Te Vitiō ko The Wonders of Creation Reveal God’s Glory
E fia‵fia eiloa a tino e tokouke ke onoono atu ki mea ne faite. Kae ne nāi tino fua e iloa ne lātou me kafai e onoono atu lātou, ko kāmata o maua ne lātou se tamā ata o mea i te mafaufau mo te loto o te ‵tou Māfuaga Sili. (Loma 1:20) Ko leva ne tauloto a Tavita e uiga ki a Ieova e auala i Tena Muna fakaosofia. Kae ne “onoono” kae fakapilipili atu foki tou tagata ki a Ia e auala i mea ne faite. (Sala. 8:3, 4) A te vitiō ko The Wonders of Creation Reveal God’s Glory, e fesoasoani mai ki a tātou, ‵tou tama‵liki, mo ‵tou a‵koga faka-te-Tusi Tapu ke onoono faka‵lei ki nisi mea ne faite ne Ieova, ke lavea atu ei a uiga mo faifaiga a te ‵tou Māfuaga Sili, kae ke mafai ei o fakapilipili atu tātou ki a ia. Kafai ko oti ne onoono ki te vitiō, mafaufau aka me e mafai o tali mai ne koe a fesili konei e ‵soko mai.
(1) E momea aka pefea te lasi o ‵tou loto fakafetai ki a Ieova ona ko te lasi mo te tokāgamālie o te iunivēsi? (Isa. 40:26) (2) Kafai e onoono faka‵lei atu tātou ki te vai, ne a mea e mafai o tauloto ne tātou e uiga ki te Tino telā ne faite ne ia? (Faka. 14:7) (3) E fakaasi mai pefea a te poto o Ieova i te lasi o te lalolagi mo tena ‵mao mai i te la? (4) Se a te aogā o te masina? (Sala. 89:37) (5) Ne faite pefea ne Ieova a tino ke maua ne lātou a te ola? (6) Se a te DNA? (Sala. 139:16) (7) Mai i mea katoa ne faite ne Ieova i te lalolagi, e ‵kese pefea a tino? (Kene. 1:26) (8) Se a te mea e olioli mālosi koe ki ei i te lalolagi fou?
Nisi Vaega o te Vitiō: (9) Ne māfua mai i fea a lanu kese‵kese? (10) E mafai pefea o oko atu a te vai ki tāulu o lakau telā ko mālosi atu i te tulafono o te natula? (11) Se a te aogā o te vai i loto i ‵tou foitino? (12) Tuku mai ne fakaakoakoga o te fetaui ‵lei o mea ōla. (13) E iloa pefea ne mea ōla a te taimi ke ati aka ei olotou va fakataugasoa mo nisi tino? (14) Se a te “faka‵tuga ‵lei katoatoa o mea ne faite,” kae e lavea atu pefea a te mea tenā i mea ne faite?
“Onoono Faka‵lei” ki Mea ne Faite ne Ieova: Ne fakamālosi mai a Iesu ki a tatou ke “onoono faka‵lei ki manu eva i te lagi” kae “mafau‵fau ki te auala e ola ei a pulalakau o te vao.” (Mata. 6:26, 28) A te faiga penā e mafai o fakamālosi aka ei a te ‵tou fakatuanaki, ati aka ‵tou loto tali‵tonu ki te Māfuaga mo ‵tou loto fakafetai ki te poto, te ‵mana fakaola tino, mo te alofa o Ieova. I lō te sōna saga atu ki galuega o te lalolagi tenei, ke fakaavanoa ne taimi mo taumafaiga ke onoono ki te fakaofoofogia o mea ne faite ne Ieova, kae mafaufau ki mea kolā e fai mai i ei e uiga ki ‵tou Atua.—Sala. 19:1.