Ke Saga Tonu Atu—Mai i te Faiga o Fesili mo te Fakalogologo Faka‵lei

¹ E fia‵fia eiloa a te tokoukega o tino ke fakaasi atu olotou kilokiloga kae e se ma‵nako ke fakatonutonu aka latou. Tela la, e pelā me ne faifeau Kelisiano, e ‵tau o fakamasani tatou ki te atamai i te faiga o tino ke fakaasi mai a mea i olotou loto e auala i fesili.—Faata. 20:5.

² E ‵tau o fakamalosi atu ‵tou fesili, kae ke se fakaitaita atu. I te taimi ne talai atu ei mai fale ki fale, e fesili atu se taina e tokotasi, “E mafaufau koe me ka isi se taimi e fakatau fakaasi atu ei ne tino a te ‵malu mo te āva?” E faka‵na eiloa ki te tali, e fai atu a ia, “Se a tau faka‵tau me ne a mea e manakogina ke fakataunu ei te mea tenei?” io me “Kaia e mafaufau ei koe penā?” Kafai e talai atu i nisi taimi mo koga e uke a tino i ei, e fesili atu a te suā taina ki a latou kolā e isi ne olotou tama‵liki, “Se a te mea e fiafia malosi koe ki ei e pelā me se mātua?” Ko toe fesili atu ei, “Ne a mea e manavase malosi koe ki ei?” E lavea atu me i fesili konei e fai ei a tino ke fakaasi atu olotou kilokiloga e aunoa mo te fakamā atu ki a latou. Ona ko te kese‵kese o fakanofonofoga, e mafai o ‵fuli malie ne tatou a te mataupu mo te auala e fai atu ei ‵tou fesili ke fetaui ‵lei mo ‵tou koga talai.

³ Te Faiga ke Fakaasi Mai ne Tino a Mea i Olotou Loto: Kafai e loto fia‵fia a tino ke fakaasi mai olotou mafaufauga, ke fakalogologo atu eiloa mo te kufaki e aunoa mo te faipati atu faeloa. (Iako. 1:19) Ke talia mo te fiafia olotou fakamatalaga. (Kol. 4:6) E mafai ne koe o fai atu fua penei: “Ko oko eiloa i te gali. Fakafetai eiloa mo te fakaasi mai ne koe a te mea tenā ki a au.” Ke fakamālō atu ki a latou māfai e mafai ne koe o fai atu mo te loto fakamaoni. Ke ‵sili atu mo te atafai a nisi fesili ke iloa aka ei a mea e mafau‵fau latou ki ei mo te pogai e mafau‵fau ei latou penā. Ke onoono ki manatu kolā e lotoma‵lie fakatasi koulua ki ei. Kafai e fia fakaasi atu ne koe ki a latou se tusi faitau, e mafai ne koe o fai atu, “Kai mafaufau aka eiloa koe ki te mea tenei e pelā me se auala ke faka‵lei aka ei?” Ke ‵kalo keatea mai i te fia poto io me ko te kinau atu.—2 Timo. 2:24, 25.

⁴ A te auala e ‵saga mai ei a nisi tino ki ‵tou fesili e mafai o fakalagolago malosi ki te ‵tou fakalogologo faka‵lei atu. E mafai o iloa ne tino me e fakalogo‵logo tonu atu tatou io me ikai. Ne iloa ne se ovasia faimalaga a te mea tenei, “Kafai e fakaasi atu ne koe tou loto fiafia mo te kufaki ke fakalogologo ki tino, e mafai eiloa o fakamalosi atu ki a latou ke tosina mai kae e fai foki mo fai se fakaasiga gali o te va fakataugasoa ‵pili.” A te fakalogologo ki nisi tino e fakaasi atu ei te fakaaloalo ki a latou, kae e fakamalosi aka ei latou ke fia fakalogo‵logo ki te tala ‵lei telā e taumafai tatou o fakaasi atu.—Loma 12:10.

[Fesili mo te Sukesukega]

1. Se a te atamai e ‵tau o tauloto tatou ki ei ko te mea ke magoi te faiga o te ‵tou galuega talai?

2. Ne a toe fesili ‵lei ke ‵sili atu?

3. Kaia e ‵tau ei o sili atu te ‵tou fakalogo‵logo faka‵lei i lō te fai‵pati i te galuega talai?

4. E mafai pefea o fakaasi atu ne tatou a te fakaaloalo ki tino kolā e fai‵pati atu tatou ki ei?