Mataupu e 119
Ne Ave ki a Anasa, Oti Loa ne Ave Foki ki a Kaiafa
NE SAISAI a Iesu e pelā me se tagata amio masei, kae ne ‵taki atu a ia ki a Anasa, te tino lauiloa telā ne fai muamua mo fai te faitaulaga pule. A Anasa ne fai mo fai te faitaulaga pule i te taimi ne ofo ei a faiakoga fakalapi i te tamataene, ko Iesu, telā ko 12 ana tausaga, i tena nofoga i te faletapu. Fakamuli ifo, ne fai a nisi tama‵liki tāgata a Anasa mo fai ne faitaulaga pule, kae i te taimi tenā ne maua ei ne Kaiafa a te tofi tenā, kae ko ia ko te avaga a te tamaliki fafine a Anasa.
Kāti ne ave muamua a Iesu ki te fale o Anasa me ko leva ne lauiloa te faitaulaga pule tenā i faifaiga fakalotu a te kau Iutaia. Me ne afe atu latou ki a Anasa ne maua ei ne te faitaulaga pule ko Kaiafa se avanoaga ke fakapotopoto fakatasi te Sanetulini, ko te fono maluga a te kau Iutaia, telā e toko 71 fāmasino ne ‵kau atu ki ei, kae ne fakapotopoto mai foki i konā a molimau ‵loi.
Ne fesili atu te faitaulaga sili ko Anasa ki a Iesu e uiga ki ana soko mo ana akoakoga. Kae ne tali atu a Iesu, penei: “Ko oti au ne faipati atu fakaasiasi ki tino katoa; ko oti foki ne akoako sāle atu au i fale tapuaki mo te Faletapu, i te koga telā e fakapotopoto sāle i ei a tino Iutaia katoa; ne seki faipati funa lele eiloa au ki se mea e tasi. Kae se a te mea e fesili mai ei koe ki a au? Fesili atu ki tino kolā ne fakalogo‵logo ki aku muna, me ne a aku muna ne fai atu ki a latou; e iloa ne latou a mea kolā ne faipati atu ne au.”
I konā loa, e tokotasi te ofisa telā ne tu pili ki a Iesu ne laupāpā ana mata, ana muna: “E pefea eiloa o tali atu koe penā ki te Faitaulaga Pule?”
“Kafai ko ‵se taku faipatiga,” ko te tali a Iesu, “fakamaoni aka la ne koe te ‵se tenā. Kae kafai e tonu taku faipatiga, kaia la ne laupāpā ei au ne koe?” Ko oti te fepakiga tenā, kae ne toe saisai ne Anasa a Iesu kae ne uga atu ki a Kaiafa.
I konā loa, ko kamata ei o maopoopo mai a faitaulaga sili katoa mo toeaina mo faiakoga o te Tulafono, e tonu la, ko te Sanetulini kātoa. E foliga mai pelā me ne maopoopo fakatasi latou i te fale o Kaiafa. E manino eiloa me ne solitulafono latou ki tulafono a te kau Iutaia ona ko te faiga o te fakamasinoga tenā i te po o te Paseka. Kae ne seki taofi aka i ei a takitaki lotu konā i te faiga o te lotou aofaga matagā tenā.
I ne nāi vaiaso mai mua atu i ei, i te taimi ne toe fakatu aka ei ne Iesu a Lasalo, ko oti ne fakaiku aka i ei ne te Sanetulini me e ‵tau o tamate a ia. Kae i te lua o aso mai mua atu i ei, i te Aso Tolu, ne fono fakatasi ei a takitaki lotu ke fai se aofaga ke puke lēmū Iesu kae tamate a ia. Mafaufau la ki ei, ko oti ne fakaiku aka ne latou tena fakasalaga, kae koi tuai o fai tena fakamasinoga!
I konā loa, ne taumafai latou ke sala‵sala aka ne molimau kolā ka avatu ne tala ‵loi ko te mea ke maua ne fakamaoniga ke fakasala ei a Iesu. Kae ne seki maua ne latou ne molimau kolā e fetaui ‵lei olotou tala. Kae oti aka loa, ne ‵tu mai ei a tino e tokolua kolā ne fai atu penei: “Ne lagona ne matou tena muna, ‘Ka ofa ne au a te Faletapu tenei ne faite ne tino, kae i aso e tolu, ka toe faite ake ne au se isi Faletapu telā e se faite ne tino.’ ”
“E a, e seai sau tali e fai mai e uiga mo te mau a tino konei e uiga ki a koe?” ko te fesili a Kaiafa. Kae ne seki faipati eiloa a Iesu. Kae ne mavale foki te Sanetulini i te tala loi tenā, me ne seki mafai o fakafetaui aka ne molimau konā a lā tala. Telā ne ‵kese ei te togafiti telā ne fai ne te faitaulaga pule.
Ne iloa ‵lei ne Kaiafa me e ita sāle te kau Iutaia māfai e fai atu se tino i a ia ko te Tama eiloa a te Atua. Ko oti ne sōna taku fakalua ne latou a Iesu se tino e muna masei ki te Atua kae e ‵tau o fakasala ki te mate, me ne leake latou i a ia ne fai atu me e ‵pau laua mo te Atua. Telā ne faitogafiti ei a Kaiafa kae ne fakatonu atu penei: “Au e fai atu ki a koe i te igoa o te Atua ola, ke tauto mai koe me ko koe ko te Keliso te Tama a te Atua!”
Faitalia me ne a manatu o te kau Iutaia, a Iesu ko te Tama eiloa a te Atua. Kae kafai e seai sena pati, ko tena uiga ka fakauiga ‵se ne latou me ko talia ne ia te manatu me i a ia e se ko te Keliso. Telā ne tali atu penei a Iesu mo te loto toa: “Ao, kae ka matea ne koutou au te Tama a te Tagata e nofo i te feitu fakaatamai, telā ko te feitu tāua o te Atua ‵Malu, e vau i kaumana o te lagi.”
I konā loa, ne fai ne Kaiafa se mea fakapoi, ne saesae ne ia ana gatu kae ne kalaga atu penei: “Ko muna masei a ia ki te Atua! Se a te aogā e toe fia maua ei ne molimau? Ko oti ne lagona ne koutou ana muna ma‵sei ki te Atua! Se a la te otou taofi?”
“Ko sala a ia, kae ko ‵tau foki eiloa o mate,” ko te fakaikuga a te Sanetulini. Telā ne kamata ei o fakalīlī atu latou ki a ia, kae e uke olotou muna ma‵sei ne fai atu ki a ia. Ne laupā‵pā ne latou ana mata kae ne puapuaki atu ki a ia. Ne fakapulou ne nisi tino ana mata kātoa kae ne fusu atu ki a ia kae ne fesili fakatauemu atu ki a ia penei: “Te Keliso, mate mai ake, me ko oi ne kini ne ia koe?” Ne fai a faifaiga fakasauā kae solitulafono konā i te taimi ne fai ei te fakamasinoga i te po. Mataio 26:57-68; 26:3, 4; Maleko 14:53-65; Luka 22:54, 63-65; Ioane 18:13-24; 11:45-53; 10:31-39; 5:16-18.
▪ Ne ave muamua a Iesu ki fea, kae ne a mea ne ‵tupu ki a ia i konā?
▪ Tefea te suā koga ne ave ki ei a Iesu, kae mo a la?
▪ Ne a mea ne fai ne Kaiafa ko te mea ke fakaiku aka ei ne te Sanetulini me e ‵tau o fakasala a Iesu ki te mate?
▪ Ne a faifaiga fakasauā kae solitulafono ne fai i te taimi o te fakamasinoga?