Timoteo—Ko te Tino Fesoasoani Fou ki a Paulo

A TE tamataene telā e lavea ne koe i konei mo te apositolo ko Paulo ko Timoteo. Ne ‵nofo fakatasi a Timoteo mo tena kāiga i Lusa. Tena mātua ko Eunike mo tena tupuna fafine ko Loise.

A te taimi tenei ko te tolu o taimi ne āsi atu ei a Paulo ki Lusa. Kāti se tausaga io me se taimi penā mai mua atu i ei, ne olo atu a Paulo mo Panapa ki konā i te taimi muamua i se malaga talai. Kae i te taimi tenei ko oti ne ‵foki mai a Paulo mo tena taugasoa ko Sila.

E iloa ne koe me ne a pati e fai atu ne Paulo ki a Timoteo? Ne fesili atu a ia: ‘E fiafia koe o kau mai ki a maua mo Sila? E mafai o fakaaogā ne maua tou fesoasoani i te talai atu ki tino kolā e ‵nofo i koga ‵mao.’

‘Ao,’ ne tali atu a Timoteo, ‘E fiafia au o fano.’ Tela la, mai tua malie ifo i ei, ne tiakina ne Timoteo tena kāiga kae ne olo atu mo Paulo mo Sila. Kae koi tuai o tau‵loto tatou e uiga ki te lotou malaga, ke onoono aka tatou me ne a mea ne ‵tupu ki a Paulo. Ko nofo pelā ki se 17 tausaga talu mai te taimi ne fakasae atu ei a Iesu ki a ia i te auala ki Tamaseko.

Masaua, ne fanatu a Paulo ki Tamaseko ke fakasauā atu ki soko o Iesu, kae mai tua ifo ne fai eiloa a ia mo fai se soko! Fakamuli ifo ne fakatoka a nisi fili ke tamate a Paulo me ne seki fia‵fia latou ki ana akoakoga e uiga ki a Iesu. Kae ne fesoasoani atu a soko ki a Paulo ke sao a ia. Ne tuku ne latou a ia ki loto i se ato kae ne tukutuku ifo ne latou a ia ki lalo mai tua o te ‵pui o te fa‵kai.

Mai tua ifo i konā ne fanatu a Paulo ki Anitioka ke talai i ei. I konā eiloa ne fatoā fakaigoa ei a soko o Iesu ki Kelisiano i te taimi muamua. Fakamuli ifo ne uga atu ei a Paulo mo Panapa mai Anitioka i se malaga talai ki fenua kolā e ‵mao atu. E tasi te fa‵kai ne āsi atu laua ki ei ko Lusa, ko te koga ne nofo i ei a Timoteo.

Kāti i se tausaga e tasi mai tua ifo i ei, ne toe foki atu a Paulo ki Lusa i te lua o ana malaga. I te taimi ne olo ei a Timoteo mo Paulo mo Sila, e iloa ne koe me ne olo latou ki fea? Kilo atu ki te mape, kae ke tau‵loto tatou ki nisi koga.

Muamua la, ne olo atu latou ki se fa‵kai pili mai ko Ikonio, oti aka ne olo atu latou ki te lua o fa‵kai e igoa ki Anitioka. Mai tua ifo i konā ne faima‵laga atu latou ki Teloa ki mātū, oti aka ki Filipi, Tesalonia, mo Pelea. E lavea ne koe a Atenai i te mape? Ne talai atu a Paulo i konā. Mai tua ifo i konā ne fakamāumāu ne latou se tausaga e tasi mo te āfa ke talai atu i Kolinito. Fakamuli loa ne ‵nofo latou mō se vaitaimi toetoe i Efeso. Oti aka ne ‵foki atu latou i se vaka ki Kaisaleia, kae olo atu ki Anitioka ki mātū, te koga telā ne nofo i ei a Paulo.

Tela la, ne faimalaga atu a Timoteo i te fia selau o maila ke fesoasoani atu ki a Paulo ke talai atu a te “tala ‵lei” kae ke faka‵tu aka a fakapotopotoga Kelisiano e uke. Kafai ko matua koe, ka fai koe mo fai se tavini fakamaoni a te Atua e pelā mo Timoteo?