Kitiona mo Ana Tāgata e Toko 300

E LAVEA ne koe me se a te mea ko tupu i konei? A tino konei ne tāgata taua katoa o Isalaelu. A tāgata kolā e pu‵nou ki lalo e inu. A te fāmasino ko Kitiona ko te tagata telā e tu pili atu ki a latou. E onoono a ia ki te auala e inu ei latou ki vai.

Onoono faka‵lei ki auala kese‵kese kolā e inu ei a tāgata konā. A nisi tāgata e punou ifo olotou mata ki lalo i te vai. Kae e tokotasi e avaka ne ia a vai ki luga i ana lima, ko te mea ke mafai o kilokilo atu a ia ki mea e ‵tupu i ana tafa. E tāua ‵ki a te mea tenei, me ne fai atu a Ieova ki a Kitiona ke filifili aka fua a tino kolā e tumau i te matapula‵pula i te taimi e inu ei latou. Ako te ‵toega, ne fai atu a te Atua, e ‵tau o uga atu ke ‵foki ki olotou kāiga. Ke onoono aka tatou ki te pogai.

I aso konā ne toe maua ne te kau Isalaelu a fakalavelave e uke. A te pogai o olotou fakalavelave ko te sē faka‵logo o latou ki a Ieova. Ne pule fakasauā te kau Mitiana ki a latou kae ne fakalogo‵mae atu ki a latou. Tela la, ne ‵tagi atu a te kau Isalaelu ki a Ieova mō se fesoasoani, kae ne fakalogo a Ieova ki te lotou tagi.

Ne fai atu a Ieova ki a Kitiona ke fakatoka se kautau, telā ne fakamaopoopo ei ne Kitiona a tāgata taua e toko 32,000. Kae e toko 135,000 tāgata kolā e taua atu ki te kau Isalaelu. Kae ne fai atu a Ieova ki a Kitiona: ‘Ko tō tokouke au tāgata.’ Kaia ne fai atu ei penā a Ieova?

Ona ko te mea kafai ne manumalo a Isalaelu i te taua, kāti ka mafau‵fau latou me ne manumalo latou i a latou eiloa. Kāti ka mafau‵fau latou me e se ma‵nako latou ki te fesoasoani o Ieova ke manumalo ei latou. Telā ne fai atu ei a Ieova ki a Kitiona: ‘Fai atu ki tāgata katoa kolā e ma‵taku, ke toe ‵foki atu ki olotou kāiga.’ I te taimi ne fai ei ne Kitiona a te mea tenei, e toko 22,000 tāgata taua ne toe ‵foki atu ki olotou kāiga. Tenā ne ‵toe mai fua i ei te toko 10,000 tāgata ke taua atu ki sotia katoa e toko 135,000.

Kae fakalogologo mai! Ne fai atu a Ieova: ‘Koi tokouke foki eiloa au tāgata.’ Telā ne fai atu ei a ia ki a Kitiona ke fāinu a tāgata i te vaitafe tenei kae ke uga atu a tino katoa kolā e inu mo olotou mata e ‵fuli ki lalo i te vai. ‘Ka tuku atu ne au a te manumalo ki a koe mo te toko 300 tāgata kolā ne tumau i te matapula‵pula i te taimi koi inu ei latou,’ ko te folafolaga a Ieova.

Ne oko mai a te taimi mō te taua. Ne fakatoka ne Kitiona ana tāgata e toko 300 ki potukau e tolu. Ne tuku atu ne ia ki tāgata takitasi se pu, mo se tiā fakatasi mo se molī i loto i ei. I te valuāpo ko maopoopo fakatāmilo latou katoa i te koga e ‵nofo i ei a sotia o te fili. Kae i te taimi foki eiloa tenā, ne faka‵tagi ne latou olotou pu katoa kae ‵foa olotou tiā, kae ka‵laga atu penei: ‘Te pelu a Ieova mo te pelu a Kitiona!’ I te taimi ne ala aka ei a sotia a te kau o te fili, ko ‵numi valevale latou kae ma‵taku. Ne kamata latou o ‵tele, kae ne manumalo a te kau Isalaelu i te taua.