Mataupu e 100
Te Tala Fakatusa ki te Mina
KĀTI ne nofo atu a Iesu i te fale o Sakaio, ko te koga telā ne afe a ia ki ei i tena malaga ki Ielusalema. Ne tali‵tonu ana soko me i te taimi ka oko atu ei latou ki Ielusalema, ka faka‵pula atu ne ia me i a ia ko te Mesia kae ka fakatu aka foki ne ia tena Malo. Ke fakatonu aka te manatu tenā kae ke fakaasi atu foki me e se tāitāi o oko mai te Malo, ne fai atu ne Iesu se tala fakatusa.
Ne fai atu a ia penei: “Ne fano te suā tagata sili ki te suā fenua ‵mao atu ke fai a ia mo fai te tupu, ko toe foki mai ei a ia ki tena fenua.” A Iesu ko te “tagata sili” kae ko te lagi ko te “fenua ‵mao.” I tena okoatuga ki konā, ne tuku atu ne tena Tamana te malosi fakatupu ki a ia.
A koi tuai o fano keatea a ia, ne kalaga atu ei te tagata mai te gafā tupu ki ana tavini e toko sefulu kae ne avatu taki tokotasi ki a latou se mina (se tupe siliva), ana muna: “Taumafai o fakagalue ne koutou ke oko ki te taimi e foki mai ei au.” A tavini e toko sefulu i te fakataunuga muamua ne fakauiga eiloa ki soko mua o Iesu. I te fakataunuga telā e tai lasi atu, e fakauiga latou ki tino katoa kolā e fakamoe‵moe ke fai mo fai ne sui fakatasi mo ia i te Malo faka-te-lagi.
A te mina siliva se vaegā tupe telā e ‵togi ‵mafa, me i tupe takitasi konā e ‵pau eiloa mo te peofuga o se tino fai fatoaga i te tolu masina. Kae se a te mea e fakauiga ki ei te mina? Se a te vaegā galuega telā ne ‵tau o fai ne tavini konā ke fakagalue aka ei a tupe konā?
A te mina ne fakauiga ki mea kolā ne mafai o fakaaogā ne soko kolā ne fakaeke ne te agaga i te faiga ke tokouke a sui o te Malo faka-te-lagi ke oko eiloa ki te taimi o te vauga a Iesu e pelā me ko te tupu telā ne folafola mai. Mai tua o tena toetuga mo tena fakasaeakaga ki ana soko, ne avatu ne ia a mina fakatusa ki a latou ke fai ne latou a nisi soko kae ke fakaopoopo atu a nisi tino ki te potukau faka-te-lagi o te Malo.
Kae ne toe fai mai a Iesu penei: “Ka ko tino tonu o tena fenua ne ita ki a ia [te tagata mai i te gafā tupu], uga atu ei ne latou ne avefekau o fai atu ki ei, ‘E se ma‵nako matou ke fai te tagata nei mo tupu o matou.’” A tino o te fenua tenā ko tino Isalaelu, io me ko tino Iutaia, kae e se aofia i ei ana soko. Ko oti ne fanaka a Iesu ki te lagi, kae ne fakasauā atu a tino Iutaia ki ana soko kae ne fakailoa atu i ei me ne seki ma‵nako latou ke fai a ia mo fai te lotou tupu. I te faiga tenā ne amio latou e pelā mo tino o te fenua kolā ne uga atu ne latou a avefekau.
Ne fakaaogā pefea ne tavini e toko sefulu olotou mina? Ne fakamatala mai ne Iesu: “I tena fokimaiga, ko maua ne ia te ‵malu fakatupu, ne fakatonu ne ia ana tavini kolā ne tuku atu ki ei a tupe, ke o‵mai ki a ia, ke iloa ne ia te mea ne maua mai i te fakagaluegaga o tupe. Ne vau ki ona mua te tavini muamua kae ne fai mai, ‘Te Aliki, ko maua ne au a mina e sefulu i te fakagaluegaga o te mina e tasi telā ne tuku mai ki a au.’ Ne fai atu a ia, ‘Ko oko eiloa i te ‵lei, a koe se tavini ‵lei! Ona ko tou fakamaoni i mea fo‵liki ka tuku atu ei ne au a fa‵kai e sefulu ke pule ne koe.’ Ne vau te tokolua o tavini kae ne fai mai, ‘Te Aliki, ko maua ne au a mina e lima i te fakagaluegaga o te mina e tasi telā ne tuku mai ne koe ki a au.’ Ne fai atu a ia, ‘Ka pule ne koe a fa‵kai e lima.’”
A te tavini telā ne maua ne ia a mina e sefulu e fakauiga ki te potukau io me ko te vaega o soko mai te Penitekoso i te 33 T.A. ke oko eiloa ki te taimi nei kae e aofia foki i ei te kau apositolo. A te tavini telā ne maua ne ia a mina e lima e fakauiga foki ki se potukau mai te vaitaimi tenā, kae e ‵tusa eiloa mo olotou avanoaga mo olotou atamai, ne fakaopoopo atu ne latou a mea ki mea a te tupu i te lalolagi nei. Ne talai atu ne te avā potukau konā a te tala ‵lei mo te loto finafinau, kae ona ko te mea tenā, e tokouke a tino loto fakamaoni ne fai mo fai ne Kelisiano. E tokoiva a tavini ne fakagalue faka‵lei aka a tupe konā kae ne fakaopoopo atu ne latou a nisi mea ki mea kolā ne tausi ne latou.
Kae ne toe fai mai a Iesu penei: “Ne vau ki a ia te suā tavini kae ne fai mai, ‘Te Aliki, tenei tau mina; ne kofukofu kae ne tausi ne au i te solosolo; i te mea i a au ne mataku i a koe se tagata faigata; e ave sāle ne koe a mea kolā e se ne mea a koe, kae tau foki ne koe a fuaga o lakau e seki ‵toki ne koe.’ Ne fai atu ei a ia ki ei, ‘A koe se tavini masei! Ko au muna eiloa ka fakasala ei ne au a koe! E iloa ne koe i a au se tagata faigata, e ave ne au a mea e se ne aku mea, kae tau foki ne au a fuaga o lakau e seki ‵toki ne au. Kaia ne seki tuku atu ei ne koe taku tupe ki te fale ‵teu tupe? E penei la e foki mai au, ko maua ne au te tupe tenā fakatasi mo tena pasene.’ Ne fai atu ei a ia ki a latou kolā ne ‵tu mai i konā, ‘‵Fao keatea te mina mai i a ia, kae avatu ki te tavini telā e maua ne ia te sefulu mina.’”
Me ne ave keatea te mina fakatusa e fakauiga i ei me ka se maua ne te tavini masei se koga i te Malo faka-te-lagi. E tonu, e fai pelā me e se taulia a ia ke pule ki luga i fa‵kai e sefulu io me ko fa‵kai e lima. Kae onoono la, me ne seki taku fakamaseigina te tavini tenā ona ko ana amioga ma‵sei, kae ona ko tena fakatamala ke fakaopoopo atu a mea ki koloa o te Malo o tena Matai.
I te avatuga o te mina a te tavini masei ki te tavini muamua, ne fakaasi atu te fāmeo tenei: “Te Aliki, ko oti ne maua ne ia a mina e sefulu!” Kae ne tali atu a Iesu penei: “So se tino telā e isi ne ana mea, ka fakaopoopo atu ana mea ke uke, kae ko ia telā e seai ne ana mea, e ‵tusa eiloa me e mu‵tana a mea e maua ne ia, kae ka ave eiloa keatea a mea konā mai i a ia. Tenei la, ko oku fili kolā e seki ma‵nako ke fai au mo Tupu o latou; aumai latou ki konei ke tamate i oku mua!” Luka 19:11-27; Mataio 28:19, 20.
▪ Se a te pogai ne fai ei ne Iesu te tala fakatusa e uiga ki mina?
▪ Ko oi te tagata o te gafā tupu, kae se a te fenua ne fanatu a ia ki ei?
▪ Ko oi a tavini, kae se a te mea ne fakauiga ki ei a mina?
▪ Ko oi a tino o te fenua tenā, kae ne fakaasi atu pefea ne latou te lotou ita?
▪ Kaia ne taku fakamasei ei te tavini e tokotasi, kae se a te mea ne fakauiga ki ei me ne ave keatea te mina mai i a ia?