Mataupu e 90

Te Fakamoemoega ki te Toe‵tuga

NE OKO atu a Iesu ki tuakoi o te fakai ko Petania, telā e lua maila te ‵mao mai Ielusalema. Ne fatoā ‵teka atu fua ne nāi aso talu mai te taimi ne mate ei a Lasalo kae ne tanu foki a ia. Koi fai ne ana tuagane ko Malia mo Maleta a te fānoanoa, kae e tokouke a tino ne olo atu ki te lā fale o fakamafanafana atu ki a laua.

A koi ‵tagi fanoa‵noa laua, kae e isi se tino ne fakailoa atu ki a Maleta i a Iesu ko vau. Tela la, ne tiakina ne ia te fale kae ne tele fakavave atu a ia ke fetaui laua, kae kāti ne seki fakailoa atu a ia ki tena taina. I tena okoatuga ki a Iesu, ne toe taku atu ne Maleta te mea telā kāti ne fai fakafia ne laua mo tena taina i aso e fa ko ‵teka atu: “Te Aliki, moi ne nofo koe i konei, penei e se mate toku tuagane!”

Kae ne fakaasi atu ne Maleta tena fakamoemoega, me ne pati fakalogo a ia ki a Iesu me kāti e isi se mea ka fai ne ia mō tena tuagane. “Kae nei, e iloa ne au me e talia ne te Atua so se mea e fakatagi atu ei koe ki a ia,” ko ana muna.

“A tou tuagane ka toe ola mai,” ko te folafolaga a Iesu.

Ne mafaufau a Maleta me i a Iesu e faipati fua ki te toe‵tuga telā ka fai fakamuli i te lalolagi, telā ne fakamoe‵moe ki ei a Apelaamo mo nisi tavini a te Atua. Tela la, ne tali atu a ia penei: “E iloa ne au me ka toe ola mai a ia i te aso fakaoti.”

Kae ne avatu ne Iesu se fakamoemoega me ka maua fakavave ne ia se fakatapūga ki ei, ana pati: “Au ko te toetu mo te ola.” Ne fakamasaua atu ne ia ki a Maleta me ko oti ne tuku atu ne te Atua ki a ia te malosi ki luga i te mate, ana muna: “So se tino e fakatuanaki ki a au, e ‵tusa eiloa me e mate; kae e ola eiloa a ia. So se tino foki e ola nei kae fakatuanaki ki a au, e se mafai eiloa o mate.”

Ne seki fakauiga ne Iesu ana pati ki a Maleta me i tino fakamaoni kolā ne ola i te taimi tenā ka se ‵mate. Ikai, kae ko te manatu telā ne fakaasi atu ne ia ne fai penei me i tino kolā e fakatuanaki ki a ia ka oko atu ki te ola se-gata-mai. A te vaegā olaga tenā ka maua ne te tokoukega o tino ona ko te toe‵tuga i te ‵toe aso. Kae ko nisi tino kolā e fakamaoni ka ‵sao atu i te gataga o te fakanofonofoga o mea konei i te lalolagi, kae ka taunu tonu mai eiloa a pati konā a Iesu i se auala tonu. Ka se ‵mate eiloa latou! Ko oti atu a pati faka‵poi konā, kae ne fesili atu a Iesu penei ki a Maleta, “E talitonu la koe ki te mea nei?”

“Ao, e te Aliki,” ko tena tali. “Au e talitonu i a koe ko te Keliso ko te Tama a te Atua, telā ne fai mai ei a pelofeta me e vau ki te lalolagi.”

Ne tele fakavave atu a Maleta o fai ki tena taina ke vau, ana muna ki a ia: “Ko oko mai te Faiakoga, kae ne ‵sala ki a koe.” Ne tiakina fakavave ne Malia te fale. I te taimi ne matea atu ei ne nisi tino i a ia ko fano, ne tau‵tali atu latou ki a ia me ne ma‵natu aka latou me i a ia e fanatu ki te tānuga.

I tena okoatuga ki a Iesu, ne fakasiga ifo ei a Malia ki ana vae kae ne tagi. Ana pati: “Te Aliki, moi ne nofo koe i konei, penei e se mate toku tuagane.” Ne otia malosi te loto o Iesu i te taimi ne matea atu ei ne ia me ko ‵tagi a Malia mo nisi tino e tokouke kolā ne tau‵tali atu ki a ia. Ne fesili atu a ia penei, “Ne tanu ne koutou a ia i fea?”

“Te Aliki vau ake o onoono ki ei,” ko te lotou tali.

Ne kamata o tagi a Iesu, kae ne fai atu penei te kau Iutaia: “Kiloke ki te lasi o te alofa o Iesu ki a Lasalo!”

E masaua ne nisi tino me i ne nāi masina mai mua atu i ei i te ‵Kaiga o Fale Fakamalumalu ne fatoā faka‵lei aka ne Iesu te tamataene telā ne fanau mai kae ‵kivi, kae ne fesili atu latou penei: “E se mafai ne ia telā ne faka‵pula ne ia a mata o tino ‵kivi, o taofi te tagata tenei mai te mate?” Ioane 5:21; 6:40; 9:1-7; 11:17-37.

▪ I te taimi fea ne oko atu ei a Iesu ki Petania, kae ne a mea ko oti ne ‵tupu i konā?

▪ Se a te pogai ne talitonu ei a Maleta ki te toe‵tuga?

▪ Ne pefea te lagonaga o Iesu e uiga ki te mate o Lasalo?