Mataupu e 133

Ka Fakataunu ne Iesu a Mea Katoa Kolā e Loto te Atua ki ei

KAFAI ko ave keatea ne te Tupu Toa ko Iesu Keliso a Satani fakatasi mo tena lalolagi masei, ka maua mai i ei se pogai tonu ke fia‵fia ki ei! Ka kamata i konā a te Pulega filemu a Iesu i te Afe Tausaga!

Mai lalo i te takitakiga a Iesu mo ana pule lago‵lago, ka teu faka‵lei aka ne tino kolā ka ‵sao atu i Amaketo a mea kolā e ‵toe mai i te fakamaseiga i te taua amiotonu tenā. Kāti ke fai foki ne tino kolā ka ‵sao atu i Amaketo olotou tama‵liki i se vaitaimi, kae ka ‵kau atu foki a tama‵liki konā i te faiga o te lalolagi mo fai se fatoaga gali ‵ki.

Fakamuli loa, ka toe faka‵tu mai ne Iesu te fia miliona o tino mai i olotou tānuga ke fia‵fia foki latou ki te Palataiso gali tenā. Ka fai ne ia te mea tenā ke fakataunu ei tena folafolaga fakamaoni: “Ka oko mai eiloa te taimi . . . a latou katoa kolā e ‵nofo atu i loto i tānuga, ka ulu mai ei ki tua.”

E aofia i a latou kolā ka toe faka‵tu mai ne Iesu ko te pagota mua telā ne mate i ana tafa i luga i te sataulo. Masaua te folafolaga a Iesu ki a ia: “Au e fai tonu atu ki a koe i te aso tenei, me ka ‵nofo fakatasi taua i te Palataiso.” Ikai, e se ave te tagata tenā ki luga i te lagi ke pule e pelā me se tupu fakatasi mo Iesu, kae ka se toe fai foki a Iesu mo fai se tagata ke ‵nofo ­fakatasi mo ia i te lalolagi Palataiso. Kae e fakauiga pelā me ka fakatasi atu a Iesu ki te pagota mua tenā me ka toe fakatu mai ne ia te pagota tenā ki te Palataiso kae ka fakamalie aka ne ia ana manakoga i te feitu faka-te-foitino mo te feitu foki faka-te-agaga, e pelā mo te ata i te suā itulau.

Ke mafaufau faka‵lei ki ei! Mai lalo i te takitakiga alofa a Iesu, ka gasolo o ‵lei katoatoa a tino katoa i te kāiga o tino​—⁠ko tino kolā ka ‵sao atu i Amaketo, olotou tama‵liki, penā foki loa mo te fia afe miliona o tino ‵mate kolā ka toe‵tu mai kae ka faka‵logo ki a ia. E alatu i tena Tama, ko te tupu ko Iesu Keliso, ka nofo fakatasi a Ieova mo tino i te feitu faka-te-agaga. E pelā mo muna a te leo telā ne lagona ne Ioane mai te lagi: “Ka se toe ai ne loimata i olotou mata. Ka se toe ai se mate, se fanoanoa, se tagi io me se ‵mae.” Ka se toe logo‵mae io me masaki se tino i te lalolagi nei.

I te fakaotiga o te Pulega a Iesu i te Afe Tausaga, ka ‵pau eiloa te tulaga o mea katoa e pelā eiloa mo te fuafuaga muamua a te Atua i tena faiatuga ki te tauavaga muamua, ko Atamu mo Eva, ke fanafanau kae ke faka‵fonu te lalolagi. E tonu, ka fonu te lalolagi i vaegā tino amio‵tonu kolā e ‵lei katoatoa. Ka fai penā me ka fakagalue aka te aogā o te taulaga togiola a Iesu ki tino katoa. Ka se toe ai se mate e maua ona ko te agasala a Atamu!

Tela la, ka fakataunu eiloa ne Iesu a mea katoa kolā ne loto a Ieova ke fai ne ia. Kae i te fakaotiga o te afe tausaga, ka fakafoki atu ei ne ia te Malo mo tino ‵lei katoatoa ki tena Tamana. I konā loa, ka toe ‵tala mai ne te Atua a Satani mo ana temoni mai te lua ‵poko telā e se gasue‵sue latou i ei e pelā me ne tino ‵mate. Mo a la?

Ia ko ‵lei, i te fakaotiga o te afe tausaga, a te tokoukega o tino kolā ka ‵nofo atu i te Palataiso ko tino kolā ne toe‵tu mai kae ne seki tofotofogina olotou fakatuanaki. A koi tuai o ‵mate latou, ne seki iloa ne latou a folafolaga a te Atua kae ne seki mafai ne latou o fakatuanaki ki mea konā. Kae i te taimi ne toe‵tu mai ei latou kae ne akoako atu a muna‵tonu mai te Tusi Tapu ki a latou, se mea faigofie ki a latou ke tavini atu ki te Atua i te Palataiso, e aunoa mo ne ‵tekemaiga. Kae kafai ko tuku atu te avanoaga ki a Satani ke taumafai o taofi aka latou mai te tavini atu ki te Atua, e mata, ka tumau latou i te fakamaoni mai lalo i tofotofoga? Ka toe ‵tala mai Satani ke tali mai ei te fesili tenā.

E fakaasi mai i te fakaasiga telā ne avatu ki a Ioane me kafai ko oti atu te Pulega a Iesu i te Afe Tausaga, ka ma‵goi a taumafaiga a Satani ke ‵fuli keatea a tino, kolā e se mautinoa te lotou aofaki, mai te lotou taviniga ki te Atua. Kae kafai ko palele atu te ‵toe tofotofoga, ka fakaseai ki te se-gata-mai a Satani, ana temoni, mo tino katoa kolā e mafai o takitaki ‵se ne ia. I te suā feitu, ka tumau i te ola a tino fakamaoni kolā ka ‵sao atu i te tofotofoga tenā kae ka maua ne latou a fakamanuiaga mai te lotou Tamana faka-te-lagi ke oko eiloa ki te se-gata-mai.

E manino i ei, me e tāua ‵ki te tulaga o Iesu i mea kolā ne fai ne ia, penā foki loa mo mea kolā ka fai ne ia i te fakataunuga o fuafuaga ‵malu a te Atua. Ko tafaga la te gali o te ‵tou manuia i aso mai mua nei ona ko mea katoa kolā ka fai ne ia e pelā me ko te Tupu sili a te Atua i te lagi. Kae e se mafai eiloa ne tatou o puli a mea katoa kolā ne fai ne ia a koi fai a ia mo fai se tagata.

Ne loto malie a Iesu o vau ki te lalolagi kae ne akoako mai ki a tatou e uiga ki tena Tamana. E atea mo mea konā, kae ne fakaasi tonu mai ne ia a uiga tāua o te Atua. Ko fakaosofia ‵tou loto māfai ko mafau‵fau tatou ki tena loto toa sē fuafuagina mo ana uiga malosi, tena poto fakaatea, tena apo e pelā me se faiakoga, tena faiga e pelā me se takitaki sē mata mataku, mo tena alofa mo tena atafai. Kafai e masaua ne tatou tena logo‵mae malosi i te tukumaiga ne ia o te togiola, telā ko te auala fua e tasi e maua ei ne tatou te ola, ko fakamalosigina i ei ‵tou loto ona ko te loto fakafetai ki a ia!

Mā‵faga eiloa o tagata ‵lei tenei ne matea atu ne tatou i te ­iloiloga tenei ki te olaga o Iesu! E mautinoa kae fakaofoofogia tena tulaga sili. Ko fakamalosigina tatou ke toe taku atu a pati a te kovana Loma ko Ponitio Pilato: “Kilo mai! Tenei te tagata!” E tonu, ‘Tenei eiloa te tagata,’ ko te ‵toe tagata sili telā ne ola!

Kafai e talia ne tatou a te fakatokaga o tena taulaga togiola, ka ave keatea mai i a tatou a te amoga ‵mafa o te agasala mo te mate telā ne tuku fakasolo mai i a Atamu, kae ka fai a Iesu mo fai te ‵tou “Tamana ki te se gata mai.” E ‵tau mo tino katoa kolā ka maua ne latou te ola se-gata-mai o maua te iloaga, e se gata fua e uiga ki te Atua tonu, kae penā foki loa mo tena Tama, ko Iesu Keliso. Ke na fesoasoani atu ki a koe tau faitauga mo tau sukesukega ki te tusi tenei ko te mea ke maua ei ne koe te iloaga telā e maua mai i ei te ola! 1 Ioane 2:17; 1:7; Ioane 5:28, 29; 3:16; 17:3; 19:5; Luka 23:43; Kenese 1:28; 1 Kolinito 15:24-28; Fakaasiga 20:1-3, 6-10; 21:3, 4; Isaia 9:6.

▪ Se a te tauliaga fakafiafia loto o tino kolā ka ‵sao atu i Amaketo, fakatasi foki mo olotou tama‵liki?

▪ E se gata fua i tino kolā ka ‵sao atu i Amaketo fakatasi mo olotou tama‵liki, ko oi foki ka fia‵fia ki te Palataiso, kae ka ‵nofo fakatasi pefea a Iesu mo latou?

▪ Ka fai pefea te tulaga o mea katoa i te fakaotiga o te afe tausaga, kae ne a mea ka fai ne Iesu i konā?

▪ Kaia ka toe ‵tala mai ei a Satani mai te lua ‵poko, kae ne a mea ka ‵tupu fakamuli ki a ia, penā foki loa mo tino katoa kolā ka tau‵tali atu ki a ia?

▪ Ka fai pefea a Iesu mo fai te ‵tou “Tamana ki te se gata mai”?