Ke Fakaaoga ‵Tou Web Site ke Akoako Au Tama‵liki
1. Se a te aoga o te vaega i te ‵tou Web site telā e fakaulutala penei “Tama‵liki”?
1 Ne fakatoka ‵tou Web site, ko te jw.org, ke gali ki tino o kautama katoa. A te vaega i te Web site telā e fakaulutala penei “Children” (fano ki Bible Teachings > Children) e fesoasoani atu ki tama‵liki mo olotou mātua ke fakapilipili atu te suā tino ki te suā tino kae penā foki ki a Ieova. (Teu. 6:6, 7) E mafai pefea o fakaaoga ne koe a te vaega tenei ke akoako ei au tama‵liki?
2. E mafai pefea o filifili ne koe se mataupu telā e fetaui ‵lei ke suke‵suke fakatasi ki ei mo au tama‵liki?
2 Ke Fakafetaui Aka: E kese‵kese a manakoga o tama‵liki takitasi. (1 Koli. 13:11) E mafai la pefea o filifili ne koe se mataupu telā e fetaui ‵lei ke suke‵suke ki ei mo au tama‵liki? Fesili ifo ki a koe eiloa penei: ‘Se a te mea ka fia‵fia malosi ki ei aku tama‵liki? E pefea te vave o te lotou malamalama? E pefea te leva e mafai o ‵saga tonu mai latou?’ A tama‵liki kolā ko taki tolu tausaga io me e fo‵liki ifo, e mafai o sau‵tala koutou ki tala kolā e maua mai lalo i te “My Bible Lessons.” E fakaaoga ne nisi kāiga a tala mai te Tusi Tapu i te vaega ko te “Teach Your Children.” Ke mafaufau foki ki nisi mea konei.
3. E mafai pefea o fakaaoga ne mātua i se auala magoi a tala mo mea e ‵tau o fai kolā e maua mai lalo i “Family Worship Projects”?
3 Mea e Mafai o Fakaaoga i Tapuakiga a Kāiga: A mea konei ne mea faigaluega kolā e fesoasoani atu ki ulu o kāiga ke suke‵suke fakatasi mo olotou tama‵liki. Ke fakamasani ki te fakaaogaga o tala mo mea e ‵tau o fai, ke ‵toko i te pati download kae faitau ki te “Parents’ Guide” mō mea takitasi i ei, ko te mea ke tauloto ki te auala e mafai o fakaaoga a tala mo mea e ‵tau o fai. Ke fakaaoga a ata mo mea e ‵tau o fai ki ei, e pelā mo te ‵kalaga o ata konā, ke akoako ki ei au tamā tama‵liki. Fesoasoani atu ki tama‵liki tai ma‵tua ke fakaoti a mea kolā e ‵tau o akoga ki ei. A mea katoa e ‵tau o akoga ki ei i mea takitasi konei e isi se lotou sokoga ki tala io me ko akoakoga tāua i te Tusi Tapu, tela la, e mafai o aofia i ei a tamaliki o tupulaga katoa i te mea telā e fakaaoga i tapuakiga a kāiga.
4. Ne a mea e mafai o maua ne tatou i te vaega “Become Jehovah’s Friend”?
4 Become Jehovah’s Friend: A vitio, pese, mo mea e ‵tau o fai i te vaega tenei o ‵tou Web site e fesoasoani atu ki mātua ke faka‵goto ifo a te Muna a te Atua ki olotou tama‵liki fo‵liki. (Teu. 31:12) E akoako mai ne ata vitiō toe‵toe konei ne faite se akoakoga tāua. A mea e ‵tau o fai e pelā mo tafaoga ki te fakatau ‵sala e faka‵mafa mai i ei a akoakoga tāua konā. Ona ko te mea e fia‵fia a nisi tama‵liki o usu pese—kae ko pese e fesoasoani atu ki tama‵liki ke masaua a mea ne tauloto ne latou—e tuku atu faeloa ki luga i te Web site a pese o te Malo mo pese kolā ne fakatoka fakapitoa loa mō tama‵liki.
5. Kaia e ‵tau ei mo mātua o akai ki a Ieova mō se fesoasoani ke mafai ne latou o akoako olotou tama‵liki?
5 Mātua, e manako a Ieova ke manuia koutou e pelā me ne mātua mo tamana. Tela la, akai atu ki a ia ke fesoasoani ki a koe i te akoako atu o te munatonu ki au tama‵liki. (Fama. 13:8) Fakatasi mo te fesoasoani o Ieova, e mafai o akoako ne koe au tama‵liki ke “poto [latou] e uiga ki te fakaolataga e auala i te fakatuanaki ki a Keliso Iesu.”—2 Timo. 3:15; Faata. 4:1-4.