Kafai e ‵Tala Mai ne se Tamaliki a te Mataloa

Kafai e ‵tala mai ne se tamaliki a te mataloa, e ‵tau o fakamolemole atu tatou ke fai‵pati mo ana mātua. E fakaasi atu i ei a ‵tou āva ki lā tulaga pule. (Fat 6:20) Kafai e ‵kami ne se tamaliki a tatou ki loto, e se ‵tau o talia ne tatou. Kafai e fakalave‵lave ana mātua, e ‵tau o toe āsi atu tatou i te suā taimi.

Kafai a te tamaliki ko matua, kāti ko pilipili ki te tulaga talavou, se mea ‵tau foki loa ke fakamolemole atu ki ana mātua mō se taliaga. Kafai e se avanoa laua, e mafai o ‵sili atu tatou me e mata, e talia ne ana mātua ke filifili ne ia a tusi mo ana faitau io me ikai. Kafai e talia ne laua, ko mafai ei o ofo atu ne tatou se tusi kae fakasino atu ki a ia te ‵tou website ko te jw.org.

Kafai e toe āsi atu tatou ki se talavou telā ne fiafia, e ‵tau o fakamolemole atu tatou ke fetaui mo ana mātua. Ka fesoasoani mai i ei ke fakamatala atu ne tatou te pogai o te ‵tou asiga kae fakaasi atu ki a latou a manatu fesoasoani ‵tonu kae fakatuagagina kolā e maua i te Tusi Tapu mō kāiga. (Sal. 119:86, 138) A te fakaasi atu o te āva mo te amanaia ki mātua ka fai mo molimau ‵lei kae e mafai foki maua ne tatou i ei a nisi avanoaga ke fakailoa atu te tala ‵lei ki olotou kāiga.—1Pe 2:12.