Mataupu e 122

Ne Ave ne Pilato a Ia ki a Helota Kae ne Toe Uga Atu ki a Pilato

E TIGA eiloa ne seki taumafai a Iesu ke ‵funa aka mai i a Pilato me i a ia se tupu, ne fakamatala atu eiloa ne ia me i tena malo e se fakalavelave atu ki te kau Loma. “A toku Malo e se se vaega o te lalolagi nei,” ko muna a Iesu. “Moi fai pelā me se vaega o te lalolagi nei, penei ko taua atu aku tavini i a au mana tuku atu ki tino Iutaia; tela la, a toku malo e se māfua mai te lalolagi nei.” Ne taku atu fakatolu ne Iesu i konā me e isi sena Malo, kae e se maua te malo tenā mai mea faka-te-lalolagi.

Kae ne toe fesili atu a Pilato penei: “Kae ko koe la se tupu?” Ko tena uiga, ko koe la se tupu, faitalia me i tou Malo e se se vaega o te lalolagi nei?

Ne fakailoa atu ne Iesu ki a Pilato me e tonu tena manatu tenā i tena tali tenei: “E penā eiloa mo au muna i a au se tupu. Tenā te mea ne fanau mai ei au, kae ne vau foki ei au ki te lalolagi nei, ke molimau au ki te munatonu. So se tino e kau atu ki te munatonu, e fakalogo mai a ia ki a au.”

E tonu, a te pogai ne vau ei a Iesu ki te lalolagi ko te faiga ke molimau atu ki “te munatonu,” kae maise eiloa ko te munatonu e uiga ki tena Malo. Ko toka ‵lei Iesu ke molimau atu ki te munatonu tenā faitalia me ka mate a ia i ei. E tiga eiloa ne fesili atu a Pilato penei: “Se a te munatonu?” ne seki faka‵tali a ia ke maua a nisi fakamatalaga. Ko lava a mea ne lagona ne ia ke fai ei tena fakamasinoga.

Ne toe foki atu a Pilato ki te vaitino kolā ne faka‵tali i tua o te palesi. Kāti ne tu atu a Iesu i ana tafa, kae ne fai atu a ia penei ki te kau faitaulaga pule mo nisi tino kolā ne ‵nofo fakatasi mo latou: “E se iloa ne au se mea e sala ei te tino tenei.”

Ne kaitaūa te vaitino i te fakaikuga tenā, kae ne kamata o kinau atu latou: “Ko fakamakosu ne ia te fenua i ana akoakoga, e kamata mai i Kalilaia o fano ki Iutaia kātoa, ke oko mai eiloa ki konei.”

Kāti ne ofo malosi a Pilato i te kinau va‵lea mai o te kau ­Iutaia. Tela la, a koi pa‵kalaga mai a faitaulaga pule mo toeaina, ne fuli atu a Pilato ki a Iesu kae ne fesili atu penei: “E a, e se lagona ne koe a mau e uke e ‵tu ki a koe?” Kae ne seki taumafai a Iesu o fai se tali. Ne ofo malosi a Pilato i tena sē manavase faitalia te uke o ‵losiga ne fai atu e uiga ki a ia.

I te taimi ko iloa ei ne Pilato i a Iesu se tino Kalilaia, ne mafaufau tou tagata ki se auala e fakaseke ei a ia ki tena tiute. Ne nofo atu te pule o Kalilaia, ko Helota Anitipa (te tama a Helota te Sili), i Ielusalema mō te Paseka. Telā ne uga atu ei ne Pilato a Iesu ki a ia. Ko oti ne fai ne Helota Anitipa ke ‵kati te ua o Ioane te Papatiso, kae ne mataku a Helota i ei i te taimi ne logo ei a ia i vavega fakaofoofogia kolā ne fai ne Iesu, me ne manavase a ia māfai ko toetu mai a Ioane mai te mate kae ko fai mo fai a Iesu.

Ko se fakatau eiloa i te fiafia o Helota ke maua se avanoaga ke fetaui laua mo Iesu. E se fai pelā me e manavase a ia i mea kolā ka ‵tupu ki a Iesu, io me e fia iloa tonu ne ia me e ‵tonu a ‵losiga e uiga ki a ia me ikai. Kae ne fia kilo atu fua a ia ki a Iesu kae ne fakamoemoe pelā me ka fai ne Iesu se vavega ke matea ne ia.

Kae ne ita a Iesu ma fakamalie aka te manakoga tenā o Helota. A te tonuga loa, e seai lele eiloa se tali ne fai atu ne ia ki fesili a Helota. Ne fanoanoa a Helota i ei, telā ne fakatauemu atu latou mo ana sotia leoleo ki a Iesu. Ne fakapei ne latou ki luga i a ia se gatu ‵lanu malosi kae ne fakalīlī atu ki a ia. Oti aka loa, ne toe uga atu ne latou a ia ki a Pilato. Ona ko te mea tenā, ne fai ei a Helota mo Pilato mo fai ne taugasoa pele, faitalia me ne fai muamua laua mo fai ne fili.

I te fokiatuga a Iesu, ne fakamaopoopo fakatasi ne Pilato a faitaulaga pule, takitaki o te kau Iutaia, mo tino valevale, ana muna: “Ne aumai ne koutou te tagata tenei ki a au, e pelā me se tino e faka‵se ki te fenua, kae kiloke, ko oti ne sukesuke ne au a ia i otou mua, kae seki iloa ne au se mea e sala ei te tagata tenei, i mea ne molimau mai ei koutou e uiga ki a ia. Ne seki maua foki ne Helota se ‵se o Iesu, telā ne toe uga mai ei a ia ki a tatou, me e seai sena mea masei ne fai, e ‵tau ei o mate. Tela la, ka kini ne au a ia, ko ‵tala atu ei.”

Tela la, ne taku fakalua atu ne Pilato me e seai se mea ‵se ne fai ne Iesu. Ne fia fakasaoloto ne ia a ia, me ne iloa ne ia me ne tuku mai fua ne te kau faitaulaga a ia ona ko te loto masei. A koi taumafai a Pilato o fakasaoloto ne ia a Iesu, kae ne maua foki ne ia te suā fakamalosiga telā e sili atu ke fai penā. A koi sagasaga a ia i te nofogaaliki o te fāmasino, ne aumai ne tena avaga se fekau, kae ne fakamalosi atu penei ki a ia: “Mo a eiloa ma fai ne koe se mea ki te tagata amiotonu tenā, me ko oko eiloa i te se toka o toku loto i taku moemiti e uiga ki a ia i te po.”

Kae e mafai pefea ne Pilato o fakasaoloto te tagata sē agasala tenā, e tusa loa mo te mea e iloa ne ia me e ‵tau o fai? Ioane 18:36-38; Luka 23:4-16; Mataio 27:12-14, 18, 19; 14:1, 2; Maleko 15:2-5.

▪ Ne tali atu pefea ne Iesu a te fesili me i a ia se tupu me ikai?

▪ Se a “te munatonu” telā ne molimau atu ki ei a Iesu i tena olaga faka-te-lalolagi?

▪ Se a te fakaikuga o te fakamasinoga telā ne fai ne Pilato, kae ne a mea ne fai ne tino i ei, kae ne a mea ne fai ne Pilato ki a Iesu?

▪ Ko oi Helota Anitipa, kae kaia ne fiafia malosi ei a ia ke matea atu a Iesu, kae ne a ana mea ne fai ki a Iesu?

▪ Kaia ne fia fakasaoloto ei ne Pilato a Iesu?