Mataupu e 54

“Te Falaoa Tonu Mai te Lagi”

E UKE a mea tāua ne ‵tupu i te aso mai mua atu i te aso tenā. Ne fagai fakavavega ne Iesu te fia afe o tino kae ne ‵kalo keatea mai te taumafaiga a tino ke fai a ia mo fai te tupu. I te po eiloa tenā ne sasale atu ei a ia i luga o te Namo o Kalilaia telā ne sou malosi; ne fakasao ne ia a Petelu me ne kamata o goto ifo tou tagata i te taimi ne sasale atu ei a ia i te tai telā ne sou malosi ona ko te afā; kae ne fakamalū ne ia a galu ko te mea ke faka‵sao ne ia ana soko ke mo a ma apulu te lotou pōti.

I konā loa, ne maua aka Iesu ne tino kolā ne fagai fakavavega ne ia i te kogā fenua i te feitu ki mātū saegāla o te Namo o Kalilaia i tafa o Kapanaumi, kae ne fesili atu penei latou: “Ne vau koe anafea ki konei?” Ne ‵liko atu a Iesu ki a latou, ana muna me ne o‵mai fua latou ki a ia ke maua ei a nisi meakai sē ‵togi. Ne fakamalosi atu a ia ki a latou ke se ga‵lue fua mō meakai kolā e mafai o ‵pala, kae ko meakai kolā e tumau mō i te ola se-gata-mai. Telā ne fesili atu penei a tino konā: “Se a te mea ka fai ne matou, ko te mea ke ga‵lue matou i te galuega a te Atua?”

Ne taku atu ne Iesu te ‵toe galuega tāua: “Tenei te galuega e manako ki ei te Atua ke fai ne koutou,” ko ana muna, “ke tali‵tonu koutou ki te tino telā ne uga mai ne Ia.”

Kae ne seki fakatuanaki a tino konā ki a Iesu, faitalia a vavega kolā ne fai ne ia. E faigata o talitonu ki ei, faitalia eiloa te uke o mea fakaofoofogia ne fai ne ia, kae ne fesili atu latou penei: “Se a te fakailoga telā ka fai ne koe ke lavea ne matou, kae ke tali‵tonu ei foki matou ki a koe? Se a tau galuega e fai? A omotou tamana ne ‵kai ki te manai i te vao, e pelā mo muna ne tusi, ‘Ne tuku atu ne ia a falaoa mai te lagi ke ‵kai ei latou.’”

I tena tali atu ki te lotou fakamolemole ke maua se fakailoga, ne fakamaina atu ne Iesu me ko oi te Mafuaga o meakai fakavavega konā, ana muna: “E se ko Mose ne avatu ne ia te falaoa tenā mai te lagi, kae ko toku Tamana ne avatu ne ia te falaoa tonu mai te lagi. Me ko te falaoa mai te Atua, ko ia telā ne fanaifo mai te lagi o aumai te ola ki te lalolagi.”

Olotou muna: “Te Aliki, aumai faeloa te falaoa tenā.”

“Ko au ko te falaoa o te ola,” ko te fakamatalaga a Iesu. “Ko te tino e vau ki a au e se toe fia kai, ko te tino foki e talitonu mai ki a au, e se toe fia inu. Kae e muna atu au ki a koutou, me ko oti foki ne lavea ne koutou au kae ne seki tali‵tonu mai eiloa koutou. Ko mea katoa e tuku mai ne te Tamana ki a au, ka aumai ki a au; mo te tino telā e vau ki a au, ka se tuli eiloa ne au keatea. Me i a au ne seki fanaifo mai te lagi o fai te mea e loto eiloa au ki ei, kae ne fanaifo au o fai te mea e loto ki ei te tino telā ne uga mai ne ia au. Kae tenei te loto o te Tamana telā ne uga mai ne ia au: ke se galo eiloa se tino e tokotasi i tino kolā ne tuku mai ne ia ki a au, kae ke toe fakatu ake katoa ne au i te aso fakaoti. Tenei foki te loto o toku Tamana, telā ne uga mai ne ia au: ko tino katoa kolā e ‵kilo mai ki te Tama kae e tali‵tonu ki a ia, ka maua ne latou te ola se gata mai.”

I konā loa ne kamata o mui‵mui te kau Iutaia i muna a Iesu, me ne fai atu a ia penei: “Au nei ko te falaoa o te ola ne fanaifo mai te lagi.” Ko ma‵natu aka fua latou me i a ia se tamaliki a mātua faka-te-lalolagi. Tela la, e tai ‵pau olotou pati ‵teke mo pati a tino i Nasaleta, penei: “E se ko Iesu tenei te Tama a Iosefa? E iloa ne tatou tena tamana mo tena mātua! Kae ne pefea eiloa o fai mai a ia penei i a ia ne vau mai te lagi?”

Muna a Iesu: “Sa fatufatu mai koutou. E se mafai ne se tino o vau ki a au, seiloga ke mafua tena vau mai te Tamana telā ne uga mai ne ia au; kae ka toe fakatu ne au a ia ki te ola i te aso fakaoti. Ko oti ne tusi ne Pelofeta penei: ‘Ka akoako latou katoa ne Ieova.’ Tela la, ko tino katoa e faka‵logo ki te Tamana kae tau‵loto mai i a ia, ka o‵mai latou ki a au. Kae seki lavea eiloa ne se tino te Tamana, kae ko ia fua telā ne vau mai te Atua, ne lavea ne ia te Tamana. Au e muna tonu atu ki a koutou, ko te tino telā e fakatuanaki mai ki a au, e maua ne ia te ola se gata mai.”

Ne toe fai atu penei a Iesu: “Ko au ko te falaoa o te ola. Ne kai ne otou tamana te manai i te vao, kae ne ‵mate latou. Tenei te falaoa ko fanaifo mai te lagi; so se tino e kai ki ei, ka se toe mate. Ko au ko te falaoa o te ola ne fanaifo mai te lagi; kafai so se tino e kai ki te falaoa tenei, ka ola eiloa a ia ki te se gata mai.” E tonu, mai te fakatuanaki ki a Iesu, ko te tino telā ne uga mai ne te Atua, ka maua ei ne tino te ola se-gata-mai. E se mafai lele eiloa o maua te mea tenā i manai io me ko so se isi vaegā falaoa.

Kāti ne fatoā kamata te sautalaga tenā e uiga ki falaoa mai te lagi i te taimi ne maua ei ne tino a Iesu i tafa o Kapanaumi. Ne tumau loa te mataupu tenā, kae ne oko atu ki te ‵toe vaega tāua o te fakamatalaga tenā i te taimi ne akoako atu ei a Iesu i se sunako i Kapanaumi. Ioane 6:25-51, 59; Salamo 78:24; Isaia 54:13; Mataio 13:55-57.

▪ Ne a mea ne ‵tupu a koi tuai o kamata te fakamatalaga a Iesu e uiga ki falaoa mai te lagi?

▪ Ona ko mea kolā ne fatoā fai ne Iesu, kaia ne foliga mai ei me e se ‵tau te fakamolemole tenā ke maua ei se fakailoga?

▪ Kaia ne mui‵mui ei te kau Iutaia ki pati a Iesu me i a ia ko te falaoa tonu mai te lagi?

▪ Ne fai i fea te sautalaga tenā e uiga ki te falaoa mai te lagi?