Ke Talai Atu i Koga Gā‵lue mo te Loto Tali‵tonu

1. Kaia e se ‵tau ei o loto fanoa‵noa tātou māfai e pole‵pole tātou i te talai atu i koga gā‵lue?

¹ E mata, e polepole koe māfai e mafaufau ki te talai atu i koga gā‵lue? Kafai e penā loa, ke mo a ma loto fanoanoa koe, me ke oko foki ki a Paulo, telā ne fai mo fai se faifeau loto toa kae se mataku, ne ‵tau o ‘ati aka ne ia te loto toa’ ko te mea ke talai atu. (1 Tesa. 2:2) E fakaasi atu mai lalo a nisi mea masani kolā e manava‵se ki ei fakatasi mo manatu fesoasoani ke fakafesagai atu ki ei.

2. Kaia e se ‵tau ei o manava‵se tatou māfai e fakalavelave atu ki tino gā‵lue?

² E Mata, ka se Fia‵fia a Tino Gā‵lue Māfai ko Fakalavelave Atu Tātou? I te ukega o koga gā‵lue, e ‵tau o fesoasoani atu a tino gā‵lue ki so se tino e fanatu, kae e fakamoe‵moe eiloa lātou me ka fakalavelave atu ki a lātou i nisi taimi. E masani eiloa o fakaasi atu ne lātou a te āva, ona ko te mea e ‵kilo atu lātou ki a koe e pelā me se tino aogā ki te lotou pisinisi. Mai i te aga teuteu i se auala ‵lei kae fakaasi atu a te mataalofa mo te mata fiafia, ka fakamālosi aka ei ne koe lātou ke fakaasi atu a uiga āva.

3. E mafai pefea o ‵kalo keatea tatou mai i te fakaitaita atu ki tino kolā e olo atu ki sitoa?

³ E Mata, e ‵Tau o Talai Atu Au i Mua o Tino e Tokouke Kolā e Olo Atu ki ei? Kafai e mafai, ke filifili aka se taimi telā e se tokouke a tino i sitoa, e pelā mo te taimi e fatoā ‵tala ei. Faka‵tali ke nofo tokotasi a te menetia io me ko tena tino gālue a koi tuai o fanatu koe ki a ia. Ke fakatoe‵toe fua au pati fakatomua.

4. Ne a pati e mafai o fai atu ne tatou māfai ko talai atu i koga gā‵lue?

⁴ Ne a Aku Pati e ‵Tau o Fai Atu? Ke faipati atu ki te pule māfai e tai tokouke eiloa a tino gā‵lue i ei. E mafai o fai atu koe: “Ko oko eiloa i te faigatā ke maua atu a tino gā‵lue i fale, tela la, ko āsi atu mātou ki a koutou i otou koga gā‵lue. E iloa ne au me e gālue koe, tela la, ka se aveave‵loa aku pati.” Ko te mea ke se mafau‵fau lātou me e ‵pau tātou mo tino faipisinisi kolā e fakatau atu olotou mea, se mea ‵lei ke se taku atu faeloa a te fakatokaga ki te faiga o meaalofa, seiloga ke fesili mai me e fesoasoani atu pefea i mea tau tupe ki ‵tou galuega. E faka‵na eiloa ki te vaegā pisinisi, e mafai o fakamolemole atu koe ki te menetia me e mafai o faipati mālie atu koe ki tino gā‵lue. Ko toe fai atu ei au pati fakatomua konā ki a lātou. Kafai e foliga mai me e fakalavelave a te tino gālue, ke fakatoetoe aka tau fakamatalaga kae tuku atu fua se tamā pepa ki a ia. Kafai e se mafai o fai‵pati atu ki tino gā‵lue, kāti e mafai eiloa o tuku atu ne koe a tusi i te potu inu tī o lātou io me se isi koga aka.

5. Ne a pogai e mafai ei o talai atu tatou i koga gā‵lue mo te loto tali‵tonu?

⁵ Ne talai atu a Iesu mo Paulo ki tino i olotou koga gā‵lue mo te loto tali‵tonu, kae e mafai foki ne koe o fai penā. (Mata. 4:18-21; 9:9; Galu. 17:17) Fakamolemole ki a Ieova ke fesoasoani atu ke maua ne koe se loto filemu mo te loto toa. (Galu. 4:29) E faigatā o se maua ne koe a tino i koga gā‵lue, tela la, kaia e se taumafai ei koe ki te vaega tafasili i te gali tenei o te galuega talai?