E Mafai o Maua ne Koe a Fakamanuiaga a te ‵Tou Mafuaga ki te Se-Gata-Mai

Ne tauto atu te Atua ki te pelofeta ko Apelaamo me ka aumai ne se tokotasi telā e tupu mai i tena gafa a fakamanuiaga ki “atufenua katoa o te lalolagi.” (Kenese 22:18) Ko oi la a te fanau tenā?

I tausaga toeitiiti ko kātoa te 2,000 ko ‵teka, ne tuku atu ne te Atua ki a Iesu, telā ne tupu mai i a Apelaamo, a te ‵mana ke fai a vavega fakaofoofogia. Ne fakaasi mai i vavega konā me i te tautoga ne fai ki a Apelaamo ka oko atu ki atufenua katoa e auala i a Iesu.—Kalatia 3:14.

A vavega kolā ne fai ne Iesu, ne fesoasoani atu ke iloa aka i a ia ko te tino telā ne filifili ne te Atua ke fakamanuia atu ki tino, kae ne fakaasi mai i ei te auala ka fakaaoga ne te Atua a ia ke fakamanuia a tino ki te se-gata-mai. Onoono aka ki te auala e fakaasi mai i vavega a Iesu a nisi uiga ‵gali o ia.

Atafai—Ne faka‵lei ne Iesu a tino ma‵saki.

I se taimi e tasi, ne fakamolemole atu se lepela ki a Iesu ke faka‵lei aka a ia. Ne patele atu a Iesu ki a ia kae fai atu: “Au e manako ki ei!” Se leva mea loa ko ‵lei a tena lepela.—Male. 1:40-42.

Kaimalie—Ne fagai ne Iesu a tino fia‵kai.

Ne seki manako a Iesu ko tino ke fia‵kai. E silia atu mo se taimi e tasi ne fagai fakavavega ei ne ia te fia afe o tino, mai nāi falaoa mo tamā ika. (Mataio 14:17-21; 15:32-38) Mai tua o te ‵kaiga, ne lotoma‵lie a tino katoa kae ne ‵toe valevale a mea‵kai.

Alofa Atafai—Ne faka‵tu aka ne Iesu a tino ‵mate.

Ona ko tena “alofa malosi,” ne toe fakatu aka ei ne Iesu a te tamaliki tagata eiloa e tokotasi a se fafine fanoanoa telā ko mate tena avaga, kae seai se tino ke tausi atu ki ei.—Luka 7:12-15.