Ko Tiakina ne Tino o te Atua a Papelonia

KO TAI kātoa te lua tausaga ko ‵teka talu mai te taimi ne fakatakavale ei a Papelonia ne Metai mo Pelesia. Kae kiloke ki te mea ko tupu nei! Ao, ko tiakina ne te kau Isalaelu a Papelonia. Ne saoloto pefea latou? Ko oi ne talia ne ia latou ke olo?

A Kulesa, te tupu o Pelesia, ne talia ne ia. I se taimi leva ‵ki eiloa a koi tuai o fanau mai a Kulesa, ne fai ne Ieova tena pelofeta ko Isaia ke tusi mai e uiga ki a ia: ‘Ka fai eiloa ne koe a mea kolā e manako au ke fai ne koe. Ka tuku eiloa a mataloa ke ma‵tala atu ki a koe ke fakatakavale a te fa‵kai.’ Kae ne takitaki eiloa ne Kulesa a te fakatakavalega o Papelonia. A te kau Metai mo te kau Pelesia ne ulu atu ki loto i te fa‵kai i te po e auala i mataloa kolā ne tiaki ke ma‵tala.

Kae ne fai atu foki a te pelofeta a Ieova ko Isaia me ka avatu ne Kulesa a te fakatonuga ke toe ati aka a Ielusalema mo tena faletapu. E mata, ne tuku atu ne Kulesa a te fakatonuga tenei? Ao, ne fai eiloa ne ia. Konei eiloa a pati ne fai ne Kulesa ki te kau Isalaelu: ‘Olo nei, ki Ielusalema kae toe faite a te faletapu o Ieova, te otou Atua.’ Kae tenei eiloa te mea ko olo atu ei a te kau Isalaelu ke fai ne latou.

Kae e se ko tino Isalaelu katoa i Papelonia ne mafai o fai ne latou a te malaga ‵mao ki Ielusalema. Se malaga ‵mao ‵ki e tusa mo te 500 maila (800 kilomita) kae e tokouke a tino ko tō ma‵tua io me ko tō ma‵saki ke faima‵laga ‵mao atu. Kae e isi aka foki ne nisi pogai ne seki olo atu ei a nisi tino. Kae ne fai atu a Kulesa ki tino kolā ne seki olo atu: ‘Tuku atu a siliva mo aulo mo nisi meaalofa ki tino kolā ka toe ‵foki atu o toe ati aka a Ielusalema mo tena faletapu.’

Tela la, ne uke ‵ki a meaalofa ne avatu ki te kau Isalaelu kolā ne olo atu i te lotou auala ki Ielusalema. Ne avatu foki ne Kulesa a pōla mo ipu kolā ne puke mai ne te tupu ko Nepukanesa mai te faletapu o Ieova i te taimi ne fakamasei ei ne ia a Ielusalema. Ne uke ‵ki eiloa a mea ne ‵tau o ave ne latou.

Kāti mai tua ifo o te fa masina ne faima‵laga atu ei, ne oko atu a te kau Isalaelu ki Ielusalema i te taimi tonu. Ko te 70 tausaga talu mai te taimi ne fakamasei ei a te fa‵kai, kae e seai se tino e nofo i te fenua. Kae e tiga eiloa ko toe ‵foki mai a te kau Isalaelu ki te lotou fenua, ne fe‵paki eiloa latou mo nisi taimi faiga‵ta, pelā mo te mea ka lavea ne tatou.