E Mafai Eiloa o Poto Koe
“A Tusitusiga Tapu katoa ne māfua mai i te Atua.” (2 Timoteo 3:16) I te fuaiupu tenei a te pati “māfua,” e fakauiga i ei me ne tuku atu ne te Atua Malosi Katoatoa ana manatu ki mafaufau o tino ne tusi ne latou te Tusi Tapu.
E ‵Kami Koe ne te Atua ke Maua a Mea Aoga Mai Tena Poto
“Au, Ieova, ko tou Atua . . . e akoako ne ia koe ke ‵lei koe, ko te Atua telā e takitaki ne ia koe ki te auala e ‵tau o sasale ei koe. Moi ne fakalogo mai eiloa koe ki aku fakatonuga! A tou filemu ka fai eiloa e pelā me se vaitafe kae ko tou amiotonu e pelā mo galu o te tai.”—ISAIA 48:17, 18.
Kilo atu ki pati konā e pelā me ko tou ‵kamiga totino mai te Atua. E manako a ia ke maua ne koe a lagonaga filemu mo te fiafia tonu, kae e mafai o fesoasoani atu a ia ke maua ne koe a mea konā.
E Mafai Eiloa o Maua ne Koe te Poto o te Atua
“E ‵tau foki o talai muamua atu te tala ‵lei ki atufenua katoa.”—MALEKO 13:10.
E aofia i te “tala ‵lei” tenei, a folafolaga a Ieova ke fakagata a logo‵maega, ke fai te lalolagi mo fai se palataiso, kae ke toe faka‵tu mai ki te ola a ‵tou tino pele kolā ko oti ne ‵mate. E talai atu ne Molimau a Ieova a te fekau tenā mai te Tusi Tapu i te lalolagi kātoa.