Mataupu e 59

Ko oi Tonu Eiloa a Iesu?

I TE okoatuga a Iesu mo ana soko i te pōti ki Petesaita, ne aumai ei ne tino se tagata ‵kivi ki a ia kae ne a‵kai atu latou ke puke atu a ia ki te tagata tenā kae faka‵lei aka a ia. Ne puke Iesu ki tena lima kae ne ‵taki atu ki tua o te fakai, kae ko oti ne puaki atu ki ana mata, kae ne fesili atu a Iesu: “E matea ne koe se mea?”

“E matea ne au a tino,” ko te tali a te tagata, “kae e pelā eiloa me ne lakau e sasale sāle.” Ne toe fakapatele atu ne Iesu ana lima ki mata o te tagata, kae ne faka‵pula i ei ana mata, ko matea ‵lei ne ia a mea. Telā ne uga atu ei ne Iesu te tagata tenā ke toe foki ki tena fale kae ne fakatonu atu ki a ia ke mo a ma ulu atu ki loto i te fakai.

I konā loa, ne olo atu ei a Iesu mo ana soko ki fa‵kai i Kai­saleia Filipi, i te ‵toe feitu ‵mao ki mātū o Palesitina. E tai ‵mao te auala ne ‵kake ei ki luga, kāti ko te 30 maila, ki te koga gali ko Kaisaleia Filipi, i te 1,150 futu te maluga mai luga i te tai. Kāti ne fakamāumāu a aso e lua i te faiga o te malaga tenā.

I te faigā malaga tenā, ne fano keatea ei a Iesu i a ia eiloa ke ‵talo. Ne ‵toe mai fua masina e iva io me e sefulu a koi tuai o mate a ia, kae ne manavase a ia ki ana soko. Ko oti ne tiakina a ia ne tino e tokouke. E foliga mai me e ‵segi kae fanoa‵noa a nisi tino me ne ‵teke atu a ia ki taumafaiga a tino ke fai a ia mo fai te tupu, kae ne seki avatu foki ne ia se fakailoga mai te lagi ke fakamaoni aka ei tena pulega fakatupu i te taimi ne ‵toa atu ei ana fili ki a ia. Se a te talitonuga o ana soko me ko oi a ia? I te okoatuga o latou ki te koga ne ‵talo atu ei a ia, ne fesili atu penei a Iesu: “Taku mai me se a te manatu o tino me ko oi au?”

“A nisi tino e fai mai me ko Ioane te Papatiso,” ko te lotou tali, “kae ko nisi tino e fai mai me ko Elia, kae ko nisi tino e fai mai me ko Ielemia, io me se isi tino mai te kau pelofeta.” E tonu, ne ma‵natu aka a tino me i a Iesu se tino ne toe fakatu mai i tāgata konā!

“Kae ko koutou, se a te otou mau me ko oi au?” ko te fesili a Iesu.

Se mea vave o tali atu a Petelu penei: “A koe ko te Keliso, ko te Tama a te Atua ola.”

Ko oti ne fakamālō atu a Iesu ki a Petelu, kae ne fai atu a ia penei: “Au ko fai atu ki a koe, a koe ko Petelu. E fakatu ne au taku ekalesia i luga o te papa tenei. E se mafai eiloa ne te malosi o te mate o fakatakavale.” I konā loa ko te taimi muamua ne faka‵pula atu ei ne Iesu me ka fakatu aka ne ia se fakapotopotoga kae ka se mafai eiloa ne te mate o taofi aka ana tino māfai ko palele atu olotou olaga fakamaoni i te lalolagi nei. Telā ne fai atu ei a ia penei ki a Petelu: “E tuku atu ne au ki a koe a kī o te Malo o te lagi.”

Ne fakaasi atu ne Iesu me ka maua ne Petelu a tauliaga fakapito. Ikai, e se fai pelā me ka tulaga muamua a Petelu i te kau apositolo, kae e se ko ia foki te fakavae o te fakapotopotoga. A Iesu ko te Papa telā ka fakatu aka i ei te fakapotopotoga. Kae e tuku atu ki a Petelu a kī e tolu kolā ka fai pelā me ka ‵tala mai i ei te avanoaga ke ulu atu ei a potukau o tino ki te Malo o te lagi.

Ne fakaaogā ne Petelu a te kī muamua i te Penitekoso 33 T.A., ke fakaasi atu ei ki tino Iutaia loto salamō a mea kolā e ‵tau o fai ne latou ke fakaolagina ei latou. Ne seki leva mai tua ifo i ei kae ne fakaaogā ne ia te lua o kī ke ‵tala aka ei te avanoaga ki te Malo o te Atua mō tino Samalia kolā ne tali‵tonu. Kae i te 36 T.A. ne fakaaogā ei ne ia te tolu o kī ke ‵tala aka ei te avanoaga tenā ki tino sē pilitome mai Fenua Fakaa‵tea, ko Konelio mo ana taugasoa.

Ne tumau eiloa Iesu i te faiga o te sautalaga tenā mo ana apositolo. Ne fai ne ia ke fanoa‵noa latou i ana pati e uiga ki logo‵maega mo te mate kolā ko pili o fepaki mo ia i Ielusalema. Me ne seki malamalama a Petelu i a Iesu ka toe fakatu mai ki te ola faka-te-lagi, ne ‵taki atu keatea ne ia a Iesu ke fai‵pati laua tokolua. Ana muna: “Te Aliki, ke alofa atu a te Atua ki a koe. Ke mo a e oko atu ki a koe a mea konā.” Ne fulitua Iesu ki a ia, kae ne tali atu penei: “Satani, fano keatea mai i a au. A toku auala ko ‵pono ne koe, kae ko ou mafaufauga, e se ne mafaufauga faka-te-Atua, kae ne mafaufauga faka-te-foitino.”

Kāti ne faima‵laga atu a nisi tino fakatasi mo Iesu, kae e se ko ana apositolo fua. Telā ne kalaga atu ei a ia ki a latou ke o‵mai kae ne fakamatala atu ne ia me e se se mea faigofie ke fai mo fai tena soko. Ana muna: “So se tino e manako o tautali mai ki a au, e ‵tau o se mafaufau ki a ia eiloa, kae ke amo tena sataulo, ko tautali mai ei ki a au. Ko te tino e fia fakasao ne ia a tena ola mo ia ake eiloa, e se maua ne ia, kae ko te tino e fakamāumāu ne ia a tena ola ona ko au, mo te tala ‵lei, e maua ne ia.”

E tonu, e ‵tau o loto ‵toa a soko o Iesu kae tuku atu a latou eiloa pelā me ne taulaga, ko te mea ke fai ei a ia ke fiafia mai. Ana muna: “Kafai e ma se tino i a au mo aku akoakoga i te kautama sē talitonu mo te masei tenei, ka ma foki te Tama a te Tagata i a ia manafai e vau i te ‵malu o tena Tamana mo ana agelu tapu.” Maleko 8:22-38; Mataio 16:13-28; Luka 9:18-27.

▪ Kaia ne manavase ei a Iesu ki ana soko?

▪ Ne a manatu o tino me ko oi a Iesu?

▪ Ne a kī ne tuku atu ki a Petelu, kae ne fakaaogā pefea ne ia a kī konā?

▪ Se a te polopolokiga telā ne maua ne Petelu, kae kaia?