Mataupu e 52

Ne Fagai Fakavavega ne Iesu te Fia Afe o Tino

NE FIA‵FIA a apositolo e toko 12 i te lotou malaga gali i te talaiga ki koga katoa i Kalilaia. Ne fatoā oti ne tamate a Ioane, kae ne ‵foki atu latou ki a Iesu kae ne taku atu ki a ia olotou tala fakaofoofogia. Ne matea ne ia me ko fi‵ta malosi latou, kae ona ko te tokouke o tino e foli‵foli sāle i konā ne seki maua aka loa ne latou se avanoaga o ‵kai. Tela la, ne fai atu a Iesu penei: “O‵mai, ‵tou olo ki se isi koga, ko tatou ake eiloa o malō‵lō malie i ei.”

Ne ‵sopo latou ki te lotou pōti, kāti e pili ki Kapanaumi, kae ne olo atu latou ki se koga e faigata ke oko ki ei, kāti i te suā feitu o te Iolitana telā e ‵mao malie atu i Petesaita. Kae e tokouke a tino ne matea atu ne latou i a latou ko olo, kae ne ‵logo foki a nisi tino i ei. Ne ‵tele atu a tino konā i te matāfaga, kae i te taimi ko oko atu ei te pōti ki uta, ko ‵tu mai foki latou o fakafetaui ki a latou.

Ne sopo a Iesu ki lalo mai te pōti kae ne matea atu ei ne ia te vaitino, kae ne alofa a ia ki a latou me ne fai latou pelā me ne mamoe kolā e seai se lotou tausi mamoe. Tela la, ne kamata eiloa o faka‵lei ne ia olotou masaki kae ne akoako atu ne ia ki a latou a mea e uke..

Ko se lagona te vave o te taimi, kae ne olo atu a soko o Iesu ki a ia, olotou muna: “Ko leva nei te aso, ka ko te mea nei se koga lavaki. E ‵lei ke na tuku atu a tino ke olo ki fatoaga mo fa‵kai pili mai o fakatau ne olotou meakai.”

Kae ne tali atu penei a Iesu: “Avatu ne koutou ne meakai ma latou.” Me ne iloa ‵lei ne Iesu ana mea ka fai, ne tofotofo ei ne ia a Filipo ki te fesili tenei: “Tefea te koga ka mafai ei ne tatou o ‵togi mai ne falaoa, ke ‵kai ei a tino konei?”

I te kilokiloga a Filipo, e seai lele eiloa se mea e mafai ne latou o fai. Me kāti e toko 5,000 tāgata ne ‵nofo i konā, kae kāti ne sili atu foki i te toko 10,000 tino, māfai ko lau aka a fāfine mo tama‵liki! Ne penei te tali a Filipo: “Kafai e ‵togi mai ne falaoa ki se luaselau tenali, [a te tenali ko te ‵togi o te tino i te aso], ko te mea ke tofu te tino mo ne mō mea, e se lava.”

Kāti ne fia fakaasi atu ne Anitelea me e se mafai eiloa o fagai ne latou a tino e tokouke penā, ne fai atu a ia penei: “E isi se tamaliki tenei e isi ne ana tamā puta falaoa e lima, mo ika fo‵liki e luagamata,” kae ne toe fai mai foki, “Se a te aogā o mea konei ki tino tokouke konei?”

Ne uke a mouku lauusiusi i konā, me ko te taimi tenā e ‵somo aka ei a lau, mai mua malie atu o te Paseka i te 32 T.A. Tela la, ne fai atu a Iesu ki ana soko ke fakatonu atu ki tino konā ke ‵nofo ki lalo i potukau e taki tinolima kae e taki tinolau foki. Ne puke a ia ki falaoa e lima mo ika e luagamata konā, ne kilo atu ki te lagi, kae ne fai ne ia te fakafetai. Oti i ei, ne tofitofi ne ia a falaoa mo ika konā. Ne avatu ne ia a mea konā ki ana soko, kae ne toe tufatufa atu ne latou ki tino. Se mea fakaofoofogia, me ne ‵kai a tino katoa kae ne ma‵kona ‵lei eiloa latou!

Oti aka loa, ne fai atu a Iesu ki ana soko: “Fakamaopoopo katoa a mea ne ‵toe, ke seai eiloa se mea e fakamaumau.” I te lotou faiga penā, ne ‵fonu ei a tapola e 12 i meakai ne ‵toe mai i mea kolā ne ‵kai ei latou! Mataio 14:13-21; Maleko 6:30-44; Luka 9:10-17; Ioane 6:1-13.

▪ Kaia ne ‵sala aka ei ne Iesu se koga ke ‵nofo ei a ia mo ana soko, i a latou eiloa?

▪ Ne ave ne Iesu ana soko ki fea, kae kaia ne seki maua ei ne latou se avanoaga ke ma‵lōlō latou?

▪ Ko leva te aso, kae ne a muna ne fai atu ne te kau soko, kae ne tausi pefea ne Iesu a tino konā?