Mataupu e 50

Fakatokaga ke Fe‵paki mo Fakasauāga

KO OTI ne fakatonu atu a Iesu ki ana soko e uiga ki faifaiga e ‵tau o fai i te galuega talai, kae ne fakailoa atu foki ne ia e uiga ki tino ‵teke. Ana muna: “Faka‵logo mai! Ka uga atu ne au koutou e pelā me ne mamoe i va o lafu luko fe‵kai . . . Ke matapula‵pula koutou, me e isi ne tino ka puke ne latou koutou o ‵moli ki te fono; kae e ‵kini foki koutou i loto i olotou fale tapuaki. Ka aumai koutou o fakamasino i mua o kovana mo tupu ona ko au.”

E tiga eiloa ka fe‵paki ana soko mo fakasauāga faiga‵ta, ne fakatalitonu atu a Iesu penei: “Kafai ko aumai koutou ne latou o ­fakamasino, sa manava‵se, me ne a otou pati ka fai atu, io me ka fai‵pati atu foki pefea ne koutou; kafai e oko mai a te taimi tenā, ka fakaasi atu ki a koutou a pati e ‵tau o fai ne koutou. Me ko muna kolā ka fai atu ne koutou, e se ne muna a koutou, kae ko muna mai te agaga o te Tamana o koutou, telā e faipati i loto i a koutou.”

Ne toe fai atu foki a Iesu penei: “Ka tuku atu ne tāgata olotou taina ‵tonu ke tamate, e penā foki a tamana ki olotou fanau; ko fanau foki ka ‵teke ki olotou mātua kae tamate foki.” Ana muna: “Ka takalia‵lia a tino katoa ki a koutou ona ko au. Kae ko te tino telā e loto ‵mau ke oko eiloa ki te ikuga, e ola a ia.”

E tāua ‵ki eiloa te galuega talai. Ona ko te mea tenā ne faka‵mafa ei ne Iesu te tāua o te fakautauta ko te mea ke saoloto faeloa latou o fakataunu te galuega. “Kafai e fakasauāgina koutou i se fa‵kai, ‵tele koutou ki te suā fa‵kai,” ko ana muna. “Kae e fai atu au ki a koutou, a koi tuai o palele te otou galuega tenā i fa‵kai katoa o Isalaelu, kae ko oko mai te Tama a te Tagata.”

IE tonu la, me ne tuku atu ne Iesu a te akoakoga, te fakailoaga mo te fakamalosiga tenā ki ana apositolo e toko 12, kae ne fakauiga foki ana pati ki tino kolā ka ‵kau atu ki te galuega talai i te lalolagi kātoa, mai tua ifo o tena mate mo tena toetumaiga. Ne fakaasi atu te mea tenā i ana pati me ‘ka takalia‵lia a tino katoa’ ki ana soko, kae e se ko tino Isalaelu fua kolā ne uga atu te kau apositolo ke talai atu ki ei. E se gata fua i konā, kae ne seki ave mālō te kau apositolo ke ‵tu i mua o kovana mo tupu i te taimi ne uga atu ei ne Iesu a latou ke talai atu i olotou malaga toe‵toe konā. Kae ne seki tuku atu foki latou ne olotou kāiga ke tamate.

Tela la, i ana pati ki ana soko me ka se palele te lotou talaiga “kae ko oko mai te Tama a te Tagata,” ne ‵valo mai ei ne Iesu ki a tatou me ka se palele atu a fa‵kai katoa e ‵tau o āsi ki ei i te lalolagi nofoaki kātoa i te talaiga o te Malo o te Atua telā ne fakatu aka, a koi tuai o oko mai a te tupu ‵malu ko Iesu Keliso e pelā me ko te tino fakaokosala i Amaketo.

Ne tumau loa Iesu i te avatuga o fakatonuga e uiga ki te galuega talai, penei: “E se sili atu a te tama akoga i tena faiakoga; e se sili foki te pologa i tena pule.” Tela la, e ‵tau o iloa ne soko o Iesu me ka oko atu ki a latou a vaegā amioga sē ‵lei mo fakasauāga kolā ne oko atu ki a ia ona ko te talaiga ne ia o te Malo o te Atua. Kae ne fakamalosi atu a ia penei: “Sa ma‵taku ki a latou kolā e tamate ne latou te foitino, me e se mafai ne latou o tamate te agaga; kae ke ma‵taku koutou ki te Atua, me ko ia e mafai ne ia o tamate te foitino mo te agaga i Kena.”

Ne fai ne Iesu te fakaakoakoga i te feitu tenā. Ne kufaki eiloa a ia mo te sē mataku ke oko eiloa ki te mate me ne ita a ia ma gutugutulua e uiga ki tena fakamaoni ki te Tino telā e malosi katoatoa, ko Ieova te Atua. E tonu, ko Ieova telā e mafai ne ia o tamate te “agaga” o te tino (e fakauiga i te fuaiupu tenei e pelā me ko te fakamoemoega o se tino i aso mai mua e pelā me se tino ola) io me e mafai ne ia o toe fakatu mai se tino ke maua ei ne ia te ola se-gata-mai. E pefea te alofa mo te atafai o te ‵tou Tamana faka-te-lagi, ko Ieova!

E ‵soko atu ki ei, ne fakamalosi atu a Iesu ki ana soko i se tala fakatusa telā e faka‵mafa mai i ei a te tausiga alofa a Ieova ki a latou. “E mafai ne koutou o ‵togi mai se avā manu eva fo‵liki ki se sene,” ko ana muna. “E seai foki se manu i a latou e to ki te one kae e se iloa ne te Tamana. E penā foki koutou, e faitaugina katoa otou lauulu. Tela la, sa manava‵se koutou, i te mea e sili atu eiloa koutou i manu eva konā!”

A te fekau o te Malo telā ne tofi aka ne Iesu ana soko ke na folafola atu, ka fai ei ke ‵nofo mavae‵vae a kāiga, me i nisi tino o te kāiga ka talia ne latou te fekau, kae ko nisi tino ka ‵teke ki ei. “Sa ma‵natu ake koutou i a au ne vau o aumai te filemu ki te lalolagi,” ko tena fakamatalaga. “Au ne seki vau o aumai te filemu kae ko te pelu.” Tela la, e ‵tau o loto malosi se tino o te kāiga ke talia ne ia te munatonu mai te Tusi Tapu. Muna a Iesu: “So se tino e sili tena alofa ki tena tamana io me ko tena mātua i lo au, e se aoga mō au. So se tino foki e sili tena alofa ki tena tama tagata io me ko tena tama fafine i lo au, e se aoga mō au.”

I te fakaotiga o ana fakatonuga, ne fakamatala atu ei ne Iesu me i a latou kolā e talia ne latou ana soko, ko talia foki ne latou a ia. “So se tino e avatu se ipu vai ‵moko ke inu i ei so se soko e se taulia i oku soko, i te mea se soko eiloa o oku, e maua eiloa ne ia tena taui.” Mataio 10:16-42.

▪ Ne a mea ne fakailoa atu ne Iesu ki ana soko?

▪ Ne a fakamalosiga mo fakamafanafanaga ne avatu ne ia ki a latou?

▪ Kaia e aogā foki ei a fakatonuga a Iesu ki Kelisiano i aso nei?

▪ Ko te auala fea e se sili atu ei te soko o Iesu i tena faiakoga?