Auala ke Lotomalie ki Mea ko Maua
A tatou katoa—faitalia me e ‵nofo taka io me ko oti ne a‵vaga, koi talavou io me ko ma‵tua—e ma‵nako ke fia‵fia kae ke lotoma‵lie ki mea ko maua. E manako foki te ‵tou Mafuaga ke penā tatou, tela la, ne tuku mai ne ia a toe manatu fakatonutonu aoga mō tatou.
Ke Ga‵lue Malosi
“Ke galue malosi a ia, ke fai ne ia a galuega ‵lei ki ana lima, ko te mea ke isi se mea e tuku atu ne ia ki se tino telā e manako ki se mea.”—EFESO 4:28.
E fakamalosi mai te ‵tou Mafuaga ke maua ne tatou se kilokiloga ‵lei ki galuega. Kaia? E fiafia a te tino galue malosi me e mafai o tausi atu ki a ia eiloa mo tena kāiga. E mafai foki o fesoasoani atu a ia ki se tino fakaalofa. Ka fakatāua foki a ia ne tena pule i te galuega. Tela la, e mafai eiloa o faigata ke fakamalōlō se tino galue malosi mai i tena galuega. E fakamatala tonu mai i te Tusi Tapu me i te taui o te galue ‵mafa ko “te meaalofa mai i te Atua.”—Failauga 3:13.
Ke Fakamaoni
“Me tali‵tonu matou me ko maua ne matou se loto lagona ‵ma, kae e ma‵nako matou ke fakamaoni i mea katoa e fai ne matou.”—EPELU 13:18.
Kafai e fakamaoni tatou, ka maua ne tatou a lagonaga āva, te filemu o te mafaufau, kae moe ‵lei foki i te po. E se gata i ei, ka tali‵tonu kae āva mai a nisi tino ki a tatou. E se maua ne tino sē fakamaoni a mea ‵lei konā. E mafai foki o se ‵lei olotou loto lagona, kae ka ola latou mo te ma‵taku i a latou ma ‵poa aka i se aso, ona ko te lotou sē fakamaoni.
Ke Maua se Kilokiloga Paleni ki Tupe
“Ke ‵kalo kea‵tea mai te fia‵fai ki tupe i otou olaga, kae ke lotoma‵lie ki mea ko maua ne koutou.”—EPELU 13:5.
E ma‵nako tatou ki tupe ke ‵togi ki ei a mea‵kai mo nisi mea aka. Kae ko “te fiafai ki tupe” e fakamataku ‵ki eiloa. E mafai o fai ei se tino ke fakamāumāu ana taimi mo tena malosi ke maua a tupe e uke. A te manako malosi ki tupe e mafai o fai ei ke se ‵lei tena olaga avaga, ke se lava ana taimi mo ana tama‵liki, kae e mafai foki o masaki a ia. (1 Timoteo 6:9, 10) E se gata i ei, a te fiafai ki tupe e mafai o tofotofo aka ei se tino ke se fakamaoni. Ne fai mai se tagata poto: “A te tagata fakamaoni ka maua ne ia a fakamanuiaga e uke, kae ko te tino e manako ke maumea vave a ia ka se tumau i te ‵ma.”—Faataoto 28:20.
Filifili te ‵Toe Akoakoga ‵Lei
“Taofi ‵mau ki te poto mo te malosi o te mafaufau.”—FAATAOTO 3:21.
A te akoakoga ‵lei e fesoasoani mai ke fai tatou pelā me ne tino fakamaoni mo mātua ‵lei. Kae ko akoakoga ‵lei a te malo e se mafai o maua i ei a te tokagamalie io me ko te fiafia tonu. Ko te mea ke manuia tonu tatou i vaega katoa o te olaga, e manakogina ne tatou a te akoakoga mai i te Atua. E fai mai te Tusi Tapu e uiga ki te tino telā e fakalogo ki te Atua: “Kae ko mea katoa e fai ne ia ka manuia eiloa.”—Salamo 1:1-3.