E Alofa a Ia ki Tamā Tama‵liki

KILO atu ki a Iesu i konei, e kopi ne ia te tamaliki tagata. E mafai o lavea ne koe me atafai tonu eiloa a Iesu ki tamā tamaliki. A tāgata kolā e onoono atu ki ei ko ana apositolo. Ne a pati e fai atu ne Iesu ki a latou? Ke onoono aka tatou.

Ne fatoā ‵foki mai a Iesu mo ana apositolo mai i se malaga loa. I te lotou auala ne fai ne apositolo se kinauga i a latou eiloa. Tela la, mai tua o te malaga ne fesili atu ei a Iesu ki a latou: ‘Se a te mea ne kinau ei koutou i te auala?’ A te tonuga loa, e iloa ne Iesu a te mea ne kinau latou ki ei. Kae ne ‵sili atu ne ia a te fesili ke iloa aka me ka fakaasi atu ne apositolo te mea tenā ki a ia me ikai.

Ne seki tali atu a apositolo, me ne kinau latou i te auala me ko oi te ‵toe tino e sili i a latou. Ne ma‵nako a nisi apositolo ke sili atu te lotou tāua i lō nisi apositolo. Ka fai atu pefea ne Iesu me e se ‵tau o fia fai latou mo fai te ‵toe tino sili?

Ne fai atu a ia ki te tamā tamaliki ke vau, kae ne fakatu a ia i mua o latou katoa. Telā ne fai atu ei a ia ki ana soko: ‘E manako au ke iloa tonu eiloa ne koutou a te mea tenei, Ka se mafai ne koutou o ulu atu ki loto i te Malo o te Atua seiloga ke ‵fuli koutou kae fai pelā mo te tamā tamaliki tenei. A te tino sili i te malo ko te tino telā e fai pelā mo te tamaliki tenei.’ E mata, e iloa ne koe me kaia ne fai atu ei ne Iesu a te mea tenei?

Ia, a tamā tama‵liki e se fia sili latou io me se fia fai ke tāua atu latou i lō nisi tino. Tela la, e ‵tau o tau‵loto a apositolo ke fai pelā mo tama‵liki i te feitu tenei kae ke se kinau e uiga ki te sili io me ko te tāua.

E isi aka foki a nisi taimi, ne fakaasi atu ei ne Iesu a te lasi o tena atafai mō tamā tama‵liki. I nāi masina mai tua ifo ne aumai ne tino olotou tama‵liki ke fetaui mo Iesu. Ne taumafai a apositolo ke taofi latou mai i a Iesu. Kae ne fai atu a Iesu ki ana apositolo: ‘Tuku mai tama‵liki ke o‵mai ki a au, kae sa taofigina latou, me e o tino penei a te Malo o te Atua.’ Telā ne puke mai ei ne Iesu a tama‵liki ki ana lima, kae ne fakamanuia ne ia a latou. E mata, e se se mea gali ke iloa atu me e alofa a Iesu ki tamā tama‵liki?