Ne Akoako Atu a Iesu i Luga i se Mauga

KILO atu ki a Iesu e sagasaga i konei. E akoako ne ia a tino katoa konei i luga i se mauga i Kalilaia. A tino kolā e saga‵saga pili atu ki a ia ko ana soko. Ko oti ne filifili ne ia a te toko 12 o latou ke fai mo apositolo. A apositolo ko soko fakapito o Iesu. E iloa ne koe olotou igoa?

Ko Simona Petelu mo tena taina ko Anitelea. Ko Iakopo mo Ioane, se tautaina foki. A te suā apositolo e fakaigoa foki ki a Iakopo, mo te suā tino e fakaigoa foki ki a Simona. E tokolua apositolo e fakaigoa ki a Iuta. E tokotasi ko Iuta te Isikaliota, kae ko te suā Iuta e fakaigoa foki ki a Tataio. Ko Filipo mo Natanielu (e fakaigoa foki ki a Patolomaio), mo Mataio mo Toma.

Mai tua ifo o tena fokimaiga mai Samalia, ne fatoā kamata o talai atu a Iesu: ‘Ko pili mai a te Malo o te lagi.’ E iloa ne koe me se a te Malo tenā? Se pulega tonu a te Atua. A Iesu ko te tupu i ei. Ka pule a ia mai te lagi kae ka aumai ne ia a te filemu ki te lalolagi. Ka fai ne te Malo o te Atua a te lalolagi kātoa mo fai se palataiso gali.

Ne nofo atu a Iesu i konei o akoako a tino e uiga ki te Malo. ‘Tenei eiloa te auala e ‵tau o ‵talo atu ei koutou,’ ne fakamatala atu tou tagata. ‘Te motou Tamana telā i te lagi, ke tapu tou igoa. Ke oko mai tou Malo. Ke fai te mea e loto koe ki ei i lalo nei, e pelā mo te faiga i te lagi.’ E tokouke a tino e fakaigoa ne latou a te ‵talo tenei ko ‘Te ‵Talo a te Aliki.’ E fakaigoa ne nisi tino ki ‘Te Motou Tamana.’ E mafai ne koe o fai a te ‵talo kātoa?

Ne akoako atu foki ne Iesu a tino ki te auala e ‵tau ei o fai olotou faifaiga, te suā tino ki te suā tino. ‘Fai ne koe ki nisi tino a mea kolā e manako koe ke fai atu ne latou ki a koe,’ ko ana muna. E mata, e se tenā te mea e fiafia koe ki ei māfai e atafai atu a nisi tino ki a koe? Tela la, ne fai atu a Iesu, me e ‵tau mo tatou o fakaasi atu te atafai ki nisi tino. Ka gali ‵ki eiloa i te lalolagi palataiso māfai ko fai ne tino katoa a te mea tenei, i ne?