SE LALOLAGI E ‵FONU I FAKALAVELAVE

3 | Fakamalosi Aka a Va Fealofani

TE POGAI E TĀUA EI

Kafai ko gasolo aka o ma‵sei atu a fakalavelave i te lalolagi, e talia ne tino e tokouke e aunoa mo te iloa atu ke fakamasei olotou va fealofani mo nisi tino.

E ‵vae keatea ne tino a latou eiloa mai i olotou taugasoa.
Ko gasolo taua sāle a taki tauavaga.
Ko ‵saga malie atu io me se fia ‵saga atu a mātua ki mea e manava‵se ki ei olotou tama‵liki.

Mea e ‵Tau o Iloa ne Koe

E aoga ‵ki a taugasoa ki tou ola ‵lei mo te malosi, kae maise eiloa i taimi faiga‵ta.
A te fi‵ta telā e māfua mai i fakalavelave i te lalolagi e mafai o tofotofo aka ei tou olaga avaga i auala e seki fakamoemoegina.
A lipoti o tala sē ‵lei e mafai o pokotia masei i ei au tama‵liki i lō te mea e iloa ne koe.

Mea e Mafai ne Koe o Fai Nei

E fai mai te Tusi Tapu: “A te taugasoa tonu e fakaasi atu ne ia te alofa i taimi katoa kae fai pelā me se taina ne fanau mai mō taimi o te puapuaga.”—Faataoto 17:17.

Mafaufau ki se tino telā e ‵lago mai kae mafai o tuku mai a manatu aoga. A te iloa atu me e isi se tino e atafai mai, e mafai o fakamalosi aka tau fakaikuga ke fakafesagai atu ki mea faiga‵ta i te aso.

MEA E MAFAI O FAI—Manatu Fesoasoani

I taimi o fakalavelave, fakamalosi aka a va fealofani, mai te faiga o mea aoga konei

FAKAMALOSI AKA TOU OLAGA FAKATAUAVAGA

Fakamalosi aka tou olaga fakatauavaga

E fai mai te Tusi Tapu: “E ‵lei atu te tokolua i lō te tokotasi . . . Me kafai e siga se tokotasi i a lāua, e mafai o fesoasoani atu te suā tino o fakatu a ia.” (Failauga 4:9, 10) E ‵tau o fai a tauavaga e pelā me se pailate mo te pailate fesoasoani telā e tasi te koga e eva atu lāua ki ei, kae e se pelā mo tieti e lua kolā e fakatau taua.

Fakaiku aka ke se fakaasi atu te kaitaua māfai ko fi‵ta. E aoga ‵ki eiloa a te kufaki mo te fa‵ki i te feitu tenei.
E mafai ne koulua o sau‵tala fakatasi i te vaiaso e uiga ki lua fakalavelave. Masaua ke ‵teke atu ki te fakalavelave—kae e se ki te suā tino.
Fakaavanoa a taimi ke fai fakatasi a mea e fia‵fia koulua tokolua ki ei.
Mafaufau ki taimi ‵lei ne fai fakatasi ne koulua a nisi mea, kāti mai te ‵toe onoono ki ata o te lua fakaipoipoga io me ko ata o nisi taimi ‵gali.

“E mafai o se lotoma‵lie se tauavaga ki mea katoa, kae e se fakauiga i ei me e se mafai o ga‵lue tasi lāua e pelā me se tīmū. E mafai o fai ne te tauavaga se fakaikuga kae ga‵lue fakatasi foki lāua ke fakataunu.”—David.

FAKATUMAU A FESOKOTAKIGA MO TAUGASOA

Fakatumau a fesokotakiga mo taugasoa

Kafai ko maua ne koe te fesoasoani mai taugasoa, mafaufau ki auala e mafai o tuku atu ne koe a te fesoasoani. Mai te fakamalosi atu ki nisi tino, e fakamalosi aka foki i ei koe.
Fesokotaki atu ki nai taugasoa i aso takitasi o fesili atu me ‵lei latou.
Fesili atu ki ou taugasoa me ne a olotou mea ne fai ke mafai ei o fa‵ki i mea faiga‵ta kolā e tai ‵pau mo mea ko fepaki mo koe.

“Kafai ko fepaki koe mo nai puapuaga, a taugasoa e fai pelā me ne tino fesoasoani. E mafai o takitaki malie atu ne latou koe i te auala tonu, mai te fakamasaua atu a mea kolā ko oti ne iloa ne koe. E atafai atu a taugasoa ki a koe, kae e iloa foki ne latou me e atafai atu koe ki a latou.”—Nicole.

KE ‵LAGO ATU E PELĀ ME SE MĀTUA

Ke ‵lago atu e pelā me se mātua

E fai mai te Tusi Tapu: “Vave o fakalogo‵logo, kae fakatuai o fai‵pati.” (Iakopo 1:19) Muamua la, e mafai o faigata ke fakaasi atu ne au tama‵liki a mea e ma‵taku kae manava‵se latou ki ei, kae mai te fakalogologo atu mo te kufaki, ka fesoasoani atu koe ke fakaasi mai a mea i olotou loto.

Fakaaoga a fakanofonofoga kolā e faigofie ki au tama‵liki ke fai‵pati atu. E fia‵fia a nisi tama‵liki o fai‵pati māfai ko mānava malie aka kae fai a nisi mea e pelā mo te launi atu i te motoka io me sa‵sale, i lō te saga‵saga fakafesagai atu ki se mātua kae sau‵tala.
Ke fakamautinoa aka me e se tuku faka‵sau atu au tama‵liki ki tala o lipoti sē ‵lei.
Fai atu ki au tama‵liki a mea ko oti ne fai ke fakatumau te ola ‵lei o te kāiga.
Fai a palani mō fakalavelave ‵tupu fakafuasei, kae fakaakoako ki ei mo au tama‵liki.

“Sau‵tala mo au tama‵liki, kae talia ke fakaasi mai olotou lagonaga. Kāti e ‵funa aka olotou lagonaga ma‵taku, manavase, io me kaitaua. Fakailoa atu ki a latou me e penā foki ou lagonaga, mo mea ne fai ne koe i te fakafesagai atu ki lagonaga penā.”—Bethany.