Fesili Mai Tino Fai‵tau
E mata, a pati konei “Ka puipui ne koe a latou,” kolā e maua i te Salamo 12:7, e fakasino atu ki “tino fakaa‵lofa” (fuaiupu 5) io me ki “pati a Ieova” (fuaiupu 6)?
E lavea atu i te mataupu kātoa me e fakasino te fuaiupu tenei ki tino.
I te Salamo 12:1-4, e fai‵tau tatou me i “tino fakamaoni ko ‵galo mai i tāgata.” Kae i te Salamo 12:5-7, ne fai mai a ia,
“‘Ona ko tino fakaa‵lofa ko fakasauagina,
Ona ko te mānava fi‵ta o tino ma‵tiva,
Ka tu aka au o fai se faiga,’ ko pati a Ieova.
‘Ka faka‵sao ne au latou mai i tino kolā e fai a faifaiga fakatauemu ki a latou.’
A pati a Ieova e ‵ma pakipaki;
E fai pelā me ne siliva ne faka‵ma i se ogaumu kele, ne faka‵ma fakafitu taimi.
Ka puipui ne koe a latou, e Ieova;
Ka puipui ne koe a latou taki tokotasi mai te kautama tenei ke oko ki te se-gata-mai.”
E fakamatala mai i te fuaiupu e 5 a pati a Ieova e uiga ki “tino fakaa‵lofa.” Ka faka‵sao ne ia latou.
E fakaopoopo mai te fuaiupu 6 me i “pati a Ieova e ‵ma pakipaki,” “e fai pelā me ne siliva ne faka‵ma.” E fakaasi mai i konei a lagonaga kolā e maua ne Kelisiano tukugina atu.—Sala. 18:30; 119:140.
Mafaufau ki te suā fuaiupu, Salamo 12:7: “Ka puipui ne koe a latou, e Ieova; ka puipui ne koe a latou taki tokotasi mai te kautama tenei ke oko ki te se-gata-mai.” Se a te mea e fakasino atu ki ei a te pati “latou”?
Ona ko te fuaiupu e 7 e vau mai tua o te tugapati, “pati a Ieova,” kāti e fakaiku aka ne nisi tino me i te pati “latou” e fakasino atu ki pati a te Atua. Kae e iloa ne tatou me ne puipui ne te Atua a te Tusi Tapu faitalia a taumafaiga e uke a tino ‵teke ke taofi io me fakaseai atu.—Isa. 40:8; 1 Pe. 1:25.
Kae ko pati i te fuaiupu e 5 me e puipui ne Ieova a tino, e ‵tonu foki. A Ieova ne fesoasoani kae ka tumau eiloa a ia i te fai penā kae faka‵sao a “tino fakaa‵lofa” mo tino “puapuaga.”—Iopu 36:15; Sala. 6:4; 31:1, 2; 54:7; 145:20.
Tela la, se a te mea e fakasino atu ki ei a te pati “latou” i te fuaiupu 7?
E fakaasi mai i te fakamatalaga a te faisalamo tenei me e fakasino atu a te pati “latou” ki tino.
I te kamataga o te Salamo 12:1, ne faipati a Tavita e uiga ki “tino fakamaoni” kolā ne fakaloiloigina ne tino ma‵sei. Ki tua ifo, e maua ne tatou se fakamatalaga me ka taua atu a Ieova ki a latou kolā e fakaaoga ‵se olotou alelo. E fakatalitonu mai a te faisalamo me e mafai o tali‵tonu tatou me ka gasue a te Atua o taua mō ana tino me i ana pati e ‵ma pakipaki.
Tela la, e fai mai te fuaiupu e 7 me ka leoleo kae puipui ne Ieova a “latou,” telā ko tino fakaa‵lofa kolā e fakalogo‵mae ne tino ma‵sei.
A te pati “latou” i te fuaiupu tenei ne ‵fuli mai i tusitusiga i te ‵gana Epelu. A te pati “tatou” ne fakaaoga fakalua taimi i te fuaiupu e 7 i te Septuagint i te ‵gana Eleni. Tela la, e fakasino atu eiloa te mea tenā ki tino fakamaoni kolā ne fakaa‵lofa kae puapuaga. Kae fai mai te fuaiupu e 7 me i tino fakamaoni “taki tokotasi” konā ka puipui “mai te kautama tenei,” ko tāgata kolā e fakamalosi aka ne latou a faifaiga matagā. (Sala. 12:7, 8) Tenei te ‵fuliga o te fuaiupu e 7 i Tusitusiga Epelu i te ‵gana Alamaika: “TE ALIKI, ka puipui ne koe a tino amio‵tonu, ka leoleo ne koe latou mai te kautama masei tenei ke oko ki te se-gata-mai. A tino amio ma‵sei e sa‵sale valevale fua, e pelā me ne tamā manu kolā e ‵miti ne latou a toto o tama a tāgata.” A te fakamatalaga tenei se suā fakamaoniga me e se fakasino atu a pati i te Salamo 12:7 ki pati a te Atua.
Tela la, e fakamatala mai i te fuaiupu tenei me ka gasuesue eiloa te Atua mō ana “tino fakamaoni.”