Kaia ko se Āva ei a Tino ki a Latou Eiloa?

TE POGAI E TĀUA EI KE ĀVA KI A TATOU EILOA

• E fakaasi mai i sukesukega ne fai me i tino kolā e manatu fatauva ki a latou eiloa e manava‵se vave, e loto mafatia, kae e se mafai o ‵kai faka‵lei. Kae ka faigofie fua ki a latou ke fakaaoga ‵se a meainu ma‵losi mo vailakau tapu.

• A tino kolā e āva ki a latou eiloa e faigata o fakapau‵pau olotou mea e fai ki nisi tino, kae faigofie ke fakamasani mo tino i olotou tafa kae ati aka a va fakataugasoa ‵pili. I te suā feitu, a tino kolā e se āva ki a latou eiloa e masani o fakamasei ne latou a tino kae fakamakosu ne latou a va fakataugasoa.

• Kafai foki loa ko fe‵paki mo fakalavelave, a tino kolā e āva ki a latou eiloa e tumau i te ma‵losi; e se talia ne latou a tamā fakalavelave ke taofi ei latou mai te kausaki atu ki olotou fakamoemoega. E ‵kese mo tino kolā e se āva ki a latou eiloa, e ‵kilo atu ki tamā fakalavelave e pelā me ne fakalavelave ‵lasi ‵ki eiloa. Ko fai fua i ei ke ‵fiu vave latou.

MEA E MAFAI NE KOE O FAI

Filifili a taugasoa fakamalosi loto. ‵Kau fakatasi mo tino kolā e āva, e ‵saga tonu atu ki mea e ‵lei ei koe, kae fakamalosi ne latou a koe.

Fesoasoani ki nisi tino. Kafai koe alofa kae fai a mea mō nisi tino—e aofia i ei a tino kolā e se mafai o toe fakafoki mai a mea ne fai ne koe mō latou—ka maua eiloa ne koe te fiafia tonu telā e maua mai te tuku atu o mea. Ka fiafia eiloa koe faitalia me seai ne tino e iloa ne latou au galuega ‵lei ne fai.

Fesoasoani ki au tama‵liki ke iloa o āva ki a latou eiloa. Te auala e tasi ke fai penā ko te talia ne koe latou ke faka‵lei olotou fakalavelave i a latou eiloa, ki te mea e mafai ne latou. E fesoasoani atu te mea tenā ke iloa ne tama‵liki o fakafesagai ki tulaga faiga‵ta kae faka‵lei tena fakalavelave. Ka fai ne te mea tenei ke āva malosi latou ki a latou eiloa, kae ka aoga ki a latou māfai ko ma‵tua.

MEA E FAI NE MATOU

A fakatasiga mo te polokalame o akoga faka-te-Tusi Tapu a Molimau a Ieova e fesoasoani atu ki tino ke momea aka te ‵lei o olotou olaga e penā foki mo te lotou āva ki a latou eiloa.

OMOTOU FAKATASIGA I TE VAIASO

I omotou fakatasiga i vaiaso takitasi, e fakalogo‵logo matou ki lāuga kolā e fakavae ki te Tusi Tapu kae aofia sāle i ei a manatu ki te auala ke fakamalosi aka te āva ki a tatou eiloa. E se ‵togi omotou fakatasiga kae e ‵tala fua ki so se tino. I omotou fakatasiga, ka tauloto koe . . .

• ki te auala e tāua koe ki te Atua

• ki te auala ke maua te pogai tonu o te ola

• ki auala ke ati aka va fakataugasoa ‵lei kae ‵pili

Ka fetaui foki koe mo taugasoa ‵tonu kolā e “fakatau amanaia” te suā tino ki te suā tino.—1 Kolinito 12:​25, 26.

Ke iloa a mea e uke atu e uiga ki motou fakatasiga, fano ki te jw.org o onoono ki te vitio ko te Ne a Mea e Fai i se Kingdom Hall?

MOTOU POLOKALAME O SUKESUKEGA KI TE TUSI TAPU

E fai ne matou se polokalame o sau‵talaga faka-te-Tusi Tapu mai te fakaaogaga o te tusi Ke Ola ki te Se-Gata-Mai! E maua i te tusi tenei a tusi fai‵tau tāua, fakamatalaga ma‵nino, fesili aoga, vitio fakamalosi loto, mo ata ‵gali. A te motou polokalame o sukesukega ki te Tusi Tapu e fesoasoani atu ki tino ke āva ki a latou eiloa kae ke momea aka te ‵lei o olotou olaga.

Ke iloa ne koe me aoga pefea ki a koe a te suke‵suke ki te Tusi Tapu mo Molimau a Ieova, fano ki te jw.org o onoono ki te vitio ko te Kaia e ‵Tau ei o Sukesuke ki te Tusi Tapu?