Mataupu e Sefululua

Te Uiga Tonu o Tau Papatisoga

1. Kaia e ‵tau ei o fakatāua ne tatou katoa te papatisoga ki te vai?

I TE tausaga ko te 29 T.A., ne papatiso ei a Iesu ne Ioane te Papatiso i te Vaitafe ko te Iolitana. Ne kilo ifo a Ieova kae ne fakaasi atu eiloa ne ia tena fiafia. (Mataio 3:16, 17) Ne tuku mai ei ne Iesu se fakaakoakoga ke tau‵tali atu ki ei ana soko katoa. I te tolu mo te āfa tausaga mai tua ifo i ei, ne avatu ne Iesu te fakatonuga tenei ki ana soko: “Ko oti ne tuku mai ki a au a te pule kātoa i te lagi mo te lalolagi. Tela la, olo atu koutou ki fenua katoa ke fai a tino i ei mo oku soko; papatiso foki latou i te igoa o te Tamana, te Tama mo te Agaga Tapu.” (Mataio 28:18, 19) E mata, ko oti koe ne papatiso e ‵tusa loa mo te fakatonuga tenā a Iesu? Kafai e seki fai penā, e a, e taumafai koe ki ei?

2. Ne a fesili e ‵tau o tali faka‵lei aka e uiga ki te papatisoga?

² Faitalia me ko oti ne papatiso tatou io me ikai, se mea tāua ‵ki ke maina ‵lei tatou katoa i te uiga tonu o te papatisoga, māfai e fia tavini atu tatou ki a Ieova kae e fia ola foki i tena lalolagi fou. E ‵tau o tali faka‵lei aka a fesili konei: E mata, e ‵pau te uiga o te papatisoga o Kelisiano i aso nei mo te uiga o te papatisoga o Iesu? Se a te uiga ke papatiso se tino ‘i te igoa o te Tamana, te Tama mo te agaga tapu’? Ne a mea e aofia i te ola e ‵tusa loa mo te uiga tonu o te papatisoga o Kelisiano ki te vai?

Te Papatisoga Telā ne Fai ne Ioane

3. Ko oi ne ‵tau fua o aofia i te papatisoga a Ioane?

³ I te ono masina a koi tuai o papatiso a Iesu, ne talai atu a Ioane te Papatiso i te koga lavaki i Iutaia, penei: “Ke sala‵mō koutou me ko pili mai te Malo o te lagi!” (Mataio 3:1, 2) Ne lagona ne tino a mea kolā ne faipati ki ei a Ioane kae ne talia foki ne latou. Ne taku ‵tonu atu ne latou olotou agasala, ne sala‵mō, kae ne olo atu foki ki a Ioane ke papatiso ne ia latou i te Vaitafe ko te Iolitana. Ne fai fua te papatisoga tenā mō tino Iutaia.​—Luka 1:13-16; Galuega 13:23, 24.

4. Kaia ne ‵tau ei mo tino Iutaia o sala‵mō fakavave i aso o te kau apositolo?

⁴ Ne ‵tau o sala‵mō fakavave a tino Iutaia konā. I te mauga ko Sinai i te 1513 T.L.M., ne talia ne olotou tupuga se feagaiga telā ne aofia i ei te fenua kātoa​—se feagaiga telā ko oti ne faka‵mautakitaki aka​—fakatasi mo Ieova te Atua. Kae ona ko olotou agasala matagā, ne seki fai faka‵lei ne latou olotou tiute kolā ne aofia i te feagaiga tenā. Ne ‵tau o fakasala latou i ei. I te taimi ne ola ei a Iesu, ne fakamataku ‵ki te lotou tulaga. Me ko pili o oko atu ki a latou “te aso lasi mo te fakamataku” o Ieova telā ne ‵valo mai ne Malaki. I te 70 T.A., ne oko atu “te aso” tenā i te taimi ne fakamalepe ei ne kautau Loma a Ielusalema mo tena faletapu, kae ne tamate foki i ei te toko miliona tupu o tino Iutaia. Ne uga atu a Ioane te Papatiso, telā ne loto finafinau mō te tapuakiga tonu, ko te mea ke ‘fakatoka a tino mō Ieova,’ a koi tuai o oko atu te fakamaseiga o mea katoa konā. Ne ‵tau o sala‵mō latou i olotou agasala kolā ne fai ki te feagaiga o te Tulafono telā ne tuku atu ki a Mose. Kae ne ‵tau foki o fakatoka latou ke talia te Tama a te Atua, ko Iesu, telā ne uga atu ne Ieova ki a latou.​—Malaki 4:4-6; Luka 1:17; Galuega 19:4.

5. (a) Kaia ne fakafesili ei ne Ioane a Iesu i te taimi ne fanatu ei a ia ke papatiso? (e) Se a te uiga tonu o te papatisoga o Iesu?

⁵ Ne aofia foki a Iesu i tino kolā ne olo atu ki a Ioane ke papatiso latou. Kae kaia la? Ne iloa ne Ioane me e seai lele eiloa ne agasala e ‵tau o salamō a Iesu ki ei, telā ne fai atu ei a ia, penei: “E ‵tau au o papatiso ne koe, kae nei ko vau koe ki a au!” Kae e ‵kese te mea telā ne fakauiga ki ei te papatisoga a Iesu. Ne tali atu a Iesu, penei: “Ke fai ake mua penei i te taimi nei. Me tenei te faiga ke fai ei ne tatou a mea katoa kolā e manako ki ei te Atua.” (Mataio 3:13-15) Ona ko te mea e seai ne agasala a Iesu, ne seki fakauiga tena papatisoga ki te salamō ki ana agasala; kae ne seki ‵tau foki o tuku atu ne ia tena ola ki te Atua me ne aofia a ia i te fenua telā ko oti ne tukugina atu katoa ki a Ieova. Kae ne ‵kese eiloa te uiga o tena papatisoga i te taimi ko 30 ei ana tausaga, me ne fakailoa atu i ei me ko toka ‵lei a ia o fai so se mea e loto ki ei tena Tamana faka-te-lagi.

6. Ne fakatāua malosi pefea ne Iesu a mea kolā ne loto te Atua ke fai ne ia?

⁶ Ne loto te Atua ke fai ne Iesu Keliso a nisi galuega mō te Malo. (Luka 8:1) Ne loto foki te Atua ke tuku atu ne Iesu tena ola ‵lei katoatoa pelā me se taulaga telā ne fai mo fai te fakavae o te feagaiga fou. (Mataio 20:28; 26:26-28; Epelu 10:5-10) Ne ola eiloa a Iesu e ‵tusa mo te uiga tonu o tena papatisoga. Ne seki talia ne ia ke saga atu a ia ki nisi mea fakaa‵tea. Ke oko eiloa ki tena mate, ne tumau eiloa a ia i te faiga o te loto o te Atua, kae ne fakamuamua faeloa ne ia te talaiatuga o te Malo o te Atua.​—Ioane 4:34.

Te Papatisoga ki te Vai o Soko Kelisiano

7. Talu mai te Penitekoso i te 33 T.A., ne a mea ne fakatonu atu ki Kelisiano e uiga ki te papatisoga?

⁷ Ko oti ne papatiso ne Ioane ki te vai a tino kolā ne fai fakamuli mo fai ne soko muamua o Iesu kae ne takitaki atu foki ne ia latou ki a Iesu ke fai fakamuli pelā me ne sui o te Malo o te lagi. (Ioane 3:25-30) Ne papatiso foki ne soko konei a nisi tino mai lalo i te takitakiga a Iesu, kae ne ‵pau te uiga o te papatisoga tenā mo te papatisoga telā ne fai ne Ioane. (Ioane 4:1, 2) Ne kamata o fakataunu ne latou te lotou tofiga ke papatiso a tino i ‘te igoa o te Tamana, te Tama mo te agaga tapu’ i te Penitekoso i te 33 T.A. (Mataio 28:19) Ka aogā malosi eiloa ki a koe ke toe mafaufau ki te uiga tonu o te mea tenā.

8. Se a te uiga ke papatiso se tino “i te igoa o te Tamana”?

⁸ Se a te uiga ke papatiso se tino “i te igoa o te Tamana”? E fakauiga pelā me e talia ne te tino tenā te igoa o te Tamana, tena tulaga, tena pulega, ana fuafuaga mo ana tulafono. Mafaufau aka la ki mea kolā e aofia i ei. (1) E fai mai penei te Salamo 83:18, (NW) e uiga ki tena igoa: “Ko koe fua te Atua Sili, ko Ieova, i te lalolagi kātoa.” (2) E fai mai te 2 Tupu 19:15 e uiga ki tena tulaga, penei: “Ko koe fua tokotasi ko te Atua telā e pule i malo katoa o te lalolagi.” (3) E fai mai penei te Fakaasiga 4:11 e uiga ki tena pulega: “Te motou Aliki mo te motou Atua! E ‵tau eiloa o maua ne koe a te ‵malu, te vikiga, mo te ‵mana. Me ne faite ne koe a mea katoa, kae mai i tou loto foki, ne faite ei ne koe a mea ke tino mai kae ke ola foki.” (4) E ‵tau eiloa o amanaia tatou ki a Ieova e pelā me ko te Pogai o te ola, telā ne fakatoka ne ia te auala ke faka‵sao ei tatou mai te agasala mo te mate: “A te manumalo e mai te Aliki [ko Ieova].” (Salamo 3:8; 36:9) (5) E ‵tau foki mo tatou o amanaia ki a Ieova e pelā me ko te Atua Sili telā e tuku mai ne ia a tulafono: “A Ieova ko te ‵tou Famasino, a Ieova ko te ‵tou Tino Fai Tulafono, a Ieova ko te ‵tou Tupu.” (Isaia 33:22, Tusi Paia Samoa) Ona ko ana tofi katoa konā, e fakamalosi mai ei te Tusi Tapu ki a tatou, penei: “E ‵tau mo koe o alofa ki te Aliki tou Atua mo tou loto kātoa, mo tou agaga kātoa, mo tou mafaufau kātoa.”​—Mataio 22:37.

9. Se a te uiga ke papatiso se tino “i te igoa o . . . te Tama”?

⁹ Se a te uiga o te papatisoga o se tino “i te igoa . . . o te Tama? E fakauiga ki te amanaia o te tino tenā ki te igoa o Iesu Keliso, tena tulaga mo tena pulega. A te uiga o te igoa o Iesu e fai penei, “Ieova ko te Fakaolataga.” E ‵kese tena tulaga me i a ia ko te Afutasi a te Atua, ko te uluaki o mea katoa ne faite ne te Atua. (Mataio 16:16; Kolose 1:15, 16) E fai mai te Ioane 3:16 e uiga ki te Tama: “Me ne penā eiloa o alofa mai te Atua ki te lalolagi [o tino kolā e mafai o fakaola], ne tuku mai ei ne ia tena Tama e tokotasi, ko te mea ke se malaia so se tino e fakatuanaki ki a ia, kae ke maua ne ia te ola se-gata-mai.” Ne toe fakaola aka ne te Atua a Iesu kae ne tuku atu foki ki a ia te pulega fou me ne mate eiloa a ia i te fakamaoni. E pelā mo pati a te apositolo ko Paulo, “ne siki ake ei [Iesu] ne te Atua ki te koga e tafa sili i te maluga” i te lagi mo te lalolagi kae e tulaga lua a ia ki a Ieova. “Ona ko te ‵malu o te igoa o Iesu, ko ‵tau o to‵tuli ki ei a tino katoa . . . kae ka taku‵tonu ne tino katoa i a Iesu Keliso ko te Aliki, mō te vikiga o te Atua te Tamana.” (Filipi 2:9-11) E fakauiga i ei me e ‵tau o faka‵logo tatou ki fakatonuga a Iesu, kolā e māfua mai eiloa i a Ieova.​—Ioane 15:10.

10. Se a te uiga ke papatiso se tino ‘i te igoa o te agaga tapu’?

¹⁰ Se a te uiga ke papatiso se tino ‘i te igoa o te agaga tapu’? E fakauiga ki te amanaia o se tino ki gasuesuega mo galuega a te agaga tapu. Kae se a la te agaga tapu? Ko te ‵mana o Ieova, telā e fakaaogā ne ia ke fakataunu ei ana fuafuaga. Ne fai atu a Iesu ki ana soko, penei: “Ka fakatagi atu foki au ki te Tamana, ko uga mai ei ne ia ki a koutou te suā Fesoasoani, ko te Agaga o te munatonu.” (Ioane 14:16, 17) Ne a olotou mea e mafai o fai ona ko te mea tenei? Ne toe fai atu a Iesu ki a latou, penei: “Ka faka‵fonugina koutou i te ‵mana manafai e oko atu ki luga i a koutou a te Agaga Tapu. Ka fai foki koutou mo molimau ki a au i Ielusalema, i Iutaia kātoa mo Samalia, ke oko eiloa ki kapakapālagi o te lalolagi.” (Galuega 1:8) Ne fakamalosi aka foki ne Ieova a tino ke tusi ne latou a te Tusi Tapu e auala i tena agaga tapu: “Me e seai eiloa se talaiga fakapelofeta kai vau mai i te loto eiloa o te tino, ka ko te Agaga Tapu e fakatasi atu ki tino kolā e folafola atu ne latou a te talaiga telā ne aumai mai i te Atua.” (2 Petelu 1:21) Tela la, e amanaia tatou ki te galuega a te agaga tapu māfai e suke‵suke tatou ki te Tusi Tapu. A te suā auala e talia ei ne tatou te agaga tapu ko te fakamolemole atu ki te fesoasoani o Ieova ke fakaasi atu ne tatou a “fua o te Agaga, ko te alofa, te fiafia, te filemu, te kufaki, te mataalofa, te ‵lei, te fakamaoni, te loto malalo, mo te loto pulea.”​—Kalatia 5:22, 23.

11. (a) Se a te uiga tonu o te papatisoga i ‵tou aso nei? (e) E fakauiga pefea te papatisoga ki se tino telā e mate kae toetu aka?

¹¹ I te kamataga o te 33 T.A., a tino Iutaia mo tino kolā ne ‵fuli ki te Lotu Iutaia ko tino muamua kolā ne papatiso e ‵tusa mo te fakatonuga a Iesu. E seki leva, kae ne oko atu foki ki tino Samalia a te avanoaga ke fai ei latou mo fai ne soko Kelisiano. Kae i te 36 T.A., ne fai atu foki te ‵kamiga tenā ki tino mai Fenua Fakaa‵tea kolā e seki pilitome. A koi tuai o papatiso a tino Samalia mo tino mai Fenua Fakaa‵tea, ne ‵tau o tuku atu ne latou olotou ola ki a Ieova kae tavini atu foki ki a ia e pelā me ne soko o tena Tama. Ne tumau eiloa te uiga tenā o te papatisoga o Kelisiano ki te vai, ke oko mai eiloa ki ‵tou aso nei. A te faiga ke ufi kātoa ki lalo se tino i te vai se fakailoga ‵lei o te tukuatuga tenei, me i te papatisoga e fai pelā me e tanu se tino i se auala fakatusa. Kafai e ufi kātoa koe ki lalo i te vai i tau papatisoga, e fakauiga eiloa i ei me ko mate koe ki tou olaga mua. Kae kafai ko fanaka koe mai te vai, e fakauiga i ei pelā me e toe fakatu aka koe mai te mate, ke fai ne koe te loto o te Atua. E ‵tau mo tino katoa kolā e fai mo fai ne Kelisiano ‵tonu o papatiso i te ‘papatisoga e tasi’ tenei. Kafai ko papatiso latou, ko fai ei latou mo fai ne Molimau Kelisiano a Ieova, ko faifeau kolā ne ‵tofi aka ne te Atua.​—Efeso 4:5; 2 Kolinito 6:3, 4.

12. Se a te mea e ‵tai ‵pau mo te papatisoga o Kelisiano ki te vai, kae e pefea la?

¹² E tāua ‵ki eiloa te vaegā papatisoga tenā i te kilokiloga a te Atua. E pelā mo te fakamatalaga a te apositolo ko Petelu e uiga ki te taimi ne faite ei ne Noa te vaka, telā ne ‵sao i ei latou mo tena kāiga i te Lolo. Ne tusi fakamuli mai Petelu, penei: “A te vai tenei se fakatusa e fakauiga ki te papatisoga telā ko fakaola ne ia koutou, e se i te faka‵ma ne ia a lailai mai i otou foitino, kae i te folafolaga ne fai ki te Atua mai te mafaufau ‵lei. A te papatisoga e fakaola ne ia koutou e alatu i te toetu o Iesu Keliso.” (1 Petelu 3:21) A te vaka ne fai mo fai se fakamaoniga tonu me ne fakamaoni eiloa a Noa i te faiga o te galuega telā ne tuku atu ne te Atua ke fai. I te taimi ne palele atu ei a te faitega o te vaka, “ko te vai foki tenā ko te lolo ne fakamasei ne ia a fenua o te lalolagi mua.” (2 Petelu 3:6) Kae ko Noa mo tena kāiga, “e tokovalu fua latou ne ‵sao katoa mai te vai.”​—1 Petelu 3:20.

13. Se a te mea e fakasao mai i ei se Kelisiano i tena papatisoga ki te vai?

¹³ I aso nei, e ‵pau eiloa te uiga o te papatisoga o tino kolā e tuku atu ne latou olotou ola ki a Ieova ona ko te fakatuanaki ki a Keliso telā ne toetu aka. E tumau eiloa latou i te faiga o te loto o te Atua i aso nei kae ne faka‵sao foki latou mai te lalolagi masei tenei. (Kalatia 1:3, 4) Ka se tamate latou māfai ko fakaseai atu te lalolagi matagā tenei. E faka‵sao latou mai i te lalolagi tenei kae e tuku atu foki ne te Atua se loto lagona ‵mā ki a latou. E fakatalitonu mai te apositolo ko Ioane ki tavini a te Atua, penei: “A te lalolagi mo mea katoa i ei kolā e ma‵nako ki ei a tino e palele atu katoa; ka ko te tino telā e fai ne ia a te mea e loto ki ei a te Atua e ola ki te se-gata-mai.”​—1 Ioane 2:17.

Ke Fakamaoni Tatou ki ‵Tou Tiute

14. Kaia e se maua fua ei te fakaolataga i te papatisoga?

¹⁴ Se mea ‵se ke tali‵tonu tatou me e maua fua te fakaolataga i te papatisoga. E fatoā aogā te papatisoga māfai e tuku tonu atu eiloa ne se tino tena ola ki a Ieova e auala i a Iesu Keliso, kae e tumau a ia i te faiga o te loto o te Atua i te fakamaoni ke oko eiloa ki te fakaotiga. “Ka ko te tino e loto mau ke oko ki te ikuga, e ola eiloa a ia.”​—Mataio 24:13.

15. (a) Se a te loto o te Atua mō Kelisiano kolā ko oti ne papatiso i aso nei? (e) E pefea te tāua ke fai tatou mo fai ne soko Kelisiano?

¹⁵ Ne ‵tau o fakaaogā ne Iesu tena olaga e ‵tusa loa mo te loto o te Atua. Ne ‵tau o mate a ia e pelā me se taulaga. E ‵tau o tuku atu ne tatou ‵tou foitino mo fai ne taulaga ola ki te Atua, kae ke fai ne tatou te loto o te Atua faitalia me ne a mea faiga‵ta e oko mai i ei. (Loma 12:1, 2) E mautinoa eiloa me e se fai ne tatou te loto o te Atua māfai e fakaakoako atu tatou ki amioga a tino o te lalolagi nei i nisi taimi, io me e ‵saga atu faeloa tatou ki ‵tou manakoga, kae e fai fakaloiloi fua te ‵tou taviniga ki te Atua. (1 Petelu 4:1-3; 1 Ioane 2:15, 16) I te taimi ne fesili atu ei se tino Iutaia me ne a ana mea e ‵tau o fai ke maua ei ne ia te ola se-gata-mai, ne fakaasi atu ne Iesu te tāua o amioga ‵mā. Kae ne toe fakasino atu foki a ia ki te suā mea telā e tāua atu, ko te fai mo fai se soko Kelisiano, io me se tino e tautali atu ki a Iesu. Tenā eiloa te ‵toe mea tāua i te olaga. E ‵tau o fakamuamua te mea tenā i lō te kausaki atu ki koloa.​—Mataio 19:16-21.

16. (a) Se a te tiute e maua ne Kelisiano katoa e uiga ki te Malo? (e) E pelā mo mea e fakaasi mai i te itulau e 116 mo te 117, ne a nisi auala ma‵goi kolā e fai ei te galuega talai o te Malo? (i) Se a te mea e fakamaoni atu ne te ‵tou ‵kau atu mo te loto kātoa ki te galuega talai?

¹⁶ E ‵tau o toe faka‵mafa atu te manatu me ne manako te Atua ke fai ne Iesu a nisi galuega tāua mō tena Malo. Ne ‵tofi aka Iesu ke fai mo fai te Tupu. Kae i te taimi ne nofo ei a ia i te lalolagi nei, ne molimau atu a ia mo te loto finafinau e uiga ki te Malo. E fai foki ne tatou se galuega talai telā e tai ‵pau, kae e ‵tau eiloa o ‵kau atu tatou ki ei mo te loto kātoa. Kafai e fai tatou penā, e fakaasi atu ei ne tatou te ‵tou amanaia ki te pulega sili a Ieova, penā foki loa mo ‵tou a‵lofa ki ‵tou taina. (Mataio 22:36-40) E fakaasi atu foki ne tatou me e ‵kau fakatasi tatou mo ‵tou taina, kolā e fai mo fai ne tino talai o te Malo, i te faiga o te tapuakiga i te lalolagi kātoa. E ‵kau fakatasi tatou katoa i te lalolagi kātoa, i te kausaki atu ki te fakamoemoega o te ola se-gata-mai i te lalolagi mai lalo i te pulega a te Malo.

Ke Toe Sau‵tala ki Manatu Konei

• Ne a mea e tai ‵pau mo mea kolā e tai ‵kese ei te papatisoga o Iesu mo te papatisoga o tino ki te vai i aso nei?

• Se a te uiga ke papatiso se tino ‘i te igoa o te Tamana, te Tama mo te agaga tapu’?

• Ne a mea e aofia i te ola e ‵tusa loa mo te papatisoga o Kelisiano ki te vai?

[Ata i te itulau e 116, 117]

NISI AUALA KE FOLAFOLA ATU EI TE MALO

Mai fale ki fale

Ki ‵tou kāiga

I te koga galue

I te akoga

I auala

Mai te ‵toe āsi atu ki tino fia‵fia

I akoga faka-te-Tusi Tapu i fale o tino