Ko Āsi Atu a Petelu ki a Konelio

TENĀ eiloa te apositolo ko Petelu e tu i konā, kae ko nisi tino konā ko ana taugasoa kolā e ‵tu mai i ana tua. Kae kaia e ifo atu ei a te tagata tenā ki a Petelu? E mata, e ‵tau o fai ne ia a te mea tenā? E iloa ne koe me ko oi a ia?

A te tagata tenā ko Konelio. A ia se ofisa o kautau Loma. Ne seki masani a Konelio mo Petelu, kae ne fai atu ki a ia ke ‵kami mai tou tagata ki tena fale. Ke onoono aka tatou me ne tupu pefea a te mea tenei.

A soko muamua o Iesu ne tino Iutaia, kae ko Konelio e se se tino Iutaia. Kae ne alofa a ia ki te Atua, e ‵talo atu a ia ki te Atua, kae ne fai ne ia a mea ‵lei e uke mō tino. Ia, i te afiafi e tasi ne fakasae atu se agelu ki a ia kae ne fai atu penei: ‘Ko fiafia te Atua ki a koe, kae ka tali mai ne ia au ‵talo. Uga atu nisi tāgata ke aumai te tagata e igoa ki a Petelu. E nofo a ia i Iopa i te fale o Simona, telā e tu i tafa o te tai.’

Ia, i konā foki eiloa ne uga atu ei ne Konelio nisi tāgata ke ‵sala atu ki a Petelu. I te suā aso, i te taimi ko pilipili atu ei a tāgata ki Iopa, ne nofo atu a Petelu i luga i te tuāfale pāpā o te fale o Simona. I konā ne fai ei ne te Atua ke mafaufau a Petelu me e lavea ne ia se laugatu lasi e fanaifo mai te lagi. I loto i te laugatu ko vaegā manu kese‵kese katoa. E ‵tusa eiloa mo te tulafono a te Atua, a manu konei ne lai‵lai ma kai ki ei, kae ne fai mai se leo penei: ‘Tu ki luga, Petelu. Tamate kae kai.’

‘Ikai!’ ne tali atu a Petelu. ‘Ne seki kai aka eiloa au ki mea kolā e se ‵mā.’ Kae ne fai atu a te leo ki a Petelu: ‘Fakagata a te taku fakalai‵lai o mea kolā ko fai mai nei a te Atua me e ‵mā.’ Ne tupu a te mea tenei fakatolu taimi. A koi mafaufau a Petelu me se a te uiga o mea katoa konei, ne oko atu a tāgata kolā ne uga atu ne Konelio ki te fale kae ne fesili atu e uiga ki a Petelu.

Ne fanaifo a Petelu ki lalo kae ne fai atu: ‘Au ko te tagata telā e salasala koutou ki ei. Kaia ne o‵mai ei koutou?’ I te taimi ne fakamatala atu ei ne tāgata me ne fai atu se agelu ki a Konelio ke ‵kami mai a Petelu ki tena fale, ne talia ne Petelu ke olo latou. I te suā aso ne olo atu ei a Petelu mo ana taugasoa o āsi ki a Konelio i Kaisaleia.

Ko oti ne fakamaopoopo fakatasi ne Konelio ana kāiga mo ana taugasoa pele. I te taimi ne oko atu ei a Petelu, ne fakafetaui atu a Konelio ki a ia. Ne fakasiga ifo a ia ki lalo kae ifo atu ki vae o Petelu, e pelā mo te mea e lavea ne koe i konei. Kae ne fai atu a Petelu: ‘Tu ki luga; Au se tagata ola fua.’ E tonu, e fakaasi mai ne te Tusi Tapu me e se ‵tau o ifo kae tapuaki atu ki se tagata. E ‵tau fua mo tatou o tapuaki atu ki a Ieova.

I konā ne talai atu ei a Petelu ki tino kolā ne maopoopo mai. ‘Ko lavea ne au me e talia ne te Atua a tino katoa kolā e ma‵nako ke tavini atu ki a ia,’ ne fai atu a Petelu. Kae koi faipati atu a ia, ne ligi ifo ne te Atua tena agaga tapu, kae ne kamata o fai‵pati a tino ki ‵gana kese‵kese. Ne ‵poi a ‵soko Iutaia kolā ne o‵mai mo Petelu i te mea tenei, ona ko te mea ne mafau‵fau latou me e fiafia fua a te Atua ki tino Iutaia. Tela la, ne akoako atu ne te mea tenei ki a latou me i te Atua e se kilo atu ki tino o so se matakāiga e pelā me e ‵lei atu io me e tāua atu ki te Atua i lō tino o te suā matakāiga. Se mea gali a te mea tenā ke masaua ne tatou katoa, i ne?