Mataupu E 16
Te Loto Finafinau mō te Tapuakiga ki a Ieova
A ĀFA taina o Iesu—ko nisi tama tāgata a Malia—ko Iakopo, Iosefa, Simona, mo Iuta. A koi tuai o faima‵laga atu latou katoa fakatasi mo Iesu mo ana soko ki Kapanaumi, ko te fa‵kai telā e tu pili ki te Namo o Kalilaia, kāti ne afe muamua atu latou ki te lotou fale i Nasaleta ko te mea ke tapena ne te kāiga olotou mea.
Kaia ne fanatu ei a Iesu ki Kapanaumi i lō te faiga o tena galuega i Kana, i Nasaleta, io me se isi koga aka i te koga maugā o Kalilaia? E tasi te mea, me e tai lauiloa a Kapanaumi ona ko te koga telā ne tu ei kae kāti e tai lasi atu foki te fa‵kai tenā. Kae ko te tokoukega o soko ‵fou o Iesu ne ‵nofo i Kapanaumi io me i koga kolā e pili atu ki ei. Tela la, ne seki ‵tau o tiakina ne latou olotou fale i te taimi ne akoako atu ei a ia ki a latou.
I tena nofoga i Kapanaumi, ne fai ne Iesu a galuega ‵mana, e pelā mo tena fakamatalaga i ne nāi masina mai tua ifo i ei. Ne seki leva kae ne toe faima‵laga atu a Iesu mo ana taugasoa. Ko te taimi tenā ne ‵tupu aka ei a lau o lakau kae ne olo atu latou ki Ielusalema o ‵kau atu ki te Paseka i te 30 T.A. I konā loa, ne matea atu ei ne ana soko se mea e uiga ki a Iesu telā kāti ne seki matea muamua ne latou.
E pelā mo te tulafono a te Atua, ne ‵tau o fai ne te kau Isalaelu a taulaga o manu. Tela la, ke faigofie mō latou, ne ‵togi atu ne tino fai pisinisi a manu mo manu eva mō te mea tenā. Kae ne ‵togi atu ne latou a mea konā i loto i te faletapu, kae ne fakatogafiti ne latou a tino me ko tō ‵togi ‵mafa olotou manu.
Ona ko tena kaitaua ki olotou amioga kaiū, ne fai ei ne Iesu se kini ki uka tua‵niki kae ne ‵tuli keatea ne ia a tino fai pisinisi konā. Ne ‵ligi ne ia ki tua a tupe a te kau ‵fuli tupe kae ne ‵tule foki ne ia olotou taipola. “Ave keatea a mea konei,” ne fakatonu atu a ia ki tino kolā ne ‵togi atu a lupe: “Sa fai ne koutou te fale o toku Tamana mo fale e fakatau ei a koloa!”
I te ‵kiloatuga a soko o Iesu ki ei, ne masaua ei ne latou a te valoaga e uiga ki te Tama a te Atua: “A toku manako malosi ki tou fale e te Atua, ko oko eiloa.” Kae ne fesili atu a te kau Iutaia penei: “Se a te fakailoga e fakaasi mai ne koe ki a matou, ne ala ei o fai ne koe te mea tenei?” Ne tali atu a Iesu penei: “Ofa te faletapu tenei, kae ka toe fakatu ne au i aso e tolu.”
Ne ma‵natu aka te kau Iutaia me ne faipati a Iesu ki te faletapu tonu, kae ne fesili atu latou penei: “E tusa mo te fasefulu-ono tausaga ne fai ei te faletapu tenei, kae ka toe fakatu aka ne koe i aso e tolu?” Kae ne faipati a Iesu ki te faletapu telā ko tena foitino. I te tolu tausaga mai tua ifo i ei ne masaua ne ana soko ana pati konā i te taimi ne toe fakatu aka ei a ia mai te mate. Ioane 2:12-22; Mataio 13:55; Luka 4:23.
▪ Ko oti ne fai te fakaipoipoga i Kana, kae ne a nisi fa‵kai ne faimalaga atu a Iesu ki ei?
▪ Kaia ne ita ei a Iesu, kae ne a ana mea ne fai?
▪ Ne a mea ne masaua ne soko o Iesu i te ‵kiloatuga ki ana faifaiga?
▪ Ne a muna a Iesu e uiga ki te “faletapu tenei,” kae se a te mea ne fakauiga a ia ki ei?