Mataupu e 45
Se Tagata Fai Fakaatea ne Fai mo Soko
NE TUPU se mea fakamataku i te tuatuga a Iesu i gauta! Ne o‵mai a tāgata fakama‵taku e tokolua mai i tānuga e pili mai kae ne ‵tele atu ki a ia. Ne ulufia laua ne temoni. Me kāti e sili atu te amio fakasauā o te tino e tokotasi i lō te suā tino kae ne sili atu foki te leva o tena nofo puapuagā mai lalo i te pulega a temoni, telā ne ‵kilo atu ei a tino ki a ia.
Ko leva ne nofo fuafua te tagata fakaalofa tenā i va o tānuga. I ao mo po ne kalaga atu faeloa tou tagata kae ne selesele foki ne ia tena foitino ki fatu. Me e fakamataku ‵ki eiloa a ia, e seai se tino e lava tena loto toa ke sasale atu i te auala tenā. Ko oti ne taumafai a tino ke saisai a ia, kae ne motumotu faeloa ne ia a seni kae ne ofa ne ia a pikifao i ana vae. E seai eiloa se tino e lava tena malosi ke taofi aka tou tagata.
I te fanatuga o te tagata tenā ki a Iesu kae ne fakasiga i ona mua vae, a temoni kolā ne pule ki a ia ne fai a ia ke pakalaga atu penei: “Iesu te Tama a te Atua Tafasili i te Maluga! Se a te mea e manako ei koe ki a au? I te igoa o te Atua, ko fai atu ei au ki a koe, sa fakasalagina au!”
Ne fai ‵soko atu a Iesu penei: “Te agaga masei, fano keatea!” Kae oti aka ne fesili atu a Iesu penei: “Ko oi tou igoa?”
“Toku igoa ko Lekeono, ko tena uiga e tokouke matou,” ko te tali. E fia‵fia malosi sāle a temoni ke matea atu ne latou a logo‵maega o tino kolā e pukea ne latou, kae kāti e ‵kau fakatasi latou ona ko te lotou sē loto toa kae e fakalavelave atu foki ki tino konā. Kae i te fetauiga mo Iesu, ne a‵kai atu ei latou ke mo a ma uga atu latou ki te lua ‵poko. Ko toe maina i ei tatou i te ‵mana sili o Iesu; e mafai foki ne ia o fakatakavale a temoni fakama‵taku. E fakaasi mai foki i ei me ko iloa ‵lei ne te kau temoni me i te fakamasinoga fakaoti o latou fakatasi mo te lotou takitaki, ko Satani te Tiapolo, ko te ‵peiatuga ki te lua ‵poko.
Ne kai‵kai se lafu puaka e 2,000 i se koga pili mai i te mauga. Telā ne fai atu penei te kau temoni: “Uga atu matou ki puaka ke ulu matou ki ei.” Kāti e maua ne temoni se fiafiaga telā e se ‵tau mai i te ulu atu ki foitino o manu ke fakasauā atu ki a latou. I te taliaga ne Iesu o latou ke ulu atu ki puaka konā, ne fakatau‵tele ifo ei a puaka e 2,000 katoa konā ki te kaugutu o te mauga kae ne ma‵lemu i te tai.
I te mateaatuga ne tino tausi puaka a te mea tenā, ne ‵tele fakavave atu ei latou ke faka‵pa atu te tala tenā ki te fakai mo koga i tafa i ei. I konā loa, ne ua‵lolo mai a tino ke onoono aka me ne a mea ne ‵tupu. I te okoatuga o latou ki konā, ne matea atu ei ne latou te tagata telā ne ‵tuli keatea mai i ei a temoni. Ia, ko pei ana gatu kae ko ‵lei tena ulu, kae ne sagasaga tou tagata i mua vae o Iesu!
Ne fakamatala atu ne tino kolā ne molimau ki ei te auala ne toe ‵lei ei te tagata tenā. Ne taku atu foki ne latou ki tino konā a te ‵matega fakaatea fakapoi o puaka. I te taimi ko ‵logo ei a tino i ei, ko ma‵taku ‵ki eiloa latou, kae ne fakamole‵mole malosi atu latou ki a Iesu ke na fano keatea mai i te lotou fenua. Telā ne talia ei ne ia kae ne sopo atu a ia ki te pōti. Ne fakamolemole atu te tino telā ne ulufia muamua ne temoni ke na talia ne Iesu ke fanatu foki a ia. Kae ne fai atu penei a Iesu ki a ia: “Foki ki tou fale i tou kāiga, kae taku atu ki a latou a mea e uke ne fai ne Ieova mō koe, mo tena alofa lasi mō koe.”
Ne fakatonu sāle atu a Iesu ki a latou kolā ne faka‵lei aka ne ia ke mo a ma fakamatala atu a mea konā ki nisi tino, me e se manako a ia ke fakaiku aka ne tino olotou manatu ona fua ko tala fakaofoofogia. Kae e ‵lei ke ‵kese tena faiga tenei, me ka molimau atu te tino telā ne ulufia muamua ne temoni, ki tino kolā kāti ka se toe maua ne Iesu se avanoaga ke oko atu ki a latou. Kae ko te tagata tenā ka fai mo fai se fakamaoniga o te malosi o Iesu ke fai ne ia a mea ‵lei, kae ka tali atu i ei ki te tala sē ‵lei telā kāti ka faka‵pa atu e uiga ki te ‵mate o puaka konā.
I te fakalogo ki te fakatonuga tenā a Iesu, ne fano keatea ei te tino telā ne ulufia muamua ne temoni. Ne kamata o folafola atu ne ia ki Tekapoli kātoa a mea katoa kolā ne fai ne Iesu mō ia, kae ne ofo malosi i ei a tino. Mataio 8:28-34; Maleko 5:1-20; Luka 8:26-39; Fakaasiga 20:1-3.
▪ E tiga eiloa e isi ne tāgata e tokolua, kaia kāti ne fai ei pelā me ne ‵saga atu a tino ki te tino e tokotasi telā ne ulufia ne temoni?
▪ Ne a mea e fakaasi mai i ei me e iloa ‵lei ne te kau temoni me ka taofi fakamuli latou i te lua ‵poko?
▪ Kaia kāti e fai ei pelā me e fia‵fia a temoni ke ulu atu ki foitino o tino mo manu?
▪ Kaia ne ‵kese ei a pati a Iesu ki te tino telā ne ulufia muamua ne temoni, i te fakatonu atu ki a ia ke takutaku atu ki nisi tino a mea kolā ne fai ne Ia mō tou tagata?