Mataupu e 121

Ne Tu i Mua o te Sanetulini, Kae ne Tu Foki i Mua o Pilato

KO PILI o palele atu te po tenā. Ne fakafiti atu Petelu ki a Iesu i te fakatolu, kae ko oti foki te fakamasinoga fakaloiloi telā ne fai ne tino o te Sanetulini kae ko olo atu keatea latou. Kae i te tafataeao o te Aso Lima, ne toe maopoopo fakatasi latou, i te maneapa o te Sanetulini. Kāti ne ma‵nako latou ke foliga mai me e ‵tonu olotou faifaiga i te fakamasinoga i te po. I te aumaiga o Iesu ki mua o latou, ne fai atu latou penei, e pelā eiloa mo olotou pati i te po: “Kafai koe ko te Keliso, taku mai ki a matou.”

“Kafai e taku atu ne au, e se tali‵tonu eiloa koutou,” ko te tali a Iesu. “Kafai foki e fesili atu au ki a koutou, e se tali mai eiloa koutou.” Kae ne fakaasi atu ne Iesu mo te loto toa me ko oi a ia: “Ka kamata atu nei au te Tama a te Tagata o nofo i te koga tāua ko te feitu fakaatamai o te Atua ‵Mana.”

“Ko koe tenā ko te Tama a te Atua?” ko te mea ne fia iloa ne latou katoa.

“Tenā eiloa e fai mai ne koutou,” ko te tali a Iesu.

Ko lava loa te tali tenā mō tāgata konā, kolā ko oti ne fakaiku aka ke tamate a ia. E ma‵natu aka latou me ne pati masei a ia ki te Atua. “Ko se toe ma‵nako tatou ki se isi molimau!” ko te lotou pati. “Me ko lagona tonu ne tatou ana pati tonu.” Tela la, ne saisai ne latou a Iesu, ne ‵taki keatea a ia, kae ne tuku atu foki a ia ki te kovana Loma ko Ponitio Pilato.

Ne kilokilo atu te tino telā ne fakalata ne ia a Iesu, ko Iuta, ki mea kolā ne ‵tupu. I te taimi ne matea atu ei ne ia me ka fakasala a Iesu, ko fanoanoa eiloa tou tagata. Tela la, ne fanatu a ia ki faitaulaga pule mo toeaina ke fakafoki atu a tupe siliva e 30, ana muna: “Au ko agasala i te fakalataga o te tino e seai sena ‵se.”

“E seai se motou fekau i ei, kae faitalia eiloa koe!” ko te lotou tali sē alofa. Telā ne ‵pei atu ei ne Iuta a tupe siliva konā ki loto i te faletapu kae fano tou tagata o taumafai o noua. Kae kāti ne ‵fati te kaula telā ne ‵sai ki ei ne Iuta te lopu, kae ne to ifo tena foitino ki lalo i kaupapa i te koga i lalo i ei, kae ne mapa mai i ei.

E se iloa tonu ne faitaulaga pule me ne a olotou mea e ‵tau o fai ki tupe siliva konā. Kae ne fakaiku aka latou penei: “E tapu ma tuku a tupe konei ki te fakaputuga o koloa o te Faletapu, i te mea ko te ‵togi o te toto.” Tela la, ko oti ne fono fakatasi latou, kae ne ‵togi aka ne latou se manafa o te tino fai ipu kele, ke tanu ei a tino fakaa‵tea. Telā ne fakaigoa ei te manafa tenā ko te “Laukele o te Toto.”

Koi tafataeao eiloa kae ne ave Iesu ki te palesi o te kovana. Kae ne ita fitifiti a tino Iutaia kolā ne olo atu fakatasi mo ia ma ulu atu ki loto me e ma‵natu aka latou me ka lai‵lai latou ma fesokotaki atu penā ki tino mai Fenua Fakaa‵tea. Tela la, ke loto ma‵lie latou, ne fanatu a Pilato ki tua. “Se a te mea ko ‵moli mai ei ne koutou a te tagata tenei ke fakasala?” ko tena fesili.

“Moi ne seki fai ne ia se agasala, penei e se aumai ne matou a ia ki a koe,” ko te lotou tali.

Ne seki fia numi fakatasi Pilato mo latou, telā ne tali atu a ia penei: “Ave ne koutou, kae fakamasino eiloa ne koutou e ‵tusa mo te otou tulafono.”

Ne fakaasi atu te manakoga o te kau Iutaia ke tamate a ia, i olotou pati konei: “E tapu i a matou o tamate se tino.” A te tonuga loa, moi ne tamate ne latou a ia i te ‵Kaiga o te Paseka, kāti ka ‵teke malosi atu a tino e tokouke ki a latou, me ne āva malosi a tino konā ki a Iesu. Kae kafai e mafai ne latou o fai te kau Loma ke fakasala a ia ki te mate ona ko agasala i mea fakapolitiki, kāti ka se ‵losi atu a tino ki a latou e uiga ki ei.

Tela la, ne seki taku atu ne takitaki lotu a te fakamasinoga telā ko oti ne fai ne latou kae ne fakaiku aka i ei me ne pati masei a Iesu ki te Atua. Kae i konā loa ne avaka ne latou a ‵losiga fou. E tolu vaega o te lotou ‵losiga: “Ne maua ne matou a ia nei [1] ko takitaki ‵se te fenua, [2] ne fakatapu ne ia te faiga o lafoga ki a Kaisala, [3] kae ne fai mai foki me i a ia ko te Keliso te Tupu.”

Ne manavase a Pilato i te pati me ne fai atu a Iesu me i a ia se tupu. Tela la, ne toe ulu atu a ia ki loto i te palesi, kae ne kalaga atu ke vau Iesu kae ne fesili atu penei ki a ia: “A koe ko te tupu o tino Iutaia?” Io me, e mata, ko oti koe ne solitulafono i te faiatuga me i a koe ko te tupu telā e ‵teke atu ki a Kaisala?

Ne fia iloa ne Iesu me e pefea te uke o mea ko oti ne lagona ne Pilato e uiga ki a ia, telā ne fesili atu ei a ia penei: “A te fesili tenei e vau eiloa mai i a koe, io me ne taku atu ne nisi tino ki a koe e uiga ki a au?”

Ne fai atu Pilato me e se iloa ne ia se tala e uiga ki a ia kae e fia iloa fua ne ia te fakamatalaga tonu. Ne tali atu a ia penei: “Au nei se tino Iutaia i tou manatu? Ko tino eiloa o tou fenua mo faitaulaga sili ne tuku mai ne latou a koe ki a au. Se a tau mea ne fai?”

Ne seki taumafai lele eiloa Iesu o fakaseke ki te mataupu tāua, ko te faiga pelā me se tupu. Kāti ne poi malosi a Pilato i te tali telā ne tuku atu ne Iesu ki a ia. Luka 22:66–23:3; Mataio 27:1-11; Maleko 15:1; Ioane 18:28-35; Galuega 1:16-20.

▪ Kaia ne toe maopoopo fakatasi ei te Sanetulini i te taeao tenā?

▪ Ne mate pefea a Iuta, kae ne a mea ne fai ki tupe siliva e 30?

▪ Kaia ne ma‵nako ei te kau Iutaia ke tamate ne te kau Loma a Iesu, kae e se tamate eiloa ne latou?

▪ Ne a ‵losiga ne avaka ne te kau Iutaia e uiga ki a Iesu?