Te Malo Telā ka Aumai ei te Palataiso

I te taimi ne nofo ei a Iesu i te lalolagi, ne fai atu a ia ki ana soko ke ‵talo mō te Malo o te Atua: “Ke oko mai tou Malo. Ke fai foki tou loto i te lalolagi, e pelā mo te lagi.” (Mataio 6:​9, 10) Ne faipati ‵soko foki a ia e uiga ki “te tala ‵lei o te Malo.” (Mataio 4:23) A te tonuga loa, e sili atu ana pati ne fai e uiga ki te Malo i lō so se isi mea. Kaia? Me i te Malo ko te mea telā ka fakaaogā ne te Atua ke faka‵lei ei a fakalavelave kolā e fai ei te olaga i aso nei ke faigata. Mai i te Malo tenā, ko pili o fakaoti ne te Atua a taua, te fia‵kai, fa‵mai, mo amioga ma‵sei, kae ka aumai ei ne ia te loto ‵kaufakatasi mo te filemu.

E manako koe ke ola i se vaegā lalolagi penā? Kafai e penā, e ‵tau o faitau koe ki te tamā tusi tenei. Ka iloa ei ne koe me i te Malo se pulega tonu, telā e ‵lei atu i lō so se isi Malo ko oti ne pule mai ki tino. Ka lavea foki ne koe i ei te auala fakaofoofogia telā ne fakamatala malielie atu ei ne te Atua ki ana tavini ana fuafuaga e uiga ki te Malo. E se gata i konā, ka matea foki ne koe me ka fesoasoani atu pefea te Malo ki a koe i aso nei.

E tonu, e mafai o nofo koe mai lalo o te Malo o te Atua i te taimi eiloa tenei. Kae koi tuai o filifili koe ki ei, e ‵tau o momea atu tou iloa e uiga ki ei. Telā la, e fakamalosi atu matou ki a koe ke sukesuke faka‵lei ki te tamā tusi tenei. A mea katoa e fai mai i ei e uiga ki te Malo e maua mai eiloa i te Tusi Tapu.

Muamua la, ke onoono aka tatou me kaia e ‵tau ei mo tatou o maua te Malo o te Atua.

I te kamataga o tala mua o tino, ne faite ne te Atua te tagata ke ‵lei katoatoa kae ne tuku atu a ia ki te palataiso. I te taimi tenā, ne seki manakomia ei te Malo.

Kae ko Atamu mo Eva, ‵tou mātua muamua, ne faka‵logo ki a Satani, se agelu fakalogogātā. Ne loi a ia ki a laua e uiga ki te Atua kae ne fai ei laua ke ‵teke ki te Atua. Telā la, ne ‵tau ei o ‵mate laua, me i “te ‵togi o te agasala ko te mate.”​—Loma 6:23.

Se tagata agasala kae se ‵lei katoatoa e se mafai o fai ne ia tama‵liki ‵lei katoatoa. Telā la, a tama‵liki katoa a Atamu ne fa‵nau mai i se tulaga sē ‵lei katoatoa kae fai agasala telā e iku atu ki te mate.​—Loma 5:12.

Mai i te taimi tenā, ne ‵tau ei o maua ne tino te Malo o te Atua ke fesoasoani ki a latou ke fakasaoloto mai te malaia o te agasala mo te mate. Ka taku amiotonugina foki ne te Malo a te igoa o te Atua mai i pati ‵loi kolā ne fai ne Satani e uiga ki ei.

Ne folafola mai ne Ieova te Atua me ka fanau mai se “fanau” fakapito (io me se tama) ke fakasaoloto ne ia a tino mai i te agasala. (Kenese 3:15) A te “fanau” tenā e ‵tau o fai mo fai te Tupu o te Malo o te Atua.

Ko oi la ka fai penā?

I se 2,000 tausaga talu mai i te taimi ne agasala ei Atamu, ne ola se tagata ko oko eiloa i te fakamaoni, ko Apelaamo. Ne fakatonu atu a Ieova ki a Apelaamo ke tiakina ne ia tena fakai kae ke nofo i faleie i te fenua ko Palesitina.

Ne fai katoa ne Apelaamo a mea kolā ne fakatonu atu ne Ieova ki a ia ke fai, kae ne aofia foki i ei se mea e faigata ‵ki. Ne fakatonu atu a Ieova ki a ia ke fai tena tama, ko Isaako, pelā me se taulaga i luga i se fata faitaulaga.

Seki manako tonu eiloa a Ieova ki se taulaga a se tino. Kae ne fia iloa ne ia me ne pefea te lasi o te alofa o Apelaamo ki a ia. Ne oko atu ki te taimi ne fai ei a Apelaamo o tamate a Isaako kae ne taofi ne Ieova a ia.

Ona ko te fakatuanaki malosi o Apelaamo, ne folafola atu ne Ieova me ka avatu ne ia te fenua ko Palesitina ki ana fanau kae ne fai atu foki me i te Fanau telā ne folafola mai ka fanau mai i tena gafa, mo te gafa foki o tena tama ko Isaako.​—Kenese 22:17, 18; 26:4, 5.

Ne maua ne Isaako se masaga, ko Esau mo Iakopo. Ne fai atu a Ieova me i te Fanau telā ne folafola mai ka vau e alatu i a Iakopo.​—Kenese 28:13-15.

E toko 12 a tama a Iakopo, telā ne fakaigoa foki ne Ieova ko Isalaelu, kae fakamuli ifo ne fai katoa ne latou olotou tama‵liki. Telā la, ne kamata ei o tokouke a tama‵liki a Apelaamo.​—Kenese 46:8-27.

Ne oko atu se oge-meakai lasi ki te kogā koga tenā, kae ne olo atu ei a Iakopo mo tena kaukāiga ki Aikupito ona ko te ‵kamiga mai i a Falao, te pule o Aikupito.​—Kenese 45:16-20.

I Aikupito ne fakaasi mai ei me i te Fanau telā ne folafola mai, ka fai mo fai se tino mai te gafa o te tama a Iakopo ko Iuta.​—Kenese 49:10.

Fakamuli ifo ne mate ei a Iakopo, kae ne tupu aka te aofaki o ana tama ke oko ki te taimi ne fai ei latou pelā me se fenua lasi. Ne ma‵taku ei a tino Aikupito i a latou kae ne fai ei latou mo fai ne pologa.​—Esoto 1:7-14.

Fakamuli loa, ne uga atu ne Ieova a Mose, se tagata ko oko eiloa i te fakamaoni, ke fakatonu atu ki a Falao i te taimi tenā ke talia ne ia a tama‵liki a Isalaelu ke saoloto o olo atu keatea.​—Esoto 6:10, 11.

Ne ita a Falao, kae ne avatu ei ne Ieova a mala e sefulu ki luga i tino Aikupito. Kae i te ‵toe mala, ne uga atu ei ne ia te agelu o te mate ke tamate a tama toekimua katoa i Aikupito.​—Esoto, te mataupu e 7 ki te 12.

Ne fai atu te Atua ki tino Isalaelu me kafai e tamate ne latou se tamā mamoe mō te lotou ‵kaiga i te afiafi kae nani foki ne latou tena toto i olotou mataloa, ka fakaseke ei te agelu o te mate i olotou fale. Telā la, ne ‵sao ei a tama toekimua a tino Isalaelu.​—Esoto 12:1-35.

Ona ko te mea tenā, ne fakatonu atu ei a Falao ki te kau Isalaelu ke olo keatea mai Aikupito. Kae ne toe ‵fuli foki tena faka‵tauga kae ne afuli ne ia a latou ke toe au‵mai latou.

Ne ‵tala ne Ieova te auala ke ‵sao ei te kau Isalaelu i loto i te Tai Kula. Kae i te taimi ne taumafai ei a Falao mo ana kautau o tautali atu i a latou, ne ma‵lemu katoa latou.​—Esoto 15:5-21.

Ne takitaki atu ne Ieova a te kau Isalaelu ki te mauga ko Sinai i te koga lavaki. I konā loa, ne tuku atu ne ia ki a latou tena Tulafono kae ne fai atu foki me kafai e tausi latou ki ei, ka fai latou mo fai se malo o faitaulaga mo se fenua tapu. Telā la, fakamuli loa, ne maua ne te kau Isalaelu te avanoaga ke fai mo fai se vaega tāua o te Malo o te Atua.​—Esoto 19:6; 24:3-8.

Ko oti ne ‵nofo te kau Isalaelu i te mauga ko Sinai e ‵tusa mo se tausaga e tasi, kae ne takitaki ne Ieova a latou ki Palesitina, te fenua telā ne folafola atu ne ia ke tuku atu ki a Apelaamo, te lotou tupuga.

I Palesitina, ne talia ne te Atua ke pule atu a tupu ki te kau Isalaelu. Telā la, ne maua ei ne te Atua se malo i te lalolagi.

Te tokolua o tupu i Isalaelu ko Tavita, se tino i te gafa o Iuta. Ne manumalo a Tavita i fili katoa o Isalaelu, kae ne fai ne ia Ielusalema mo fai te laumua o te fenua.

A mea kolā ne ‵tupu i te pulega a Tavita e fakaasi mai me kafai e ‵lago atu a Ieova ki se tupu, e seai se pule faka-te-lalolagi e mafai o fakatakavale a ia.

Ne fai atu a Ieova me i te Fanau telā ne folafola mai ka fai mo fai se tino i te gafa o Tavita.​—1 Nofoaiga Tupu 17:7, 11, 14.

Solomona, te tama a Tavita, ne pule mai tua o ia. Ne poto ‵ki te tupu tenā, kae ne manuia Isalaelu mai lalo i tena pulega.

Ne tā foki ne Solomona se faletapu gali mō Ieova i Ielusalema. A fakanofonofoga i Isalaelu mai lalo o te pulega a Solomona e fakaasi mai ei ki a tatou a nisi fakamanuiaga kolā ka aumai ki tino mai i te Malo o te Atua telā ka oko mai.​—1 Tupu 4:24, 25.

Kae ko oko eiloa i te sē fakamaoni o nisi tupu e tokouke mai tua o Solomona.

A koi pule a tino i te gafa o Tavita i Ielusalema, kae ne fakaaogā ne Ieova tena pelofeta ko Isaia ke faipati mai e uiga mo te Tama a Tavita telā ka pule fakamuli ki te lalolagi i te fakamaoni. Ko te Fanau eiloa tenā ne folafola mai.​—Isaia 9:6, 7.

Ne ‵valo mai ne te pelofeta ko Isaia me i tena pulega ka ‵malu atu loa i te pulega a Solomona.​—Isaia, te mataupu e 11 mo te 65.

I te taimi tenā, ne mafaufau malosi a tavini a te Atua me ko oi ka fai mo fai te Fanau tenā.

A koi tuai o oko mai te Fanau, ne gasolo o matagā atu a tupu o Isalaelu telā, i te 607 T.L.M. ne talia ei ne Ieova te fenua ke fakatakavale ne te kau Papelonia. Kae ko te tokoukega o tino ne ave mālō ki Papelonia. Kae seki puli i te Atua tena folafolaga. E ‵tau eiloa o oko mai te Fanau i te gafa o Tavita. ​—Esekielu 21:25-27.

A mea kolā ne ‵tupu ki Isalaelu ne fakaasi mai i ei me e tiga eiloa e mafai o aumai ne se tupu faka-te-tagata fakamaoni kae poto a mea aogā, e se katoatoa a mea aogā konā. E ‵mate a tāgata fakamaoni kae kāti ka se fakamaoni olotou tama. Se a la te faka‵leiga ki ei? Ko te Fanau telā ne folafola mai.

Fakamuli ifo, ko ‵teka atu te fia afe o tausaga kae ne oko mai te Fanau. Ko oi la a ia?

Ne tuku atu ne se agelu a te Atua te tali ki se tamāfine Isalaelu telā seki avaga, ko Malia tena igoa. Ne fai atu a ia ki te tamāfine tenā me ka maua ne ia se tama tagata telā ka fakaigoa ki a Iesu. Konei a muna a te agelu:

“A te tamaliki tenei ka sili kae ka takugina ko te Tama a te Tino Tafasili i te Maluga; kae ko Ieova te Atua ka tuku atu ki a ia te nofogaaliki o Tavita tena tamana, kae ka pule a ia pelā me se tupu.”​—Luka 1:32, 33.

Telā la, a Iesu ko te Fanau telā ne folafola mai kae fakamuli loa ko te Tupu foki o te Malo o te Atua. Kae kaia ne ‵kese ei a Iesu mai tāgata fakamaoni kese‵kese kolā ne ola muamua?

Ne fanau fakavavega mai a ia. Seki iloa ne tena mātua se tagata, kae ne seki ai foki sena tamana faka-te-lalolagi. Ne ola muamua a Iesu i te lagi. Kae ko te agaga tapu o te Atua io me ko tena malosi-galue, ne ave ne ia te ola o Iesu mai te lagi ki te moegātama o Malia. Telā la, ne seki pisia a ia i te agasala a Atamu. I tena olaga kātoa, ne seki agasala eiloa a Iesu.​—1 Petelu 2:22.

Ko 30 tausaga o Iesu, kae ne papatiso a ia.

Ne faipati atu a ia ki tino e uiga ki te Malo o te Atua kae ne fakaasi atu fakamuli foki ne ia a ia eiloa pelā me ko te Tupu o te Malo.​—Mataio 4:23; 21:4-11.

Ne fai foki ne ia a vavega e uke.

Ne faka‵lei ne ia a masaki.​—Mataio 9:35.

Ne fagai fakavavega ne ia a tino fia‵kai.​—Mataio 14:14-22.

Ne faka‵tu aka foki ne ia a tino ‵mate.​—Ioane 11:38-44.

E fakaasi mai ne vavega konei a mea ka fai ne Iesu mō tino i tena tofi ko te Tupu o te Malo o te Atua.

E masaua ne koe me ne fai ne te Tupu ko Tavita a Ielusalema mo fai te laumua o tena malo? Ne fakamatala mai ne Iesu me i te Malo o te Atua ka tu i te lagi, kae e se i te lalolagi. (Ioane 18:36) Tenā loa te pogai e takugina ei te Malo ko “Ielusalema faka-te-lagi.”​—Epelu 12:22, 28.

Ne fakaasi mai ne Iesu a tulafono kolā e ‵tau o faka‵logo a tino mai lalo o te Malo ki ei. E maua nei a tulafono konā i te Tusi Tapu. A toe tulafono sili i ei ko te a‵lofa o tino ki te Atua mo te fakatau a‵lofa i a latou eiloa.​—Mataio 22:37-39.

Ne fakaasi mai foki ne Iesu me e se ko ia fua e tokotasi ka pule i tena Malo. Ka isi foki ne tino kolā e filifiligina ke olo atu ki te lagi kae ke pule fakatasi mo ia i konā. (Luka 12:32; Ioane 14:3) E tokofia latou? E tali mai ne te Fakaasiga 14:1: e toko 144,000.

Kafai e toko 144,000 e olo atu fua ki te lagi ke pule fakatasi mo Iesu, se a la te mea e mafai o fakamoemoe ki ei a nisi tino?

E fai mai te Tusi Tapu: “Ko tino amiotonu ka maua ne latou te lalolagi, kae ka ‵nofo latou i ei ki te se-gata-mai.”​—Salamo 37:29.

A latou kolā ka ‵nofo i te lalolagi ki te se-gata-mai e takugina pelā me ne “nisi mamoe.”​—Ioane 10:16.

Telā la, e lua a fakamoemoega. Ko te toko 144,000 kolā e ‵kami ne Ieova te Atua ke olo atu ki te lagi ke pule fakatasi mo Iesu Keliso. Kae ko te fia miliona foki o nisi tino ko maua ne latou te fakamoemoega mautinoa ke ola i te lalolagi ki te se-gata-mai pelā me ne tino mai lalo o tena Malo.​—Fakaasiga 5:10.

Ne takalialia Satani ki a Iesu kae ne ‵teke foki ki a ia. Ko oti ne talai atu a Iesu e ‵tusa mo tausaga e tolu mo te āfa, kae ne fai ne Satani a ia ke puke fakapagota kae tamate foki i luga i te sataulo. Kaia ne talia ei ne te Atua a te mea tenā?

Masaua, e agasala tatou katoa kae e ‵tau foki o ‵mate, me ne ‵tupu tatou mai i a Atamu.​—Loma 6:23.

Masaua foki, i a Iesu ne ‵lei katoatoa kae seki ‵tau o mate a ia, ona ko te auala fakavavega telā ne fanau mai ei a ia. Kae ne talia ne te Atua a Satani ‘ke fakapakia ne ia a Iesu i tena mulivae,’ io me ke tamate a ia. Kae ne toe fakatu aka ne te Atua a ia ki te ola pelā me se agaga telā e se mafai o toe mate. Me koi nofo mo ia te aogā o tena ola faka-te-foitino ‵lei katoatoa, e mafai o fakaaogā nei ne ia te mea tenā ke toe ‵togi ne ia ‵tou ola mai i te agasala.​—Kenese 3:15; Loma 5:12, 21; Mataio 20:28.

Ke fesoasoani mai ke katoatoa te ‵tou malamalama i te uiga tonu o te taulaga a Iesu, e faipati mai te Tusi Tapu e uiga ki ei i ata fakavaloaga.

E pelā mo te mea tenei. E masaua ne koe me ne fakatonu atu a Ieova ki a Apelaamo ke tuku atu tena tama pelā me se taulaga ko te mea ke tofotofo ei tena alofa?

A te mea tenei ko te ata fakavaloaga o te taulaga a Iesu. Ne fakaasi mai i ei te lasi o te alofa o Ieova mō tino, me ne talia ne ia tena Tama, ko Iesu, ke mate mō tatou ko te mea ke maua ei ne tatou te ola.​—Ioane 3:16.

E masaua ne koe te auala ne faka‵sao ei ne Ieova te kau Isalaelu mai Aikupito kae ne faka‵sao foki ne ia a olotou toekimua mai i te fakaseke ne te agelu o te mate mai i a latou?​—Esoto 12:12, 13.

A te mea tenei se ata fakavaloaga. Pelā mo te toto o te tamā mamoe ne fai ei ke ola a toekimua a te kau Isalaelu, a te toto o Iesu telā ne maligi e fai ei a latou kolā e tali‵tonu ki a ia ke ola. Kae e pelā mo mea kolā ne ‵tupu i te po tenā ne iku atu ei ki te fakasaolotoga o te kau Isalaelu, e penā loa te mate o Iesu e tuku mai ki tino te saolotoga mai te agasala mo te mate.

Tenā loa te pogai e takugina ei a Iesu ko “te Tamā Mamoe a te Atua telā e ave keatea ne ia te agasala a te lalolagi.”​—Ioane 1:29.

A koi nofo a Iesu i te lalolagi, ne fakamaopoopo foki ne ia ana soko kae ne fakaakoako latou i te talaiga o te tala ‵lei o te Malo, ke oko foki loa ki te taimi ko oti ne mate ei a ia.​—Mataio 10:5; Luka 10:1.

Konā loa a tino muamua ke filifili ne te Atua ke pule fakatasi mo Iesu i tena Malo.​—Luka 12:32.

E masaua ne koe me ne folafola atu te Atua ki te kau Iutaia me kafai e tausi ne latou te Tulafono, ka fai latou mo fai “se malo o faitaulaga”? I te taimi tenā ne maua ei ne latou te avanoaga ke fai mo fai se vaega o te Malo o te Atua kae ke tavini pelā me ne faitaulaga faka-te-lagi, māfai ko talia ne latou a Iesu. Kae ko te tokoukega o latou ne ‵teke ki a Iesu.

Telā la, mai i te taimi tenā, seki toe fai ei te kau Iutaia mo fai te fenua filifilia o te Atua; kae seki toe fai foki a Palesitina mo fai te Fenua o te Folafolaga.​—Mataio 21:43; 23:37, 38.

Mai aso o Iesu ke oko ki ‵tou aso nei, ne fakamaopoopo ne Ieova a latou kolā ka pule fakatasi mo Iesu i te lagi. Ne nāi afe fua o latou koi ‵nofo nei i te lalolagi. E taku ne tatou a latou ko te ‵toega o te kau fakaekegina.​—Fakaasiga 12:17.

Ko fatoā kamata o maina koe i te Malo o te Atua. Te Malo se pulega i te lagi, tena Tupu ko Iesu Keliso, kae e toko 144,000 tino mai te lalolagi e ‵kau atu ki a ia i konā. Ka pule te Malo ki luga i tino fakamaoni i te lalolagi kae ka isi sena malosi ke aumai te filemu ki te lalolagi.

Mai tua o tena mate, ne toe fakatu aka a Iesu kae fanatu ki te lagi. I konā loa, ne fakatali a ia ki te Atua ke fai atu ki a ia te taimi e ‵tau ei o kamata a ia o pule pelā me ko te Tupu o te Malo o te Atua. (Salamo 110:1) Ko te taimi fea ne ‵tau ei o fai te mea tenā?

I nisi taimi ne avatu ne Ieova a moemiti ki tino ke fai atu ei ki a latou a mea e uiga ki te Malo.

I aso o Tanielu, ne avatu ne Ieova se vaegā moemiti penā ki a Nepukanesa, te tupu o Papelonia. Ko te moemiti e uiga ki se lakau maluga.​—Tanielu 4:10-37.

Ne ‵kati te lakau ki lalo kae ne ‵sai te tafito ki saitaga mō tausaga e fitu.

Te lakau ko te fakatusa o Nepukanesa. E pelā eiloa mo te ‵saiga o te tafito i tausaga e fitu, e penā loa a Nepukanesa, ne masei tena ulu mō tausaga e fitu. Oti ei, ne toe ‵lei tena ulu.

A mea katoa konei ne ata fakavaloaga. A Nepukanesa ko te fakatusa o te pulega a Ieova i te lalolagi kātoa. Muamua, ne fai te mea tenā e alatu i tino mai te gafa o te Tupu ko Tavita i Ielusalema. I te taimi ne fakatakavale ei ne Papelonia a Ielusalema i te 607 T.L.M., ne taofi ei te fakasologa tenā o tupu. E se ‵tau o toe maua se tupu i te gafa o Tavita “ke oko ki te taimi ka vau ei a ia telā e isi sena tofi i te tulafono.” (Esekielu 21:27) Ko Iesu Keliso tenā.

E pefea te leva mai i te 607 T.L.M. ki te taimi ne kamata ei ne Iesu tena pulega? Ko tausaga fakavaloaga e fitu. Ko tena uiga, e 2,520 tausaga. (Fakaasiga 12:6, 14) Kae ko te 2,520 tausaga mai i te 607 T.L.M. ne oko atu ki te 1914 T.A.

Telā la, ne kamata o pule a Iesu i te lagi i te 1914. Se a tena uiga?

E fai mai te Tusi Tapu ki a tatou e alatu i te fakaasiga telā ne matea ne te apositolo ko Ioane.

Ne matea ne ia se fafine i te lagi ne fanau ne ia se tamaliki tagata.​—Fakaasiga 12:1-12.

Te fafine ko te fakatusa o te fakapotopotoga faka-te-lagi a te Atua, e aofia i ei a tavini ko agelu a te Atua katoa i te lagi. Te tamaliki tagata ko te fakatusa o te Malo o te Atua. Ne “fanau” mai te mea tenā i te 1914.

Ne a mea ne ‵soko atu ki ei? A te mea muamua ne fai ne Iesu, pelā me ko te Tupu, ko te ‵peiifoga o Satani, mo agelu kolā ne ‵teke fakatasi mo ia, mai te lagi ki te lalolagi.​—Fakaasiga 12:9.

E taku mai ne te Tusi Tapu ki a tatou a mea ne iku mai i ei: “Ke fiafia koe te lagi mo koutou kolā e ‵nofo i ei! Fakaalofa te lalolagi mo te tai, me i te Tiapolo ko fanaifo ki a koulua mo te kaitaua lasi, me e iloa ne ia i tena taimi ko toetoe fua.”​—Fakaasiga 12:12.

Telā la, i te taimi ne kamata ei a Iesu o pule i te lagi, ne gasue‵sue malosi ana fili i te lalolagi. E pelā mo mea ne ‵valo mai ne te Tusi Tapu, ne kamata o pule a ia i vā o ana fili.​—Salamo 110:1, 2.

Se a tena uiga mō tino?

Ne fai mai a Iesu ki a tatou: ko taua, oge-meakai, famai mo mafuie.​—Mataio 24:7, 8; Luka 21:10, 11.

Ko oti ne matea ne tatou a mea konei e ‵tupu talu mai te 1914. Kae tenā loa te suā pogai e iloa ei ne tatou me i te Malo ne kamata o pule mai i te taimi eiloa tenā.

E fakaasi mai i te tusi ko Fakaasiga i tāgata ka “fakamasei ne latou te lalolagi.” (Fakaasiga 11:18) Ko oti eiloa ne matea ne tatou a te mea tenā, maise eiloa talu mai te 1914.

Ne fakaopoopo mai te apositolo ko Paulo me i tino ka “a‵lofa fua ki a latou eiloa, ka fia‵fai malosi ki tupe, . . . ka se faka‵logo ki olotou mātua, . . . ka se mafai o loto ma‵lie, ka fatufatu tino, ka seai se lotou loto pulea.”​—2 Timoteo 3:1-5.

Ko maina nei koe me kaia faigata ei te olaga nei. Ko oko eiloa i te gasuesue malosi o Satani. Kae ko gasuesue foki te Malo o te Atua.

Ne fatoā oti atu te 1914, kae ko te ‵toega o latou kolā e fakamoe‵moe ke pule fakatasi mo Iesu i te lagi ne kamata o folafola atu ne latou te tala ‵lei me ko oti ne fakatu aka te Malo. Ko oti ne oko atu te galuega tenei ki te lalolagi kātoa, e pelā mo muna a Iesu.​—Mataio 24:14.

Se a te pogai o te galuega talai tenei?

Muamua, e ‵tau o fai atu ki tino e uiga ki te Malo o te Atua.

Kae ko te lua, e ‵tau o fesoasoani atu ki tino ke filifili me e fia‵fia latou o ‵nofo mai lalo o te Malo.

Ne fai mai a Iesu me i te ‵tou galuega talai e fai i aso nei e fai i ei ke iloa fakamuli aka ei a tino pelā me ne mamoe mo tino pelā me ne kouti.​—Mataio 25:31-46.

A “mamoe” ko latou kolā ne a‵lofa ki a ia mo ana taina. A “kouti” ko latou kolā ne seki fai penā.

Ka maua ne “mamoe” te ola se-gata-mai, kae ka se maua ne “kouti.”

A te talaiatuga o te tala ‵lei o te Malo e fesoasoani atu ei ke fakaasi mai ne tino me fai latou pelā me ne mamoe io me fai pelā me ne kouti.

Tenei te valoaga ne fai ne te pelofeta ko Isaia.

“E ‵tau o oko mai i te toe vaega o aso me i te mauga o te fale o Ieova ka fakatu aka ki luga i mauga, kae ka fakamalugagina ke maluga atu i mauga; kae ko fenua katoa ka olo atu ki ei.”​—Isaia 2:2.

Ko feagai tonu nei a tino mo “te toe vaega o aso.”

Te “fale” o te tapuakiga ki a Ieova ko “fakamalugagina” ki luga i lotu ‵se.

“Kae e tokouke a tino ka olo atu kae fai atu: ‘O‵mai, koutou, ‵tou olo atu ki te mauga o Ieova, ki te fale o te Atua o Iakopo; kae ka akoako mai ne ia a tatou ki ana auala, kae ka sasale tatou i ana auala.’”​—Isaia 2:3.

Telā la, e tokouke a tino mai fenua katoa e olo atu ke tapuaki atu ki a Ieova kae e ‵kami foki ne latou a nisi tino ke ‵kau atu ki a latou. E tau‵loto latou ki te auala telā e loto a Ieova ki ei.

“Kae ka tuki ne latou a olotou pelu ke fai pelā mo mea fakamalū te laukele, a ko olotou tao mo fai ne mea teuteu vine. Ka se toe siki atu ne te suā fenua a te pelu ki te suā fenua, kae ka se toe tau‵loto foki latou ki taua.”​—Isaia 2:4.

A latou kolā e tapuaki atu ki a Ieova e ‵kau fakatasi kae e filemu foki.

A te ikuga o te gasuesuega tenei o te Malo o te Atua, ko lau i miliona a tino i te lalolagi kātoa ko ‵nofo nei mai lalo i te Malo tenā.

Ko maopoopo fakatasi latou i tafa o te toega, ko te toega o latou kolā i o latou te fakamoemoega ke olo atu ki te lagi kae ke pule fakatasi mo Keliso.

E maua ne latou a meakai faka-te-agaga e alatu i te fakapotopotoga a te Atua.​—Mataio 24:45-47.

Latou se kautaina i te lalolagi kātoa, ne Kelisiano kolā e fakatau a‵lofa.​—Ioane 13:35.

E fia‵fia latou ki te filemu o olotou mafaufau, mo te fakamoemoega mō aso mai mua.​—Filipi 4:7.

Ko pili o palele te talaiga o te tala ‵lei. Kae ka iloa ei a “mamoe.” Ne a la mea ka fai ne te Malo?

E masaua ne koe me i te Tupu fakamaoni ko Tavita ne manumalo i fili katoa o tino o te Atua? Ka fai foki penā te Tupu ko Iesu.

I se taimi e tasi, ne maua ei ne te Tupu ko Nepukanesa se moemiti e uiga ki se tupua lasi telā ko te fakatusa o malo ‵lasi katoa mai i ona aso ke oko ki ‵tou aso nei.

Kae ne matea ei ne ia se fatu ne teka mai i se mauga, kae ne fati ei te tupua ke malepelepe. Te fatu ko te fakatusa o te Malo o te Atua.

Ko tena uiga, ko te fakaseaiga o te fakanofonofoga o mea ma‵sei i aso nei.​—Tanielu 2:44.

Konei loa a nisi mea kolā ka fuli ne te Malo.

Ka ‵galo atu a lotu ‵se, pelā me se fatu lasi e ‵pei ki tai.​—Fakaasiga 18:21.

Tenā loa te pogai, e ‵tau ei o fakamalosigina a tino katoa kolā e a‵lofa ki te Atua ke ‵tele keatea NEI mai lotu ‵se.​—Fakaasiga 18:4.

E ‵soko atu ki ei, ka fakatakavale ne Iesu “a atufenua . . . kae ka pule ne ia latou mo te tokotoko fiti.”​—Fakaasiga 19:15.

Telā la, e tiga eiloa e ‵togi ne Molimau a Ieova a olotou lafoga kae e faka‵logo foki ki tulafono a te fenua, e se ‵kau atu latou ki mea fakapolitiki.

Oti aka loa, ka ‵pei eiloa a Satani, te “talako” lasi, ki lalo i te lua lasi.​—Fakaasiga 20:2, 3.

Ko “mamoe” fua, kolā e fakamalalo latou eiloa ki a Iesu pelā me ko te lotou Tupu, ka ‵sao i te fakasauāga lasi tenā.​—Mataio 25:31-34, 41, 46.

Ne matea ne te apositolo ko Ioane se fakaasiga o “mamoe” kolā ka ‵sao i te fakasauāga lasi tenā.

“Ne kilo atu au, kae kiloke! se vaitino e tokouke, telā e se mafai o lau ne se tagata, mai atufenua mo matakāiga mo tino mo ‵gana katoa, ne ‵tu i mua o te nofogaaliki kae i mua o te Tamā Mamoe, kae ne ‵pei ki gatu ‵loa kae ‵kena; kae ne isi ne laupama i olotou lima.”​—Fakaasiga 7:9.

A te “vaitino e tokouke” tenei ko latou kolā e talia ne latou te talaiga o te tala ‵lei.

E ‵sao latou “mai i te fakasauāga lasi.”​—Fakaasiga 7:14.

A “laupama” e fakaasi mai me e fia‵fia latou ki a Iesu pelā me ko te lotou Tupu.

Te ‵pei o latou ki “gatu ‵loa kae ‵kena” e fakaata mai me e fakatuanaki latou ki te taulaga a Iesu.

Te “Tamā Mamoe” ko Iesu Keliso.

Ne a fakamanuiaga ka fia‵fia latou ki ei i konā? E masaua ne koe a fiafiaga i Isalaelu i te taimi o te pulega a te Tupu fakamaoni ko Solomona? Ne tuku mai ei se tamā ata o fiafiaga i te lalolagi mai lalo o te Tupu ko Iesu.

Ka maua se filemu tonu i vā o tino kae i vā foki o tino mo manu, e pelā mo te valoaga a Isaia.​—Salamo 46:9; Isaia 11:6-9.

E pelā mo te faka‵lei ne Iesu o ma‵saki a koi nofo a ia i te lalolagi, ka ave keatea foki ne ia a masaki mai tino katoa.​—Isaia 33:24.

E pelā mo te fagaiga ne ia o tino e tokouke, ka fakaoti foki ne ia a oge-meakai mai i tino katoa.​—Salamo 72:16.

E pelā mo te faka‵tu aka ne ia o tino ‵mate, ka faka‵tu aka foki ne ia a tino ‵mate kolā ne seki katoatoa olotou avanoaga ke faka‵logo latou eiloa ki te Malo o te Atua.​—Ioane 5:28, 29.

Ka aumai malielie ne ia a tino ki te tulaga ‵lei katoatoa telā ne galo i a Atamu.

E mata, e se se taimi fakaofoofogia tenā i aso mai mua nei? E manako koe ke oko atu ki ei? Kafai e penā loa, taumafai malosi ke fakamalalo nei a koe ne koe eiloa ki te Malo o te Atua kae ke fai mo fai se tokotasi o “mamoe” konā.

Sukesuke ki te Tusi Tapu kae fakamasani ke iloa ne koe a Ieova mo Iesu Keliso.​—Ioane 17:3.

Kau atu ki nisi tino kolā e ‵nofo mai lalo o te Malo.​—Epelu 10:25.

Tauloto ki tulafono a te Malo kae fakalogo ki ei.​—Isaia 2:3, 4.

Tuku atu tou ola ke tavini atu ki a Ieova, kae ke papatiso foki.​—Mataio 28:19, 20.

Kalo keatea mai mea ma‵sei, e pelā mo te kaisoa, pati loi, amioga matagā mo te konā, kolā e se fiafia a Ieova te Atua ki ei.​—1 Kolinito 6:9-11.

Kau atu ki te talaiga o te tala ‵lei o te Malo.​—Mataio 24:14.

Fakatasi mo te fesoasoani o te Atua, ka oko atu koe ki te Palataiso telā ne galo i a Atamu mo ana tama kae telā ka toe fakafoki mai, kae ka matea foki ne koe te fakataunuga o te folafolaga tenei: “Ne lagona ne au se leo lasi mai te nofogaaliki ne fai mai penei: ‘Kiloke! Ko nofo te faleie o te Atua mo tino, kae ka ‵nofo fakatasi a ia mo latou, kae ka fai latou mo ana tino. Kae ka nofo eiloa te Atua fakatasi mo latou. Kae ka ‵solo keatea ne ia a loimata katoa mai olotou mata, ka se toe ai se mate, se fanoanoa, se ‵tagi, io me se ‵mae. Ko palele atu a mea mua.’”​—Fakaasiga 21:3, 4.

[Tiāti i te itulau e 20]

(Ke Maua a fakamatalaga katoatoa, ke onoono ki te tusi)

607 T.L.M. 1914 T.A.

T.L.M. | T.A.

500 1,000 1,500 2,000 2,520

[Ata i te itulau e 11]

Apelaamo

Isaako

Iakopo

Iuta

Tavita

[Ata i te itulau e 14]

144,000

[Ata i te itulau e 16]

Atamu

Iesu