Te ‵Toe Tupu ‵Lei o Isalaelu

KO VALU fua tausaga o Iosia i te taimi ne fai ei a ia mo tupu o matakāiga e lua o Isalaelu i te feitu ki saute. Ko oko eiloa i te foliki ke fai a ia mo fai te tupu. Tela la, i te kamataga o tena pulega ne fesoasoani atu ki a ia a tino ma‵tua ke pule atu ki te fenua.

I te taimi ko oti ei ne fai a Iosia mo tupu mō tausaga e fitu ne kamata o ‵sala atu a ia ki a Ieova. Ne tautali atu a ia ki fakaakoakoga a tupu ‵lei pelā mo Tavita, Iosefatu, mo Hesekia. A koi talavou faeloa a ia, ne fai ne ia se faiga loto toa.

Mō se taimi leva ne ma‵sei ‵ki eiloa a te tokoukega o tino Isalaelu. Ne tapuaki latou ki atua ‵se. Ne ifo latou ki tupua. Tela la, ne olo atu a Iosia mo ana tāgata kae ne kamata o ave kea‵tea a tapuakiga ‵se mai te fenua. A te mea tenei se galuega lasi ona ko te tokouke o tino ne tapuaki ki atua ‵se. E mafai o lavea ne koe a Iosia mo ana tāgata e ofa ne latou ki lalo a tupua.

Mai tua ifo i konā, ne tuku atu ne Iosia a tāgata e tokotolu ke pule i te fakafouga o te faletapu o Ieova. Ne taetae mai a tupe mai tino kae tuku atu ki tāgata konei ke ‵togi a mea mō te galuega telā e ‵tau o fai. A koi ga‵lue latou i te faletapu, ne maua ne te faitaulaga sili ko Hilikia se mea tāua i konā. Ko te tusi eiloa o tulafono telā ne fai atu ei a Ieova ki a Mose ke tusi i se taimi leva ‵ki. Ne galo atu a te mea tenā mō tausaga e uke.

Ne avatu a te tusi ki a Iosia, kae ne fakamolemole atu a ia ke faitau atu te tusi ki a ia. A koi fakalogologo a ia, ne mafai o maina ‵lei Iosia me ne seki tausi ne tino a tulafono a Ieova. Ne fanoanoa malosi a ia e uiga ki te mea tenei, telā ne ‵sae ei ne ia ana gatu, e pelā mo te mea e lavea ne koe i konei. Ana muna: ‘Ko kaitaua a Ieova ki a tatou, ona ko ‵tou tupuna ne seki tausi ki tulafono kolā e tusi i te tusi tenei.’

Ne fakatonu atu a Iosia ki a Hilikia ke ‵sala aka me se a te mea ka fai ne Ieova ki a latou. Ne fanatu a Hilikia ki te fafine ko Hulita, se pelofeta fafine, kae ne fesili atu ki a ia. Ne tuku atu ne ia a te fekau tenei mai i a Ieova ke avatu ki a Iosia: ‘A Ielusalema mo tino katoa ka fakasala ona ko te mea ko oti ne tapuaki atu latou ki atua ‵se kae ko leva ne ‵fonu te fenua i mea ma‵sei. Kae ona ko koe, e Iosia, ko oti ne fai ne koe a mea ‵lei, ka se fakaoko atu a te fakasalaga tenei ke oko ki te taimi e mate ei koe.’