Se Fesili ke Mafaufau ‵Loto ki ei

◼ Ne a mea e ‵tau o masaua māfai e fia tuku atu ne tatou a nisi kope io me ko ‵tou mea katoa ki te fakapotopotoga a Ieova māfai ko ‵mate tatou?

Kafai ko ‵mate a tino, ko se toe ai se lotou malosi ki olotou kope faka-te-foitino. (Fai. 9:​5, 6) E ‵tau o na fakatoka se togi telā e fakamatala mai i ei olotou manakoga e uiga loa ki olotou kope. (2 Tupu 20:1) A te pepa tenei i mea tau tulafono e aofia foki i ei a te tino telā e fakatuagagina ke fakataunu ne ia te manakoga tenā. Kafai e seki fakatoka a te pepa tenā, ka fakaiku aka ne tino pule i te ukega o fenua a te auala ke tufatufa atu ei a kope a te tino mate. Tela la, kafai e isi ne ‵tou manakoga fakapito e uiga ki ‵tou kope, e pelā mo nisi kope io me ko mea katoa ke tuku atu ki te fakapotopotoga a Ieova, se mea tāua ke fakatoka ne tatou a te pepa e ‵tusa mo te tulafono ke taku mai i ei a te manakoga tenei kae e filifili faka‵lei aka foki ne tatou se tino telā e fakatuagagina ke fakataunu ne ia.

A te tino telā e fakataunu ne ia te manakoga tenei e maua ne ia se tiute ‵mafa. E ‵tusa mo te lasi o te togi, te vaevaega mo te tufatufaatuga o kope e mafai o aofia i ei a mea e uke kae e mafai foki o lasi te taimi e fakamāumāu ki ei. E se gata i ei, e isi foki loa ne fakatakitakiga e ‵tau o tau‵tali ki ei a tino pule i te malo. E se ko tino katoa i te fakapotopotoga e ‵tau o fai mo fai te tino ke tausi ki ei. A te tino telā e filifili ne tatou e ‵tau o fai mo fai se tino telā e iloa ne tatou me e mafai ne ia o fai, e fakatalitonugina, kae e loto fiafia foki ke fakataunu ne ia ‵tou manakoga.

Kafai ko Fesili Atu ke Fai Koe mo Fai te Tino ke Tausi ki te Togi: Kafai ko fesili atu me e loto fiafia koe o tausi ki te tiute tenei māfai ko mate se tino, nofo muamua ki lalo o galue tena ‵togi kae fakaiku aka fakatasi mo te faiga o ‵talo me e mafai ne koe o fakataunu te tiute tenei. (Luka 14:​28-​32) Mai tua o te mate o te tino, e ‵tau o fakailoa atu ne koe ki tino katoa kolā e aofia i te togi tenā. I te taimi e maua ei ne koe te pulega ke fai penā, ka pānaki eiloa mo koe a te tiute ke tufatufa atu a kope e ‵tusa mo te ‵tulafono mo mea kolā e fakatonu mai i te togi. E ‵tau o iloa ‵lei ne te tino telā e tausi ki te togi me ko te togi tenā se mea lasi io me se mea foliki, e ‵tau eiloa o tautali faka‵lei atu koe ki mea kolā e tusi i te togi. So se meaalofa e tuku atu ke fakaaoga ne Molimau a Ieova, e ‵tusa mo te tulafono, ka tuku eiloa a tupe konā ma te fakapotopotoga a Ieova.​​—Luka 16:10; 21:​1-4.