Mataupu e 30

Te ‵Tali Atu ki Tino Kolā ne ‵Losi Atu ki a Ia

I TE taimi ne ‵losi atu a takitaki o te lotu Iutaia me ne solitulafono a Iesu ki te Sapati, ne tali atu a ia penei: “A toku Tamana e galue faeloa ke oko mai ki te aso tenei; e penā foki au.”

Faitalia a pati a te kau Falesaio, e seki solitulafono te galuega a Iesu ki mea kolā ne fakatapu i te tulafono o te Sapati. A tena galuega ke talai atu kae ke faka‵lei a masaki ko tena tofiga mai te Atua, kae ne galue a ia i ei i aso katoa i te fakaakoako atu ki te Atua. Kae ne gasolo aka te kaitaūa o te kau Iutaia ona ko tena tali, kae ne salasala aka latou ke tamate a ia. Kaia?

E se gata fua i te lotou talitonuga me ne solitulafono a Iesu ki te Sapati kae ne ma‵natu aka foki latou i ana pati me i a ia ko te Tama totino eiloa a te Atua ko te pati masei tenā ki te Atua. Kae ne seki mataku a Iesu kae ne tali atu a ia ki a latou e uiga ki tena fesokotakiga taulia mo te Atua. Ana muna: “E alofa te Tamana ki te Tama, kae e fakaasi atu foki ki a ia a mea katoa kolā e fai ne ia.”

Ne toe fai atu a Iesu penei: “E pelā mo te Tamana e fakatu aka ne ia a tino ‵mate, e penā foki te Tama, e tuku atu ne ia te ola ki a latou kolā e loto a ia ki ei.” A te tonuga loa, ko oti ne kamata o fakatu aka ne te Tama a tino ‵mate i se auala faka-te-agaga! Muna a Iesu: “Ko te tino telā e fakalogo mai ki taku muna, kae talitonu ki a ia telā ne uga mai ne ia au ko sao mai a ia mai i te mate ki te ola.” E tonu, ne toe fai mai a ia penei: “Ko oko mai nei te taimi, ko oko foki loa ki ei, e lagona ei ne tino te leo o te Tama a te Atua; ko tino kolā e faka‵logo ki ei, ka ola latou.”

E tiga eiloa e seai se tala me ko oti ne fakatu aka ne Iesu se tino mai te mate i te taimi tenā, ne fai atu a ia ki tino kolā ne ‵losi atu ki a ia me ka toe faka‵tu aka a tino ‵mate i te feitu faka-te-foitino. Ana muna: “Sa ofo koutou i te mea tenei, me ka oko mai eiloa te taimi e lagona ei a tena leo ne latou katoa kolā e ‵nofo i loto i tanuga, kae ka ulu mai ei latou ki tua.”

Ke oko eiloa ki te taimi tenā, e foliga mai me ne seki taku tonu atu i se auala manino ne Iesu i mua o tino a tena tulaga tāua i fuafuaga a te Atua. Kae ne seki maua fua ne tino kolā ne ‵losi atu ki a Iesu a tena molimau e uiga ki mea konā. Ne fakamasaua atu ne Iesu ki a latou penei: “E uga atu ne koutou a nisi tino ki a Ioane, kae ne molimau foki a ia ki te munatonu.”

I te lua tausaga mai mua atu i ei, ne fai atu a Ioane te Papatiso ki takitaki konā o te lotu Iutaia e uiga ki te Tino telā ka vau i ana tua. Ne fakamasaua atu ne ia ki a latou me ne fakaaloalo muamua latou ki a Ioane telā ko nofo atu i te taimi tenā i te falepuipui, muna a Iesu: “Ne loto ma‵lie koutou i se taimi toetoe ke fia‵fia malosi koutou ki tena mainaga.” Ne fakamasaua atu ne Iesu a manatu konā ki a latou ona ko tena fakamoemoe ke fesoasoani atu ki a latou, e tonu, ke fakaola aka ei latou. Kae ne seki fakalagolago fua a ia ki te molimau a Ioane.

“Ko galuega eiloa konei e fai ne au [e aofia i ei te vavega telā ne fatoā fai ne ia], e molimau mai foki aku galuega ki a au i te Tamana ne uga mai ne ia au.” Kae e se gata fua i konā, ne toe fai atu a Iesu penei: “Ko te Tamana ne uga mai ne ia au, ko ia eiloa e molimau mai ki a au.” Ne molimau atu a te Atua e uiga ki a Iesu, e pelā mo tena papatisoga, ana muna: “Tenei eiloa taku Tama fagasele e fiafia au ki ei.”

A te tonuga loa, e seai se pogai ‵lei mō tino kolā ne ‵losi atu ki a Iesu ke ‵teke atu ki a ia. A tusitusiga kolā ne fai mai latou me ne sukesuke latou ki ei e molimau eiloa e uiga ki a ia! Ne fakaoti ne Iesu ana pati penei: “Moifai ne tali‵tonu koutou ki a Mose, penei e tali‵tonu mai foki koutou ki a au, me ne tusi ne ia a mea e uiga ki a au. Kae kafai e se tali‵tonu koutou ki ana tusitusiga, e tali‵tonu la pefea koutou ki aku muna?” Ioane 5:17-47; 1:19-27; Mataio 3:17.

▪ Kaia ne seki solitulafono ei a galuega a Iesu ki te Sapati?

▪ Ne fakamatala atu pefea ne Iesu tena tulaga tāua i fuafuaga a te Atua?

▪ Ke fakamaoni aka i a ia ko te Tama a te Atua, ne a molimau ne fakasino atu a Iesu ki ei?