Mataupu e 83
Ne Talimālō ne te Falesaio
NE TALIMĀLŌ a Iesu i te fale o te Falesaio lauiloa, kae ne fatoā faka‵lei ne ia te tagata telā ne masaki fula‵fula. Kae i konā loa ne matea atu ei ne Iesu me i nisi tino ‵kami ne filifili ne latou a koga ma‵luga i te ‵kaiga, kae ne akoako atu ei ne ia se akoakoga e uiga ki te loto maulalo.
“Kafai e ‵kami koe ne se tino ki se ‵kaiga o te fakaipoipoga,” ne fakatonu atu ne Iesu, “ke se nofo koe i se koga maluga. I te mea manafai e isi foki se tino ne ‵kami ne ia e sili atu i a koe; kae ka fanatu a ia telā ne ‵kami ne ia koulua o fai atu ki a koe, ‘Tuku mo ia nei te nofoga tenei.’ Ko fano ei koe mo te mavale o nofo i te koga tafasili i te malalo.”
Telā ne fai mai ei a Iesu penei: “Kae kafai e ‵kami koe, fano eiloa koe o nofo i te koga tafasili i te malalo, ko te mea ke vau te tino telā ne ‵kami ne ia koe, o fai atu, ‘Vau ki luga nei, e toku taugasoa, ki te nofoga e sili atu i te ‵lei.’ Ka ‵malu ei koe i mua o tino kolā e ‵kai fakatasi koutou.” Kae ne fakaoti penei ne Iesu ana pati ke faka‵mafa ei te akoakoga tenā: “So se tino e loto fia sili, ka fakamalalogina. Kae ko ia telā e loto malalo, ka fakamalugagina.”
Oti aka loa, ne faipati atu a Iesu ki te Falesaio telā ne ‵kami ne ia a ia, kae ne fakamatala atu ne ia me e mafai pefea ne ia o fai se ‵kaiga telā e tāua ki te Atua. “Kafai e fai sau ‵kaiga, ke se ‵kami ne koe ou taugasoa, me ko ou taina, me ko ou kāiga, io me ko tino mauko‵loa kolā e tuakoi mo koe, i te mea ma toe ‵kami ne latou a koe; ko tena uiga la, ka toe maua ne koe te taui o au mea ne fai. Kae kafai e fai sau ‵kaiga, ke ‵kami ne koe a tino ma‵tiva, vae ‵mutu, ‵pili mo tino ‵kivi, e manuia ei koe, me e se mafai ne latou o taui mai ki a koe.”
Ka maua ne te tino talimālō tenā a te fiafia māfai e fai ne ia se ‵kaiga penā ki tino fakaa‵lofa, me e pelā mo te fakamatalaga tenei a Iesu ki te tino telā ne talimālō ki a ia: “Ka taui mai ne te Atua ki a koe manafai e toe‵tu mai a tino amio‵tonu mai te mate.” A te fakamatalaga a Iesu e uiga ki te ‵kaiga ‵lei tenā ne fakamasaua atu i ei ki te suā tino ‵kami e uiga ki te suā vaegā ‵kaiga. “Amutia latou kolā ka ‵kai i te Malo o te Atua!” ko pati a te tino ‵kami tenā. Kae ne seki fakatāua ne tino katoa a te fakamoemoega fakafiafia loto tenā, e pelā mo mea kolā ne fakaasi mai ne Iesu i te tala fakatusa.
“E isi se tagata ne fakatoka tena ‵kaiga lasi, kae ne ‵kami ne ia a tino e tokouke. . . . Kae ne uga atu ne ia tena tavini ke fai atu ki ana tino ‵kami penei: ‘O‵mai me ko toka a mea katoa!’ Kae ne faka‵fiti katoa latou takitokotasi, muna a te tino muamua ki te tavini, ‘Ko oti ne ‵togi toku manafa kae ‵tau au o fano o onoono ki ei, ke talia mai la ne koe taku fakamolemole.’ Muna a te suā tino, ‘Ne ‵togi ne au e lima vasoa pulumakau, kae ka fano nei au o tofotofo; ke talia mai la taku fakamolemole.’ Ne fai mai foki te suā tino, ‘Au nei ko oti ne fakaipoipo, tenā te mea ko se fanatu ei au!’”
Mā‵faga o fakamasakoga sē ‵lei! E onoono sāle a tino ki manafa mo manu a koi tuai o ‵togi ne latou a mea konā. Tela la, e se ‵tau o onoono fakavave latou ki ei māfai ko oti ne ‵togi a mea konā. Kae e se ‵tau foki o taofi se tino mai se ‵kamiga tāua penā ona ko tena avaga. Tela la, i te taimi ne lagona ei ne te matai a fakamasakoga konā, ne kaitaua a ia kae ne fakatonu atu penei ki tena tavini:
“‘Fano ke vave ki auala ‵lasi mo auala fo‵liki i tua o te fa‵kai, kae aumai ki konei a tino ma‵tiva, vae ‵mutu, ‵pili mo tino ‵kivi.’ E se leva foki ko te tavini eiloa ko fai mai, ‘Te Aliki, a tau fakatonuga ko oti eiloa ne fai, kae seki tāitāi o ‵fonu te fale.’ Telā, fai atu ei te pule ki te tavini, ‘Fano ki auala ‵lasi mo auala fo‵liki i tua o te fa‵kai, o fai mālō atu ki tino ke o‵mai katoa, ko te mea ke ‵fonu toku fale. . . . E seai se tino i a latou kolā ne ‵kami, e kai i taku ‵kaiga!’”
Se a te tulaga telā e fakamatala mai i te tala fakatusa tenā? Ia, a “te matai” telā ne fai ne ia te ‵kaiga e fakauiga ki a Ieova te Atua; ako “te tavini” telā e avatu ne ia te ‵kamiga, ko Iesu Keliso; mo “te ‵kaiga lasi,” ko avanoaga ke aofia i te Malo o te lagi.
A latou kolā ne maua muamua ne latou te ‵kamiga ke aofia i te Malo, i mua atu o nisi tino katoa, ko takitaki o te Lotu Iutaia i aso o Iesu. Kae ne seki talia ne latou te ‵kamiga tenā. Tela la, mai te Penitekoso i te 33 T.A., ne kamata ei o avatu te lua o ‵kamiga ki tino ma‵lalo kae sē taulia i te fenua o Iutaia. Kae ne seki lava te aofaki o tino kolā ne talia ne latou te mea tenā ke fakakātoa ei a nofoga e 144,000 i te Malo faka-te-lagi o te Atua. Tela la, i te 36 T.A., i te tolu-mo-te-āfa tausaga mai tua ifo i ei, ne avatu ei te tolu o ‵kamiga, ko te ‵toe ‵kamiga tenā, ki tino kolā e se ne tino Iutaia kae ne seki pilitome foki. Kae ne tumau eiloa te fakamaopoopoga o tino konā ke oko eiloa ki te 20 senitenali tenei. Luka 14:1-24.
▪ Se a te akoakoga e uiga ki te loto maulalo telā ne akoako atu ne Iesu?
▪ E mafai pefea ne se tino talimālō o fakatoka se ‵kaiga telā e fakatāua ne te Atua, kae kaia ka fiafia ei a ia?
▪ Kaia e se ‵lei ei a fakamasakoga a tino kolā ne ‵kami mai?
▪ Se a te mea e fakauiga ki ei te tala fakatusa a Iesu e uiga ki te “‵kaiga lasi”?