Mataupu e 101
I Petania, i te Fale o Simona
I TE taimi ne tiakina ei ne Iesu a Ieliko, ne fanatu eiloa a ia ki Petania. Ne fakamāumāu ne ia te lasiga o te aso tenā i te faiga o te malaga, me ne ‵tau o kake a ia i koga ma‵luga kae faiga‵ta i se 12 maila. A Ieliko e tu i se koga e 820 futu mai lalo ifo o te maluga o te tai, kae ko Petania e tu atu i se koga e 2,500 futu te maluga mai luga o te tai. Kāti e masaua ne koe me i Petania ko te fa‵kai telā ne ‵nofo i ei a Lasalo mo ana tuagane. A te tamā fa‵kai tenā e 2 maila te ‵mao mai Ielusalema, kae e tu atu foki i te feitu ki te saegāla o te Mauga o Olive.
Ko oti ne oko atu a nisi tino e tokouke ki Ielusalema ke fai ei te Paseka. Kāti ne oko vave atu latou ki konā ke faka‵mā latou i feitu faka-te-tapuakiga. Kāti ne puke latou ki se foitino mate io me ne fai ne latou se isi mea aka ke fai ei latou ke se ‵mā. Tela la, ne tau‵tali atu latou i faifaiga kolā ne fakatonu mai ke ‵mā ei latou ko te mea ke fakamanatu faka‵lei ne latou te Paseka. I te okoatuga o nisi tino muamua konā ki te faletapu, kāti ne kamata o fai‵pati latou me ka fanatu a Iesu ki te Paseka io me ikai.
E uke a kinauga ne fai i Ielusalema e uiga ki a Iesu. Ne iloa ne tino valevale me ne ma‵nako eiloa a takitaki lotu o puke a ia kae fakasala a ia ki te mate. A te tonuga loa, ko oti ne fakatonu atu latou me kafai e isi se tino e iloa ne ia te koga e nofo ei a Iesu, e ‵tau o fakailoa atu te mea tenā ki a latou. Ne taumafai a takitaki konā ke tamate a ia i taimi kese‵kese e tolu i masina mai mua atu i ei—i te ‵Kaiga o Fale Fakamalumalu, i te ‵Kaiga o te Fakatapūga o te Faletapu, mo te taimi foki telā ne fakatu aka ei ne ia a Lasalo. Tela la, ko fesili ifo a tino penei me ka tu atu a Iesu i mua o latou i te taimi tenā. “Se a te otou faka‵tau?” ne fakatau fesilisili atu te suā tino ki te suā tino. “E se vau a ia ki te ‵kaiga?”
I konā loa, ne oko atu a Iesu ki Petania i te ono o aso mai mua atu o te Paseka, telā e pakū tonu eiloa ki te po 14 o Nisani e pelā mo te kalena faka-Iutaia. Ne oko atu a Iesu ki Petania i se taimi i te afiafi o te Aso Lima, telā ko te kamataga o te po 8 o Nisani. Ne seki mafai ne ia o fai te malaga tenā ki Petania i te Aso Ono me ne fakatapu te faiga o malaga i te Sapati—mai te tōga o te mata o te la i te Aso Lima ki te tōga o te mata o te la i te Aso Ono—i tulafono a te kau Iutaia. Kāti ne fanatu eiloa a Iesu ki te fale o Lasalo, e pelā mo ana faiga i aso mua, kae ne nofo atu i konā i te po o te Aso Lima.
Kae ko te suā tino i Petania ne ‵kami ne ia a Iesu mo ana taugasoa ke olo atu o ‵kai i te afiafi po i te Aso Ono. A te tagata tenā ko Simona telā ne lepela muamua, kae kāti ne faka‵lei tena masaki ne Iesu i se taimi mai mua atu i ei. Ne aofia a Lasalo i a latou kolā ne ta‵kato fakatasi mo Iesu i te taipola. Ona ko tena fia galue sāle, ne situati a Maleta ki tino kolā ne ‵kami. Kae e pelā mo te masani, ne fakalogologo a Malia ki a Iesu, kae i te taimi tenā ne tupu mai i ei se kinauga.
Ne ‵tala aka ne Malia se fagu alapasa, io me se tamā fagu, kae ne maua mai i ei te pauna kātoa o te sinu manogi ‵togi ‵mafa, ko te “sinu manogi e faite mai i te lakau ko te nato.” E ‵togi ‵mafa ‵ki a mea konā. E ‵pau eiloa te ‵togi o te sinu tenā mo te ‵togi o te tino galue i te tausaga e tasi! I te taimi ne ‵ligi atu ei ne Malia te sinu tenā ki te ulu o Iesu mo ana vae kae ne ‵solo ne ia a vae o Iesu ki ana lauulu, ne pusaki mai te manogi gali i te fale kātoa.
Ne kaitaūa te kau soko kae ne fesili atu penei: “Kaia ko fakamāumāu ei te mea tenā?” Kae ne toe fesili atu foki a Iuta te Isikaliota: “Kaia ne seki ‵togi ei te sinu manogi tenei ki se tolu selau tenali, ko ave ei te tupe tenā ki tino ma‵tiva?” Ne seki fia saga tonu atu a Iuta ki tino ma‵tiva, me ne kaisoa sāle ne ia a tupe mai te pokisi tupe telā ne tausi ne te kau soko.
Ne fesoasoani atu a Iesu ki a Malia. “Tuku eiloa i ei!” ko tena fakatonuga. “Se a te mea e fakalavelave fua ei koutou ki te fafine? Se mea gali kae ‵lei tenei ko fai ne ia mo oku. E ‵nofo koutou mo tino ma‵tiva i aso katoa kae i so se taimi e ma‵nako koutou ki ei e mafai o fai se mea ‵lei mō latou, kae ko au e se ‵nofo mo koutou. I te ‵ligiga o te sausau tenei ki toku foitino, ne fai ne ia te mea tenei e fakatoka ei au mo toku tanuga. Au e faipati ‵tonu atu ki a koutou, so se koga e folafola atu ki ei a te tala ‵lei i te lalolagi, e fai mo fakamanatuga ki tino a te mea telā ne fai ne te fafine tenei.”
Ne nofo atu a Iesu i Petania i te 24 tupu itula, kae ko oti ne ‵pa ki tua te tala me ne nofo a ia i konā. Tela la, ne ua‵lolo atu a tino e tokouke ki te fale o Simona ke matea ne latou a Iesu, kae ne fia ‵kilo atu foki latou ki a Lasalo. Tela la, ne fono fakatasi a faitaulaga pule ke tamate ne latou a Iesu, penā foki loa mo Lasalo. Ne fai penā ona ko te mea ne fakatuanaki a tino e tokouke ki a Iesu me ne ‵kilo tonu atu latou ki te tino telā ne toe fakatu aka ne ia mai te mate! Mā‵faga o tino matagā ko takitaki lotu konā! Ioane 11:55–12:11; Mataio 26:6-13; Maleko 14:3-9; Galuega 1:12.
▪ Se a te mataupu ne fai‵pati malosi ki ei a tino i te faletapu, kae kaia?
▪ Kaia e ‵tau ei o fai pelā me ne oko atu Iesu ki Petania i te Aso Lima i lō te Aso Ono?
▪ I te taimi ne oko atu ei a Iesu ki Petania, tefea te koga kāti ne nofo a ia i ei i te Sapati?
▪ Se a te faiga a Malia telā ne tupu mai i ei se kinauga, kae ne fesoasoani atu pefea a Iesu ki a ia?
▪ Ne a mea e fakaasi mai i ei te matagā o takitaki lotu?