Mataupu e 16

Te Auala e Mafai ei ne Koe o Fakapilipili Atu ki te Atua

1. Ne a mea e matea atu i ei me e ‵pau te lasiga o lotu?

NE OFO malosi se tualisi telā ne āsi atu ki se fenua i Asia e uiga ki sauniga fakalotu ne matea ne ia i te faletapu o te Lotu Putisi. E tiga eiloa ne seki maua atu i konā a fakatusa o Malia mo Keliso, ne tai ‵pau te lasiga o sauniga i konā mo sauniga ne fai sāle i tena fenua. E pelā mo te mea e tasi, ne matea atu ne ia a malele (losalio) mo fakalagi kolā ne fakaaogā i te faiga o ‵talo. Ko oti foki ne matea atu ne nisi tino a vaegā mea penā, kolā e tai ‵pau. Faitalia me ko Fenua ki Saegāla io me ko Fenua ki Togāla, se mea fakaofoofogia me e tai ‵pau a auala e fakaaogā sāle ne tino tapuaki i fenua konā ke fakapilipili atu ei ki te Atua io me ko mea kolā e tapuaki atu latou ki ei.

2. E fakamatala atu pefea te faiga o ‵talo, kae kaia e ‵talo sāle atu ei te tokoukega o tino?

² Kae maise eiloa ko taumafaiga a tino ke fakapili‵pili atu ki te Atua mai i te ‵talo atu ki a ia. Ne fakamatala mai a te faiga o ‵talo e pelā me se “faiga o fesokotakiga i te va o te tagata mo mea ‵malu io me tapu​—ko te Atua, te kau atua, te feitu i luga, io me ko ‵mana kolā e sili atu i tino.” (The New Encyclopædia Britannica) Kae kafai e ‵talo atu a nisi tino ki te Atua, e mafau‵fau sāle latou ki mea kolā e mafai o maua ne latou i ei. E pelā mo te tagata telā ne fesili atu penei ki se Molimau a Ieova: “Kafai e ‵talo atu koe mō au, e mata, ka faka‵lei aka i ei a fakalavelave kolā ko maua ne au i toku kāiga, i taku galuega, penā foki loa mo te malosi o toku foitino?” Kāti tenā loa te manatu o tou tagata. Kae e ‵talo atu te tokoukega o tino, kae tumau eiloa olotou fakalavelave. Tela la, kāti ko fesili atu tatou penei, ‘Kaia e ‵tau ei o fakapili‵pili atu tatou ki te Atua?’

TE POGAI E ‵TAU EI O FAKAPILIPILI ATU KI TE ATUA

3. E ‵tau o ‵talo atu tatou ki a ai, kae kaia e ‵tau ei o fai penā?

³ A te ‵talo e se se faiga telā e fai fua kae e seai sena uiga, kae e se se mea fua e fai ke maua ei a mea. E tasi te pogai tāua e fakapilipili atu ei ki te Atua ko te mauaga o se fesokotakiga ‵lei fakatasi mo ia. Tela la, e ‵tau o fai atu ‵tou ‵talo ki a Ieova te Atua. Ne fai mai penei te tino faisalamo ko Tavita: “E pili faeloa a [Ieova] ki a latou kola e ka‵laga atu ki a ia.” (Salamo 145:18) E ‵kami mai ne Ieova a tatou ke maua se fesokotakiga filemu fakatasi mo ia. (Isaia 1:18) E loto ma‵lie a tino kolā e talia ne latou a te ‵kamiga tenā, ki pati konei a te tino faisalamo: “Kae ki a au, se mea tafasili i te gali te pili ki te Atua.” Kaia? Me i a latou kolā e fakapili‵pili atu ki a Ieova te Atua ka maua eiloa te fiafiaga tonu mo te filemu o te mafaufau.​—Salamo 73:28.

4, 5. (a) Kaia e tāua ei ke ‵talo atu ki te Atua? (e) Se a te vaegā fesokotakiga fakatasi mo te Atua telā e mafai o fakamalosi aka ne tatou mai te faiga o ‵talo?

⁴ Kaia e ‵tau ei o ‵talo atu ki te Atua mō se fesoasoani māfai ‘e lavea ne ia a mea kolā e fia maua ne tatou a koi tuai o fakatagi atu tatou ki a ia’? (Mataio 6:8; Salamo 139:4) E fakaasi atu i te ‵talo me e fakatuanaki tatou ki te Atua kae e ma‵natu aka foki tatou me i a ia ko te Mafuaga o “mea ‵lei katoa kola e maua fua mo meaalofa katoatoa takitasi.” (Iakopo 1:17; Epelu 11:6) E fiafia eiloa a Ieova ki ‵tou ‵talo. (Faataoto 15:8) E fiafia a ia māfai ko lagona ne ia ‵tou pati fakafetai mo vikiga kolā e mafua mai i ‵tou loto, e pelā eiloa mo te fiafia o se tamana māfai e lagona ne ia a pati fakafetai kolā e taku atu ne tena tamā tamaliki mo te loto fakamaoni. (Salamo 119:108) Kafai e ‵lei te va o te tamana mo tena tama, ka ‵gali ei a lā sautalaga. A te tamaliki telā e alofagina e fia sautala eiloa fakatasi mo tena tamana. E penā foki loa te tonuga e uiga ki ‵tou fesokotakiga ki te Atua. Kafai e loto fakafetai tonu tatou ona ko mea kolā e tau‵loto ne tatou e uiga ki a Ieova mo te alofa telā ne fakaasi mai ne ia, ka maua ei ne tatou se manakoga malosi ke fai‵pati atu ki a ia i te faiga o ‵talo.​—1 Ioane 4:​16-18.

⁵ Kafai e fai‵pati atu tatou ki te Atua Tafasili i te Maluga, e ‵tau o fakaasi atu te fakaaloalo, kae e se ‵tau o sōna manava‵se valevale e uiga ki ‵tou pati kolā ka fai atu. (Epelu 4:16) E avanoa faeloa ke fai‵pati atu tatou ki a Ieova. Kae e pefea la te taulia o tatou ke mafai o ‘taku atu ki te Atua’ a mea katoa i ‵tou loto i te faiga o ‵talo! (Salamo 62:8) A te loto fakafetai ki a Ieova e iku atu i ei ki se fesokotakiga ‵lei fakatasi mo ia, e pelā eiloa mo te fesokotakiga telā ne maua ne te tagata fakamaoni ko Apelaamo e pelā me se taugasoa o te Atua. (Iakopo 2:23) Kae kafai e ‵talo atu tatou ki te Aliki Pule o te lagi mo te lalolagi, e ‵tau o talia ne tatou a mea kolā e manako a ia ki ei ke fakapilipili atu ei se tino ki a ia.

MEA E MANAKOGINA KE FAKAPILIPILI ATU KI TE ATUA

6, 7. E tiga eiloa e se manako te Atua ke maua ne tupe ke fakalogo mai ei a ia ki ‵tou ‵talo, ne a mea e manako a ia ki ei māfai e ‵talo atu tatou?

⁶ E mata, e manakogina ne tupe i te faipati atu ki te Atua? E ‵togi sāle ne tino e tokouke a te kau faifeau ke ‵talo atu mō latou. E tali‵tonu foki a nisi tino me ka lagona eiloa olotou ‵talo e tusa loa mo te ‵lasi o olotou meaalofa e lafo atu. Kae e se fai mai lele eiloa te Muna a te Atua me e ‵tau o avatu se meaalofa tupe ko te mea ke fai‵pati atu ei tatou ki a Ieova i se ‵talo. E avanoa faeloa e aunoa mo se ‵togi ana fakatokaga faka-te-agaga mo fakamanuiaga kolā e maua mai i se fesokotakiga fakatasi mo ia i te faiga o ‵talo.​—Isaia 55:​1, 2.

⁷ E a, ne a mea e manakogina? E tasi te mea tāua ko uiga ‵lei o te loto. (2 Nofoaiga Tupu 6:​29, 30; Faataoto 15:11) E ‵tau eiloa o fakatuanaki tatou i ‵tou loto me i a Ieova te Atua ‘e tali mai eiloa ki ‵tou talosaga,’ “kae tuku atu foki ne ia te taui ‵lei ki tino kola e salasala ki a ia.” (Salamo 65:2; Epelu 11:6) E ‵tau foki o loto mau‵lalo tatou. (2 Tupu 22:19; Salamo 51:17) I tena tala fakatusa e tasi, ne fakaasi atu i ei ne Iesu Keliso me ne sili atu te amiotonu o te tagata ao lafoga loto maulalo i tena faipati atu ki te Atua i lō te Falesaio uiga fakamatamata. (Luka 18:​10-14) Kafai e fai‵pati atu tatou ki te Atua i te ‵talo, ke na masaua la, me ‘e takalialia [a Ieova] ki tino fakamatamata.’​—Faataoto 16:5.

8. Kafai e ma‵nako tatou ke tali mai ne te Atua a ‵tou ‵talo, ne a mea e ‵tau o ‵fulu faka‵mā keatea mai i a tatou?

⁸ Kafai e ma‵nako tatou ke tali mai ne te Atua a ‵tou ‵talo, e ‵tau o ‵fulu faka‵mā ne tatou a tatou eiloa mai i ‵tou agasala. I te taimi ne fakamalosi atu ei a Iakopo ki nisi tino ke fakapili‵pili atu ki te Atua, ne fakaopoopo atu ne ia a pati konei: “Fakagata te fai mea masei e tino agasala!” (Iakopo 4:8) E mafai foki ne tino amio ma‵sei o maua se fesokotakiga filemu fakatasi mo Ieova māfai e sala‵mō latou kae tiakina olotou amioga mua. (Faataoto 28:13) E se mafai ne tatou o maua se avanoaga ke fai‵pati atu ki a Ieova māfai e fakaloi‵loi atu tatou me ko oti ne faka‵mā pakipakigina tatou i te feitu faka-te-agaga. E fai mai penei te Muna a te Atua: “Me i [a Ieova] e sagatonu eiloa ona mata ki tino amiotonu, kae fakalogo faeloa ki olotou ‵talo; kae saga fakaatea mai tino kola e fai ne latou te masei.”​—1 Petelu 3:12.

9. Ko oi e ‵tau o ui atu tatou i ei ke olo atu ki a Ieova, kae kaia e ‵tau ei o fai penā?

⁹ E fai mai penei te Tusi Tapu: “E seai se tino i te lalolagi e fai faeloa ne ia te mea tonu kae se mafai o ‵se.” (Failauga 7:20) Ona ko te feitu tenā, kāti ka fesili ifo koe penei: ‘Kafai e penā eiloa, e mafai pefea ne tatou o fakapili‵pili atu ki a Ieova te Atua?’ E tali mai penei te Tusi Tapu: “Kafai e isi se tino e agasala, e iai i a tatou a Iesu Keliso, ko te tino amiotonu, tela e fautua mo tatou ki te Tamana.” (1 Ioane 2:1) Faitalia me i a tatou ne tino agasala, kae e se ‵tau o mā tatou ma fakapili‵pili atu ki te Atua e alatu i a Iesu Keliso, telā ne mate pelā me se togiola mō tatou. (Mataio 20:28) Ko ia fua ko te auala e tasi e mafai o ui atu tatou i ei ke fakapili‵pili atu ki a Ieova te Atua. (Ioane 14:6) E se ‵tau o manatu mā‵mā tatou ki te aogā o te taulaga togiola a Iesu kae agasala faeloa mo te iloa tonu. (Epelu 10:26) Kae kafai e kausaki eiloa tatou ke se amio ma‵sei kae e ‵se sāle tatou i nisi taimi, e mafai eiloa o sala‵mō tatou kae fakamole‵mole atu ki te Atua ke fakamagalo mai. Kafai e olo atu eiloa tatou ki a ia mo te loto maulalo, ka lagona eiloa ne ia tatou.​—Luka 11:4.

AVANOAGA KE ‵TALO ATU EI KI TE ATUA

10. I te faiga o ‵talo, e mafai pefea o fakaakoako atu tatou ki a Iesu, kae ne a nisi taimi e mafai ei o ‵talo atu tatou taki tokotasi?

¹⁰ Ne fakatāua malosi ne Iesu Keliso a tena fesokotakiga mo Ieova. Tela la, ne fakaavanoa sāle ne Iesu a taimi ke faipati atu ki te Atua i ana ‵talo totino. (Maleko 1:35; Luka 22:​40-46) Se mea ‵lei ke fakaakoako atu tatou ki a Iesu kae ke ‵talo sāle atu ki te Atua e pelā me se faiga masani. (Loma 12:12) Se mea ‵tau ke kamata te aso i te faipati atu i se ‵talo, kae koi tuai o ‵moe tatou se mea ‵tau foki ke fakafetai atu tatou ki a Ieova e uiga mo faifaiga i te aso tenā. A koi gasolo atu te aso, ke na fakaiku aka ke “‵talo i taimi katoa.” (Efeso 6:18) E mafai ne tatou o ‵talo atu mai ‵tou loto e aunoa mo te faipati atu ki luga, me e iloa ne tatou me e mafai eiloa o lagona ne Ieova a tatou. Kafai e fai‵pati atu tatou taki tokotasi ki te Atua, ka fakamau‵takitaki i ei te ‵tou fesokotakiga fakatasi mo ia, kae kafai e ‵talo atu tatou ki a ia i aso katoa, ka fesoasoani mai i ei ke momea aka te fakapili‵pili atu o tatou ki a ia.

11. (a) Kaia e ‵tau ei o ‵talo fakatasi a kāiga? (e) Se a tena uiga māfai e fai atu “Amene” i te fakaotiga o te ‵talo?

¹¹ E lagona foki ne Ieova a ‵talo kolā e avatu mō potukau o tino. (1 Tupu 8:​22-53) E mafai ne tatou o fakapili‵pili atu ki te Atua e pelā me se kāiga, māfai e fai te ulu o te kāiga mo fai te sui o te kāiga i te faiga o te ‵talo. E fakamalosi aka i ei te ‵kau fakatasi o te kāiga, kae e fai ei ke tali‵tonu a tama‵liki ki a Ieova e pelā me se tino tonu māfai ko lagona ne latou olotou mātua e ‵talo atu mo te loto maulalo ki te Atua. E a, māfai e ‵talo atu se tino pelā me se sui o se potukau, e pelā mo taimi o fakatasiga a Molimau a Ieova? Kafai ko aofia tatou i te kau fakalogo‵logo, ke na fakalogo‵logo faka‵lei tatou ki ei ko te mea ke mafai ne tatou o fai atu mo te loto kātoa “Amene,” ko tena uiga, “Ke fai penā,” i te fakaotiga o te ‵talo.​—1 Kolinito 14:16.

‵TALO KOLĀ E LAGONA NE IEOVA

12. (a) Kaia e se tali mai ei ne te Atua a nisi ‵talo? (e) Kaia e se ‵tau ei o ‵saga atu fua tatou ki ‵tou manakoga totino māfai ko ‵talo atu tatou?

¹² Kāti e ma‵natu aka nisi tino me e se tali mai ne te Atua olotou ‵talo, faitalia me e ‵talo atu latou ki a ia e alatu i a Keliso. Kae ne fai mai penei te apositolo ko Ioane: “E talia ne [te Atua] manafai e fakatagi tatou ki so se mea e tusa mo tena loto.” (1 Ioane 5:14) Tela la, e ‵tau o fakatagi atu tatou e tusa mo te loto o te Atua. Ona ko te mea e fia saga mai a ia ki te malosi o tatou i te feitu faka-te-agaga, se mea ‵tau ke aofia i ‵tou ‵talo so se mea telā e aofia i ei te ‵tou malosi faka-te-agaga. E ‵tau o ‵teke atu tatou ki te fakaosoosoga ke ‵saga katoatoa atu ki ‵tou manakoga faka-te-foitino. E pelā me se mea e tasi, e tiga eiloa e ‵lei ke ‵talo atu ke maua te poto mo te loto kufaki i te faiga o masaki, e se ‵tau eiloa o faka‵galo aka a manakoga faka-te-agaga ona ko te manava‵se ki te malosi faka-te-foitino. (Salamo 41:​1-3) Me ko iloa ne se fafine Kelisiano e tokotasi me ko tō lasi tena manavase ki tena malosi faka-te-foitino, ne ‵talo atu ei a ia ki a Ieova ke maua se kilokiloga ‵tau ki tena masaki. Ona ko te mea tenā, ne seki toe manavase malosi a ia ki ana fakalavelave e uiga ki tena malosi faka-te-foitino, kae ne manatu aka tou fafine me ne tuku atu ki a ia “te malosi telā e sili atu i te malosi masani.” (2 Kolinito 4:7, NW) Ne momea aka i ei te malosi o tena manakoga ke fesoasoani atu ki nisi tino i te feitu faka-te-agaga, kae ne fai a ia mo fai se tino galue tumau i te talaiatuga o te Malo.

13. E pelā mo te fakaasimaiga i te Mataio 6:​9-13, ne a nisi mataupu ‵lei e mafai o aofia i ‵tou ‵talo?

¹³ Ne a mea e ‵tau o aofia i ‵tou ‵talo ko te mea ke fia fakalogologo a Ieova ki ei? Ne fakaakoako ne Iesu Keliso ana soko ki te auala e ‵tau o ‵talo i ei. I te ‵talo fakaakoako telā ne tusi ki lalo i te Mataio 6:​9-13, ne tuku mai i ei ne ia se fakasologa o mataupu kolā e ‵tau o ‵talo tatou ki ei. Ne a mea e ‵tau o fai mo fai a toe mea tāua i ‵tou ‵talo? E ‵tau o fakamuamua te igoa o Ieova te Atua mo tena Malo. E ‵lei foki te fakamolemole atu e uiga ki mea kolā e ‵tau o maua ne tatou i te feitu faka-te-foitino. Kae e tāua foki te akai atu ke fakamagalo mai ‵tou agasala kae ke faka‵sao tatou mai fakaosoosoga, penā foki loa mo te tino masei, ko Satani te Tiapolo. Ne seki manako a Iesu ke fakalagi aka te ‵talo tenei io me e taku fakafia atu a pati i ei e aunoa mo te mafaufau ‵mafa ki te uiga o pati i ei. (Mataio 6:​7) Se a te vaegā fesokotakiga telā ka maua ne se tamaliki mo tena tamana māfai e ‵pau faeloa a pati e taku atu ne ia ki tena tamana?

14. E se gata fua i pati fakamolemole, ne a nisi ‵talo e ‵tau o avatu ne tatou?

¹⁴ E se gata fua i te fakamolemole atu mo te akai atu mo te loto kātoa, e ‵tau foki o avatu ne tatou a ‵talo o vikiga mo fakafetai. (Salamo 34:1; 92:1; 1 Tesalonia 5:18) E mafai foki ne tatou o ‵talo atu mō nisi tino. A te ‵talo atu mō ‵tou taina mo tuagane faka-te-agaga kolā e ‵nofo fakaa‵lofa io me ko fakasauāgina, e fakaasi atu i ei te ‵tou fia fesoasoani atu ki a latou, kae e fiafia eiloa a Ieova ke lagona ne ia me ko fakaasi atu ne tatou a te vaegā alofa tenā. (Luka 22:32; Ioane 17:20; 1 Tesalonia 5:25) A te tonuga loa, ne tusi mai penei te apositolo ko Paulo: “Sa manava‵se ki se mea, kae fakatagi atu ki te Atua i mea e ma‵nako koutou ki ei, kae fakatagi eiloa i te agaga fakafetai. Ka ko te filemu o te Atua, tela e sili atu i mea e iloa ne tatou, ka tausi faka‵lei ne ia otou loto mo otou mafaufau i a Iesu Keliso.”​—Filipi 4:​6, 7.

KE TUMAU I TE FAIGA O ‵TALO

15. Ne a mea e ‵tau o masaua ne tatou māfai e foliga mai pelā me e se maua se tali ki ‵tou ‵talo?

¹⁵ E tiga eiloa ko gasolo o maua ne koe te iloaga e uiga ki te Atua, kāti ko manatu aka koe me i nisi taimi e se maua se tali ki au ‵talo. Kāti e fai penā me e se tenei te taimi o te Atua ke tali ne ia a te ‵talo eiloa tenā. (Failauga 3:​1-9) Kāti ka talia ne Ieova ke tumau se tulaga penā i se taimi, kae e tali mai eiloa ne ia a ‵talo, kae e iloa foki ne ia te ‵toe taimi ‵lei ke fai penā.​—2 Kolinito 12:​7-9.

16. Kaia e ‵tau ei o tumau tatou i te faiga o ‵tou ‵talo, kae e aogā pefea te mea tenā ki ‵tou fesokotakiga fakatasi mo te Atua?

¹⁶ A te ‵tou tumau i te faiga o ‵talo e fakaasi atu i ei a te ‵tou loto ‵nau e uiga ki te mea telā e taku atu ne tatou ki te Atua. (Luka 18:​1-8) E pelā me kāti ka fakamole‵mole atu tatou ki a Ieova ke manumalo tatou i se vāivāiga. Kafai e tumau tatou i te faiga o te ‵talo tenā kae e amio foki e tusa mo te ‵talo tenā, ka fakaasi atu i ei te ‵tou loto fakamaoni. E ‵tau o mautinoa kae fakamaoni ‵tou pati fakamolemole. Kae maise eiloa te tāua ke ‵talo malosi atu māfai ko fakaosoosogina tatou. (Mataio 6:13) Kafai ko tumau eiloa tatou i te ‵talo atu a koi taumafai foki tatou o taofi aka ‵tou manakoga agasala, ka matea atu i ei ne tatou me ka fesoasoani mai pefea a Ieova. Ka fakamalosi aka i ei te ‵tou fakatuanaki mo te ‵tou fesokotakiga fakatasi mo ia.​—1 Kolinito 10:13; Filipi 4:13.

17. E aogā pefea ki a tatou te uiga o te fia ‵talo sāle māfai ko tavini atu tatou ki te Atua?

¹⁷ Kafai e fakamasani tatou ki te uiga ko te fia ‵talo atu māfai e avatu ne tatou te taviniga tapu ki a Ieova te Atua, ka iloa ei ne tatou me e se tavini atu tatou ki a ia i ‵tou malosi eiloa. Ko Ieova telā e tuku mai ne ia te malosi ke fai penā. (1 Kolinito 4:7) Kafai e iloa tonu ne tatou te mea tenā, ka fesoasoani mai i ei ke loto mau‵lalo tatou kae ka momea aka i ei te ‵lei o te ‵tou fesokotakiga ki a ia. (1 Petelu 5:​5, 6) E tonu, e isi ne pogai ‵lei ke tumau ei tatou i te faiga o ‵talo. A ‵tou ‵talo fakamaoni mo te iloaga tāua e uiga ki te auala e fakapili‵pili atu ei ki te ‵tou Tamana alofa faka-te-lagi ka fai ei ‵tou olaga ke fia‵fia tonu.

E SE SE FEITU FUA E TASI E AOFIA I FESOKOTAKIGA FAKATASI MO IEOVA

18. E mafai pefea ne tatou o fakalogo‵logo ki te Atua?

¹⁸ Kafai e ma‵nako tatou ke lagona ne te Atua ‵tou ‵talo, e ‵tau o fakalogo‵logo foki tatou ki ana pati. (Sakalia 7:13) E se toe aumai ne ia ana fekau e alatu i pelofeta kolā e fakaosofia ne te Atua, kae e se mafai lele eiloa o fakaaogā ne ia a mea faivailakau. (Teutelonome 18:​10-12) Kae e mafai ne tatou o fakalogo‵logo ki te Atua mai i te suke‵suke ki tena Muna, ko te Tusi Tapu. (Loma 15:4; 2 Timoteo 3:​16, 17) E pelā me kāti e ‵tau o fakamasani tatou i te ‵kai ki meakai kolā e aogā mō tatou, e fakamalosi mai foki ki a tatou ke “fia inu ki te tinā susu faka te Agaga.” Ke na fakamalosi aka tou fia kai ki meakai faka-te-agaga mai i te faitau ki te Muna a te Atua i aso katoa.​—1 Petelu 2:​2, 3; Galuega 17:11.

19. Se a te aogā ke mafaufau ‵loto koe ki mea kolā e faitau koe ki ei i te Tusi Tapu?

¹⁹ Ke na mafaufau ‵loto ki mea kolā e faitau ne koe i te Tusi Tapu. (Salamo 1:​1-3; 77:​11, 12) Ko tena uiga ke mafaufau ‵mafa ki fakamatalaga i ei. Kāti e mafai o fakatusa ne koe te mea tenā ki te fakagaluegaga o meakai. E mafai ne koe o fakagalue aka a meakai faka-te-agaga mai te fakafetaui aka o mea kolā e faitau koe ki ei ki mea kolā ko oti ne iloa ne koe. Ke mafaufau ki te aogā o fakamatalaga konā ki tou olaga, io me ke mafaufau malie aka ki mea kolā e fakaasi mai i ei e uiga ki faifaiga a Ieova mo ana uiga. Tela la, mai i te faiga o sukesukega totino e mafai ei ne koe o kai ki meakai faka-te-agaga kolā e tuku mai ne Ieova. Ka fai ei koe ke momea aka tou fakapilipili atu ki te Atua kae ka fesoasoani mai foki ki a koe ke fakafesagai atu ki fakalavelave i aso takitasi.

20. E fesoasoani mai pefea te ‵kau atu ki fakatasiga faka-Kelisiano ke momea aka te fakapili‵pili atu o tatou ki te Atua?

²⁰ E mafai ne koe o fakapilipili atu ki te Atua mai te fakalogologo ki fakamatalaga e uiga ki tena Muna i fakatasiga faka-Kelisiano, e pelā eiloa mo te fakalogo‵logo faka‵lei o te kau Isalaelu i taimi ne maopoopo fakatasi ei latou ke fakalogo‵logo ki te faitauga o Tulafono a te Atua ki tino katoa. A faiakoga i te vaitaimi tenā ne fakamanino atu te uiga o te lotou fai‵tauga ki te Tulafono, kae ne fesoasoani i ei ke maina ‵lei a te kau fakalogo‵logo kae ke fakamalosi aka i ei latou ke fakagalue aka a mea kolā ne tau‵loto latou ki ei. Ne iku atu i ei ki fiafiaga ‵lasi. (Neemia 8:​8, 12) Tela la, ke fakamasani faka‵lei koe ki te kau sāle atu ki fakatasiga a Molimau a Ieova. (Epelu 10:​24, 25) Ka fesoasoani atu i ei ki a koe ke maina i te iloaga e uiga ki te Atua kae ke fakagalue aka foki te mea tenā i tou olaga kae ka maua ne koe i ei a fiafiaga. A te faiga mo fai se vaega o te kau taina Kelisiano i te lalolagi kātoa ka fesoasoani atu ki a koe ke fakapilipili atu faeloa ki a Ieova. E pelā mo mea kolā ka matea atu ne tatou, ka maua eiloa ne koe te tokagamalie tonu i tino o te Atua.

TOFOTOFO AKA TOU ILOAGA

Kaia e ‵tau ei o fakapilipili atu koe ki a Ieova?

Ne a nisi mea e manakogina ke fakapilipili atu ei ki te Atua?

Ne a mea e mafai ne koe o aofia i au ‵talo?

Kaia e ‵tau ei o tumau koe i te faiga o ‵talo?

E mafai pefea ne koe o fakalogologo ki a Ieova i aso nei?

[Ata i te itulau e 157]