Pese ‵Fou mō te Tapuakiga!
1 I te fono tausaga o te Watch Tower Bible and Tract Society of Pennsylvania telā ne fai fakamuli nei i a Oketopa po 4, 2014, ne faka‵pula i ei a fakatokaga ke toe iloilo aka a te ‵tou tusi pese. Se tala fakafiafia eiloa tenā! Ne fakamasaua atu ki tino kolā ne ‵kau atu ki ei a te tāua o ‵tou pese o te Malo i te ‵tou tapuakiga.—Sala. 96:2.
2 Kāti ka mafaufau koe penei, ‘Kaia e manakogina ei ke toe iloilo aka te ‵tou tusi pese?’ E isi eiloa ne pogai. Muamua la, ona ko te mafulifuli o te ‵tou malamalama i te Tusi Tapu, e mafai ei o ‵fuli ne te mea tenā a kupu o ‵tou pese. (Faata. 4:18) Tenei te suā pogai: A tugāpati mo fakamunaga kolā ne fakaaoga i ‵tou tusi pese ne puke mai katoa i te lōmiga mua o te New World Translation. E ‵tau o ‵fuli a kupu katoa konā i te taimi nei ke fetaui ‵lei mo tusitusiga o te lōmiga fou. E tiga eiloa e lasi te galuega e manakogina ke fai ki te faka‵fouga o kupu konei, ko oti ne fakaiku aka ke fakaopoopo atu a nāi pese ‵fou ki te ‵tou tusi pese.
3 E mata, e ‵tau o faka‵tali tatou ke maua loa te tusi pese fou, ko mafai ei o usu ne tatou a pese ‵fou konā? Ikai. E fia‵fia eiloa matou o fakailoa atu me i nāi masina mai mua nei, ka ‵tala mai ei a se aofaki o pese ‵fou i te ‵tou Web Site ko te jw.org. Kafai ko ‵tala mai se pese fou, ka aofia eiloa te pese tenā i te fakaotiga o te fakasologa o te Fakatasiga mō te Galuega Talai fakatasi mo se fakailoga ke iloa i ei me se “pese fou.”
4 Te Auala ke Tauloto a Pese ‵Fou: E tai faigata eiloa ke tauloto ki se pese fou. Kae e pelā mo te faisalamo, e ma‵nako tatou o usu a pese i fakatasiga a te fakapotopotoga kae ke “sē ‵mapu” eiloa i te usuga o pese. (Sala. 30:12) Ke tauloto se pese fou, tautali ki auala faigofie konei mai lalo:
Fakalogologo faeloa ki te pese e tātā ki te piano, telā ka faulu ki loto i te ‵tou Web site. Ko te uke o taimi e fakalogologo koe ki te ‵tagi o te pese, ko te faigofie ke tauloto ne koe.
Tauloto a kupu, kae taumafai ke ‵mau i a koe a pati.
Ke fakatagi kae usu ne koe te pese. Ke fai faeloa ke oko ki te taimi ko mau i a koe te pese.
Ke fakaakoako a pese ‵fou i nisi taimi e fai ei te Tapuakiga a te Kāiga ke oko ki te taimi ko mau i a latou te pese.
5 Kafai e fakaaoga se pese fou i masina mai mua nei ke fakaoti ki ei te Fakatasiga mō te Galuega Talai, e ‵tau o fakalogologo muamua te fakapotopotoga ki te pese. Ka oti ko toe fakatagi ei te pese ke usu ne te kautaina, e pelā loa mo te auala e usu ne tatou a nisi pese.
6 Mafaufau la ki te mea tenei, a te usuga o pese i ‵tou fakatasiga e aumai ne ia te fiafia ke ‵kau fakatasi i te usuga o pese tavae ki a Ieova. Tela la, e se ‵tau mo tatou o fakamasani ke sōna tiaki a ‵tou koga saga‵saga māfai ko kamata te ‵tou fakatasiga Kelisiano ki se pese.
7 E isi foki se suā auala e mafai ei o fakaasi atu ne tatou te āva ki ‵tou pese o te Malo. I taimi o fono o fenua mo fono o atufenua, e masani o fakatagi‵tagi sāle a pese a koi tuai o kamata te polokalame. E ‵togi eiloa ne taina mo tuagane fakamaoni mai fenua kese‵kese o te lalolagi a olotou pasese ke faima‵laga atu fakalua taimi i te tausaga ki Patterson i New York, ke fai kae fakatoka a pese fakatagi‵tagi ke fakaaoga i ‵tou tapuakiga. Tela la, kafai e ‵kami ne te takitaki fono tatou ke na saga‵saga i ‵tou nofoga i te taimi o te fono kae fakalogologo ki pese fakatagi‵tagi konei, e ‵tau mo tatou o faka‵logo ki ei. Ka fesoasoani mai i ei ke fakatoka ‵tou loto mō lāuga kolā ka fai.—Ese. 7:10.
8 Ka fakaoti eiloa te ‵tou fakatasiga i te po nei, ki te pese fou telā e fakaulutala penei, “Ko Tu Nei te Malo—Ke na Oko Mai!” A te pese tenei, telā ko te vaega tāua o te fono tausaga telā fatoā oti ne fai, ne ‵fatu fakapitoa eiloa ke fakamailoga ei te kātoaga o te 100 tausaga o te pulega o te Malo.
9 E mautinoa eiloa me i pese ‵fou konei ne “mea ‵lei” mai i a Ieova. (Mata. 12:35a) Ke na fakaiku aka ke tauloto ne tatou a pese ‵fou kae ke usu atu mai ‵tou ‵kanoloto, ke avatu ei a vikiga mo te fakaaloalo ki te ‵tou Atua!—Sala. 147:1.