Se Palataiso Fou i te Lalolagi

KILO atu ki lakau ‵lasi, pulalakau ‵gali mo mauga ma‵luga. Se koga gali tenei, i ne? Onoono atu ki te tia telā e kai mai te lima o te tamā tamaliki. Kae onoono atu ki leona mo solofanua e ‵tu fakatasi i te koga moukua tenā. E fia nofo atu koe i se fale i se vaegā koga penei, i ne?

E manako te Atua ke ola koe ki te se-gata-mai i te lalolagi i se palataiso. Kae e se manako lele eiloa a ia ke maua ne koe a te ‵mae mo logo‵maega kolā e puapuagā i ei a tino i aso nei. Tenei eiloa a te mea ne folafola mai ne te Tusi Tapu ki tino kolā ka ola i te palataiso fou: ‘Ka ‵nofo fakatasi a te Atua mo latou. Ka se toe ai se mate io me se tagi io me se ‵mae. Ko palele atu a mea mua.’

Ka fakamautinoa aka eiloa ne Iesu me ka fai a te ‵fuliga fakaofoofogia tenei. E iloa ne koe me e fai māfea? E tonu, mai tua ifo o te faka‵māga o te lalolagi mai mea ma‵sei mo tino ma‵sei katoa. Masaua, i te taimi ne nofo ei a Iesu i te lalolagi ne faka‵lei ne ia a vaegā masaki katoa, kae ne faka‵tu aka eiloa ne ia a tino mai te ‵mate. Ne fai ne Iesu a mea konei ke fakaasi mai i ei a mea ka fai ne ia i te lalolagi kātoa māfai ko fai a ia mo Tupu i te Malo o te Atua.

Mafaufau la, me ka pefea te fakaofoofogia ke nofo atu i te palataiso fou i te lalolagi! A Iesu, fakatasi mo nisi tino kolā e filifili ne ia, ka pule mai i te lagi. Ka tausi faka‵lei atu a tino pule konei ki tino katoa i te lalolagi kae ka onoono atu me e fia‵fia latou. Ke onoono aka me ne a mea e ‵tau o fai ne tatou ke fakamautinoa aka ei me ka tuku mai ne te Atua ki a tatou a te ola se-gata-mai i tena palataiso fou.