Ke Toe Āsi Atu ki Tino Fiafia —I te Taimi Fea?
1. Ne a mea e aofia i te faiga o soko?
1 A te faiga o soko e aofia i ei a te ‵toe āsi atu ki a latou kolā e fakaasi mai ne latou a te lotou fia‵fia o tauloto ki te fakatokaga o te Malo o Ieova. (Mata. 28:19, 20) A te taimi gali ke fai ei se toe asiga e masani loa o faka‵na ki taimi kolā e ‵lei ki a tatou e penā foki ki te tino fiafia. Kaia e ‵tau ei o āsi fakavave atu tatou mai tua o ‵tou āsiga muamua?
2, 3. Kaia e ‵tau o āsi fakavave atu tatou?
2 Kaia e ‵Tau ei o Toe Āsi Fakavave Atu? A te Talaiga o te “Tala Lei tenei e uiga ki te Malo” ko pili fua ki tena fakaotiga, ko oko mai ei te gataga o te olaga masei tenei. (Mata. 24:14; 1 Pe. 4:7) Tela la, ona ko te mea nei se avanoaga mō latou kolā e fia‵fia kae e seki oko mai te gataga, e ‵tau foki mo tatou o ‵saga fakalei ki te fakatonuga e uiga ki te ‘folafolaatuga fakavave o te tala lei,’ telā e aofia i ei a te ‵toe āsi fakavave atu o fakamalosi aka te fiafia o te tino telā ne fakaasi mai.—2 Koli. 6:1, 2; 2 Timo. 4:2.
3 Ko oko loa te manako malosi o Satani ke ave keatea ne ia so se fuaga o te Malo telā ko oti ne ‵toki ne tatou i te loto o se tino fiafia. (Male. 4:14, 15) E masani sāle o faka‵tuka atu a tino i te kāiga, i koga ga‵lue, e penā foki mo nisi tino ki a latou kolā ko kamata o fakaasi mai te lotou fia‵fia. E tāua ‵ki te ‵foki fakavave atu o tatou ke faka‵soko te sau‵talaga, a koi tuai o ‵mua atu a nisi tino i a tatou o faka‵tuka atu te fiafia o te tino tenā.
4. I te āsiga muamua, ne a ‵tou fakatokaga e ‵tau o fai mō se toe āsiga?
4 Ke Fai se Fakatokaga Mautinoa: Se mea tafasili i te ‵lei ke fai ne koulua se fakatokaga mautinoa ke toe āsi atu a koi tuai o tiaki ne koe te tino fiafia tenā. E mafai foki o fakasae aka ne koe se fesili telā ka mafai o tali aka i te suā taimi e toe āsi atu ei koe. E taua ‵ki eiloa ke tausi fakalei a fakamatalaga kolā ne fakamau ki lalo e uiga ki tau āsiga muamua mo te taimi e toe fetaui ei koulua. Kafai e avanoa koe, e mafai o fesili atu ke toe foki atu koe ki ei i te suā aso io me se taimi toetoe mai tua ifo o te aso tenā. Kafai ne āsi atu muamua koe i te fakaotiga o te vaiaso kae ko te tino fiafia tenā e galue i aso o te vaiaso, kāti ka talia ne ia ke toe āsi atu koe ki a ia i te taimi foki loa penā i te suā vaiaso. Kafai e isi sau fakatokaga mautinoa penā, ke masaua loa o tausi ki au pati kolā ko oti ne fai.—Mata. 5:37.
5. E fesoasoani mai pefea a te foki fakavave atu ki tino fia‵fia, ke mafai ne tatou o fakataunu a te fakatonuga a Iesu ke fai a soko?
5 E isi ne pogai ‵lei e āsi fakavave atu ei tatou ki tino fia‵fia. Tela la, fai ne fakatokaga mautinoa kae foki fakavave atu ki ei, me “ko se leva nei aso.” (1 Koli. 7:29) A te ‵foki fakavave atu o tatou o āsi ki tino kolā e fia‵fia ki te fekau o te Malo, ko te magoi foki o te galuega telā e fai nei ne tatou.