Se Vaegā Meakai Fou

E ILOA ne koe me ne a mea e puke aka ne tino mai te laukele? E fai pelā me ne kati kiona. E ‵kena, kae manifinifi kae māmā. Kae e se ne kiona; se mea e kai.

Kāti ko tasi fua te masina talu mai te taimi ne tiakina ei ne te kau Isalaelu a Aikupito. Ko ‵nofo atu latou i te togāvao. E se uke a mea‵kai e maua i konā, telā ne fāmeo ei a tino, penei: ‘Moi ne tamate eiloa matou ne Ieova i Aikupito. E ‵lei atu i konā me e maua ne matou a mea‵kai katoa kolā e ma‵nako matou ki ei.’

Telā ne fai atu ei a Ieova penei: ‘Ka fai ne au a mea‵kai ke ‵to ifo mai te lagi.’ Kae tenei eiloa te mea ne fai ne Ieova. I te taeaoakaga i te laveaga ne te kau Isalaelu a te mea ‵kena tenei telā ne ‵to ifo, ne fakatau fesilisili ei latou: ‘Se a te mea tenei?’

Ne fai atu a Mose: ‘Tenei te mea‵kai ne tuku mai ne Ieova ki a koutou ke kai i ei.’ Ne fakaigoa ne tino a te mea tenā ki te MANAI. E tami pelā me ne keke mānifi kolā e fai ki hani.

‘E ‵tau o taetae ne koutou ki te mea e mafai ne te tino o kai,’ ne fai atu a Mose ki tino. Tela la, i taeao takitasi ne fai eiloa ne latou a te mea tenei. Kae kafai ko kamata o ‵vela a te la, ne liu vai a manai i luga i te laukele.

Ne fai atu foki a Mose: ‘E seai se tino e ‵tau o tausi ne ia ne manai ki te suā aso.’ Kae e isi ne nāi tino ne seki faka‵logo. E iloa ne koe me se a te mea ne tupu? I te suā taeao ne ‵fonu a manai kolā ne tausi ne latou i ilo, kae ne kamata o ‵pou!

E tasi fua a te aso i te vaiaso telā ne fai atu ei a Ieova ki tino ke fakaluagina a manai kolā e puke mai ne latou. A te aso tenei ko te ono o aso. Kae ne fai atu a Ieova ke tausi a nisi manai mō te suā aso, me ka se fai ne ia ke ‵to ifo ne manai i te fitu o aso. Kafai e tausi ne latou a manai ki te fitu o aso, ko se ‵fonu i ilo kae ko se ‵pou foki! Tenei eiloa a te suā vavega!

A tausaga katoa kolā ne ‵nofo atu ei a te kau Isalaelu i te togāvao, ne fagai eiloa latou ne Ieova ki manai.