E Mafai o Momea Aka Au Mea e Fai i Tau Taviniga?

¹ A te kilokilo atu ki te tokouke o tino fia‵fia ki te tala ‵lei o te Malo, ne fakatonu atu ei a Iesu ki ana soko ke “fakamolemole atu ki te Matai o te galuega ke uga mai ne tino ga‵lue e tokouke ki te ‵katiga o saito.” (Mata. 9:37, 38) Ona ko te mea ko ‵nofo atu tatou i toe itula fakaoti o te ‵katiga o saito, ko sili atu foki nei a te tāua o te ‵tou galuega i lō aso mua. E fakauiga i ei me e ‵tau o mafau‵fau ‵mafa tatou fakatasi mo te faiga o ‵talo ki auala e mafai ei o momea aka ‵tou mea e fai i te galuega talai.—Ioa. 14:13, 14.

² Auala ke Momea Aka ‵Tou Mea e Fai i te Galuega Talai: Ona ko te takitakiga mo te fesoasoani o Ieova, ko mafai ei ne tino e tokouke o tavini atu e pelā me ne paenia. (Sala. 26:2, 3; Fili. 4:6) Ne fai ne nisi tino se taumafaiga fakapito ke tavini atu e pelā me ne paenia lagolago i se masina e tasi io me uke atu i te tausaga. E fakamaoni atu ei, me i te mea nei se auala ‵lei ke momea aka olotou mea e fai i te galuega talai. A te fiafia telā e maua mai i te kau atu ki te tauliaga fakapito tenei ne fai ei a tino e tokouke ke mafau‵fau ki te tavini atu e pelā me ne paenia tumau.​—Galu. 20:35.

³ E Mata, e Mafai o Toe Paenia Koe?: Kafai ne tavini atu mua koe e pelā me se paenia, e mautinoa eiloa me ne maua ne koe a mea ‵gali mai i te taimi tenā. Kai mafaufau aka eiloa koe fakatasi mo te faiga o ‵talo ki te avanoaga ke toe paenia? Kāti te pogai telā ne taofi aka ei tou paenia ko se toe fakalavelave atu nei ki a koe, kae ko oko mai te avanoaga ke toe maua ne koe te tauliaga fakapito tenā.​—1 Ioa. 5:14, 15.

⁴ Ko ‵loto eiloa nei a te galuega ko te ‵katiga o saito kae ko pili o palele atu. (Ioa. 4:35, 36) Ke na iloilo aka ne tatou katoa ‵tou tulaga i te taimi nei kae fakaiku aka me e mafai o fakamafuli‵fuli ‵tou mea e fai i aso katoa ko te mea ke momea aka te ‵tou ‵kau atu ki te galuega talai. Io me kafai e se mafai o momea aka ‵tou mea e fai i te taviniga, e mata, e mafai o ‵sala atu tatou ki auala kolā e magoi ei te faiga o te galuega talai? (Male. 12:41-44) Ko se faka‵tau eiloa i te gali o te tauliaga ko maua nei ne tino katoa kolā e fetaui ‵lei olotou fakanofonofoga ke fakaaoga latou ne Ieova i te galuega fakapito tenei!

1. Se a te manakoga tāua ko sae aka i te galuega talai, kae kaia?

2. Ne ‵saga atu pefea a nisi tino ki te ‵kamiga mō tino ga‵lue e tokouke i te galuega talai?

3. Kafai ne paenia muamua koe, se a nei te mea e mafai o mafaufau koe ki ei?

4. Se a te avanoaga tu ‵kese ko ‵tala mai nei ki a tatou katoa?