne fakaasi fakamuli mai nei e uiga ki te fakaaogaga o te toto? (5) Ne a mea fakama‵taku i togafiti fakatokita kolā e māfua mai i te fagai ki te toto? (6) Ne a mea ko oti ne fakaiku aka ne tokita mo tokita tipitipi e uiga ki mea e aoga kolā e maua mai i nisi togafiti i tafa o te fagai ki te toto? (7) E māfua mai i te ā a te masaki ko te anemia, kae ne a mea e mafai o fai ki ei? (8) E mafai pefea o fakamalosi aka a te faka‵fuaga o sela ‵kula i te foitino o se tino masaki? (9) Ne a auala ko oti ne fakaaoga ke fakafeoloolo aka ei a te ‵sali o te toto i te taimi e fai ei te tipitipiga? (10) E mata, e aoga a nisi togafiti fakatokita i tafa o te toto ki tamaliki io me ko tino kolā e aofia i fakalavelave ‵tupu kae e mafai o mate i ei? (11) Se a te ‵toe akoakoga fakavae tāua kae ‵lei o togafiti fakatokita?
E tiga eiloa a te taliaga o nisi togafiti fakatokita i te vitiō tenei e faka‵na eiloa ki te loto lagona o te tino, a te mea tāua ke sa faka‵tali ke tupu se fakalavelave, ko mafaufau ei koe ki mea kolā ka talia io me ka se talia ne koe. Ka fesoasoani atu ki a koe a te mataupu e 7 o te tusi ko te “Alofa o te Atua” mo nisi fakamatalaga i te pepa fakaopoopo ki Te ‵Tou Galuega Talai i a Novema 2006 i te faiga o au fakaikuga. Kafai ko oti koe ne papatiso, e ‵tau o faka‵fonu kae tauave ne koe i taimi katoa a te pepa ko te Advance Medical Directive. E ‵tau o faka‵fonu ne koe se pepa fou i tausaga katoa, kae kāti e mafai o faka‵fonu ne koe a pepa e uke atu māfai e manakogina. Ke fakamautinoa aka ne koe me e fakaasi fakavave atu ne koe a te mea tenā ki toeaina i te fakapotopotoga māfai ko fanatu koe ki te fakaimasaki ko te mea ke mafai o fesoasoani atu latou ki a koe.
[Blurb on page 3]
E mata, e tauave faeloa ne koe te pepa ko te AMD telā ko oti ne faka‵fonu faka‵lei i te mea ma tupu ei se fakalavelave?