‵Sala Ki Fakamatalaga ‵Tonu

Te Mafuaga o te Fakalavelave

A te fakailoga tino e masani o fakamāfua aka ne fakamatalaga sē ‵tonu. Ke onoono ki fakaakoakoga konei:

A nisi tino kolā e fakaga‵lue ne latou a tino, e faka‵se ne te mafaufauga tenei me i fāfine e se mafai ne latou o ga‵lue i galuega fakasaienisi io me ko galuega tau masini.
I Eulopa i aso mua, ne fai a ‵losiga ‵se me i tino Iutaia ne fakapoisini ne latou a vaikeli kae faka‵pisi ne latou a ma‵saki. I te taimi ne pule mai ei te kau Nazi, ne toe taku fakamasei foki a tino Iutaia. Kae i te taimi nei, ne fai a ‵losiga me ko latou ne māfua mai ei te fakalavelave i mea tau tupe i Siamani. Ne iku atu a mea konā ki te lasi o te fakailoga tino o tino ki tino Iutaia, kae koi mafai o lavea atu a te mea tenā i aso nei.
E mafau‵fau a te tokoukega o tino me i tino kolā e se katoatoa e se ti fia‵fia kae mata kaitāua.

A tino kolā e tali‵tonu ki manatu ‵se penā e mafai o fakasino atu latou ki fakamaoniga kolā e mafai o ‵lago atu ki te lotou fakailoga tino. Kae mafau‵fau latou me i so se tino telā e se ‵lago ki a latou e fakavalevale.

Fakatakitakiga i te Tusi Tapu

“A te tino telā e seai se iloaga i ei e se ‵lei.”—FAATAOTO 19:2.

Se a tena uiga? Ka fai ne tatou a fakaikuga sē ‵lei māfai e se iloa a fakamatalaga ‵tonu. Kafai e tali‵tonu tatou ki fakamatalaga sē ‵tonu i lō fakamatalaga ‵tonu, ka mafai o maua ne tatou se kilokiloga sē ‵lei ki tino.

Te Aoga ke Maua a Fakamatalaga ‵Tonu

Kafai e maua ne tatou a fakamatalaga ‵tonu e uiga ki tino, ka fai ei ke mo a e tali‵tonu vave tatou ki fakamatalaga sē ‵tonu e uiga ki a latou. Kae kafai ko iloa ne tatou me e ‵se a fakamatalaga kolā ne maua ne tatou e uiga ki se potukau, ka fai ei ke fakalotolotolua tatou ki fakamatalaga kolā ko oti ne iloa ne tatou e uiga ki nisi potukau o tino.

Se Tala Tonu: Jovica (Fenua o te Balkan)

A Jovica telā ne sae mai i te fakasologa o mataupu konei ne lagona sāle ne ia a lipoti sē ‵lei e uiga ki se potukau foliki, mai i tino o tena fenua, tala, mo polokalame i televise. “Ne fai ei ke fakailoga tino au kae takalialia ki tino konā,” ko ana pati. “Kae ne mafaufau au me ‵tonu eiloa oku lagonaga i te feitu tenei.

“Kae i te taimi ne nofo au i te kautau, ne ga‵lue fakatasi au mo sotia mai te potukau foliki tenā. Fakamuli ifo, ne uke aku mea ne tauloto e uiga ki a latou. Ne kamata foki o tauloto au ki te lotou ‵gana kae fakalogologo ki olotou pese. Ne kamata o fiafia au ki a latou kae ne ‵kese foki taku kilokiloga ki a latou. Kae ui ei e mafai eiloa o toe ‵sae aka a lagonaga fakailoga tino. Tela la, ne kalo kea‵tea au mai tala sē ‵lei e uiga ki te potukau tenā. E se gata i ei, e se onoono foki au ki ata io me ne mea fa‵kata kolā e fakamasei ei a latou. E iloa ne au me i lagonaga fakailoga tino e mafai o iku atu ki te kaitaua mo te takalialia.”

Mea e Mafai ne Koe o Fai

Masaua me i fakamatalaga sē ‵tonu e uiga ki potukau o tino e se fakauiga i ei me fai katoa penā a tino i te potukau tenā.
Ke fakaasi atu me i fakamatalaga kolā e iloa ne koe e uiga ki nisi tino e se katoatoa.
Taumafai ke maua a fakamatalaga ‵tonu mai se koga io me se tino telā e fakatalitonugina.