Se Tusi Mai te Potukau Pule
Talofa Taina mo Tuagane:
“E fakafetai atu faeloa matou ki te Atua i taimi e aofia ei ne matou a koutou katoa i omotou ‵talo, me ne seki puli lele i a matou a te otou ga‵lue mo te fakamaoni mo otou galuega a‵lofa mo te otou kufaki ona ko te otou fakamoemoega i te ‵tou Aliki ko Iesu Keliso i mua o te ‵tou Atua te Tamana.” (1 Tesa. 1:2, 3) Ko oko eiloa i te ‵gali o te auala e fakamatala mai ei ne pati konei a ‵tou lagonaga e uiga ki a koutou! E fakafetai matou ki a Ieova ona ko koutou mo galuega ‵lei kolā e fai ne koutou. Kaia?
I te tausaga ko teka, ne fakalavelave malosi koutou i te “ga‵lue mo te fakamaoni” mo otou “galuega a‵lofa” mō te Malo. Ne ‵sala atu foki a tino e tokouke ki auala ke fakalauefa atu te lotou galuega. Ne olo atu a nisi tino o tavini i nisi koga, ke oko foki ki nisi fenua, kolā e manakogina malosi i ei a tino talai o te Malo. Ne fakalauefa atu ne nisi tino te lotou galuega mai te ‵kau atu ki te talai atu i koga e tokouke ei a tino. Ne fakamalosi aka a tino e tokouke ke paenia lagolago i te vaitaimi o te Fakamanatuga, i te masina o te asiga a te ovasia o te fenua, io me ko te taimi o te galuega fakapito i a Aokuso 2014. E tiga eiloa e kese‵kese otou fakanofonofoga, e lavea ne matou me e ga‵lue eiloa koutou mo otou loto kātoa mō Ieova, kae e fakamalō atu eiloa matou ki a koutou. (Kol. 3:23, 24) Ona ko te otou “ga‵lue mo te fakamaoni” e maua ei ne matou se pogai ke fakafetai atu ki a Ieova!
E lasi ‵ki eiloa te motou loto fakafetai mō otou “galuega a‵lofa” i te faitega o fale kese‵kese i te lalolagi kātoa mō te Atua. E ma‵nako malosi eiloa matou ki vaegā fale penā, ona ko te gasolo aka o te aofaki o tino o Ieova. (Isa. 60:22) Mafaufau la, a te aofaki fou o tatou i te tausaga tenei ko teka atu, ko te 8,201,545, kae ko ‵tou akoga faka-te-Tusi Tapu ne oko atu ki te 9,499,933 i masina takitasi. Ona ko te gasoloakaga tenei, ko manakogina i ei ke faka‵lasi aka a ofisa lagolago e uke io me e toe fakafou. E tonu, e fakauiga foki eiloa te mea tenei me e manakogina a Fale Tapuaki e uke atu! I te taimi foki eiloa tenei, e manakogina a ofisa ‵fulitusi i koga e uke o te lalolagi ko te mea ke mafai o ‵nofo kae ga‵lue a ‵tou tino ‵fulitusi i koga kolā e fakaaoga ei te lotou ‵gana.
Tela la, e mafai o fesili ifo tatou, ‘Ne a aku mea e mafai o fai ke ‵lago atu ki te faitega o fale konei?’ E mafai ne nisi o tatou o ga‵lue fakavolenitia i te galuega fakatūtū tenei. Kae faitalia me e isi ne ‵tou atamai io me e seai i galuega fakatū‵tu, e maua ne tatou a te tauliaga ke fakaaoga ‵tou kope tāua i galuega tāua konei. (Faata. 3:9, 10) I te taimi ne faite ei a te faleie tapu, ne fakaosofia a te kau Isalaelu ke tuku atu olotou mea telā ne iku atu ki te faiga o se faka‵pulaga ke fakagata te tukuatuga o mea. (Eso. 36:5-7) E seai se fakalotolotolua me e otia ‵tou loto i vaegā fakaakoakoga penā i te Tusi Tapu kae fakamalosi aka ei tatou ke gasue‵sue. A otou “galuega a‵lofa” i feitu tāua konei o te taviniga tapu ko te suā pogai ke fakafetai atu matou ki a Ieova!
E maua foki ne matou se pogai fakapito ke fia‵fia i te taimi e iloa ei ne matou a te tumau i te kufaki o ‵tou taina. E pelā mo ‵tou taina pele i Kolea ki Saute. Talu mai te 1950, ne fakasala a ‵tou taina talavou i te fenua tenā ki te ‵pei atu ki falepuipui ona ko te mea ne ita fitifiti latou ma fakaseaoga te lotou sē ‵kau atu ki se feitu e pelā me ne Kelisiano. Ne kufaki a te fia o kautama o ‵tou taina i te faifaiga tenei, e aunoa mo te fakavāi‵vai. Ne fakamalosi aka ‵tou fakatuanaki ne te lotou fakaakoakoga o te kufaki!
I Eritrea, e tokotolu o ‵tou taina ne ‵pei ki te falepuipui i tausaga e silia atu i te 20. Ne aofia i nisi tino a ‵tou tuagane mo olotou tama‵liki, kolā ne ‵pei atu ki falepuipui mō se taimi toetoe. Ne taumafai a tino e tokouke ke fakasaoloto latou, kae e seai eiloa se tino ne iku manuia ana taumafaiga. Ne seki gutugutulua ‵tou taina. Ne tumau eiloa latou i te fakamaoni mai lalo i fakanofonofoga fakafanoa‵noa. E se puli i a tatou a tino fakamaoni konei i ‵tou ‵talo.—Loma 1:8, 9.
E tonu, ne seki ‵pei a te tokoukega o koutou ki te falepuipui ona ko te otou fakatuanaki. E tiga eiloa te feitu tenā, e kufaki eiloa a tino e tokouke mai i a koutou i te olaga matua, masaki, ‵tekemaiga mai i avaga io me ko kāiga sē tali‵tonu, e pelā foki mo nisi fakalavelave totino kolā e iloa fua ne koutou. Faitalia me se a te tulaga, ke tumau eiloa koutou i te tavini atu ki a Ieova mo te fakamaoni! (Iako. 1:12) E fakamālō atu eiloa matou ki a koutou. A te otou kufaki mo te fakamaoni ko te suā pogai e fakafetai atu ei matou ki a Ieova.
Ao, a te otou ga‵lue mo te fakamaoni, otou galuega a‵lofa, mo te otou kufaki e tuku mai i ei a pogai ‵lei ke ‘fakafetai atu ki a Ieova me i a ia e ‵lei.’ (Sala. 106:1) E a‵lofa tonu eiloa matou ki a koutou katoa, kae e ‵talo matou ki a Ieova ke fakamalosi, tausi, kae fakamanuia atu ki a koutou ko te mea ke mafai o tavini atu koutou ki a ia ki te se-gata-mai.
Ko otou taina,
Potukau Pule o Molimau a Ieova