Talavou—Ne a Otou Fakamoemoega mō Aso Mai Mua?

“EFIA fakaaogā ne au toku olaga i te ‵toe auala ‵lei.” Ko pati a se tamāfine e tokotasi. E seai se fakalotolotolua me e manako foki koe o fai penā. Kae e mafai pefea ne koe o fakaaogā tou olaga i te “‵toe auala ‵lei”? E fai mai ne faka‵pulaga i televise mo letio, pelā foki mo ou taugasoa mo faiakoga me kafai e maua ne tatou a tupe e uke mo se galuega takutakua, ka manuia i ei tatou!

E polopoloki mai a te Tusi Tapu ki talavou me kafai e kausaki atu ki mea faka-te-foitino e ‵pau eiloa te faiga tenā mo te tino telā “e fano o afuli te matagi.” (Failauga 4:4) A te pogai e tasi e mafau‵fau ei tatou penā, me ko oti ne lavea atu me e toko timomo fua talavou e maua ne latou a te maumea mo galuega takutakua. Kae e fanoa‵noa malosi sāle a talavou konā. “E fai fua te manuia i mea faka-te-foitino e pelā me se atigi kāpa,” ko pati a se talavou mai Peletania telā ne maua ne ia se galuega takutakua. “Kafai e fātio atu koe ki loto, e seai ne mea i loto i ei.” E tonu, e mafai o maumea io me takutakua se tino māfai e isi sena galuega. Kae e se mafai o fakataunu katoatoa i ei ou manakoga “faka te Agaga.” (Mataio 5:3) E fakailoa mai foki ne te 1 Ioane 2:17 me i “te lalolagi mo mea katoa i ei kola e ma‵nako ki ei a tino e palele atu katoa.” Kae kafai e manuia au taumafaiga, e se tumau a mea konā.

E fakamalosi mai a te Failauga 12:1 ki talavou, penei: “Ke masaua ne koutou a te Atua tela ne faite ne ia koutou, i aso konei koi tupu ake ei koutou.” E tonu, a te ‵toe mea ‵lei ke fai i tou olaga ko te tavini atu ki a Ieova te Atua. Kae e ‵tau o fakatoka muamua koe mō te galuega a te Atua. E mafai pefea o fai koe penā? Kae ne a mea e aofia i te galuega a te Atua?

Ke Toka Koe o Fai Pelā me se Molimau a Ieova

Muamua la, e ‵tau o fakamalosi aka ne koe a te manakoga ke galue mō Ieova—kae e se sōna maua fua ne koe a te manakoga tenā, faitalia foki loa me e fai ou mātua mo fai ne Kelisiano. E ‵tau eiloa o ati aka ne koe se va fakataugasoa mo Ieova. “E fesoasoani atu a te faiga o ‵talo ke maua ne koe se va fakataugasoa mo Ieova,” ko pati a se tamāfine mai Peletania.—Salamo 62:8; Iakopo 4:8.

E fakaasi mai i te Loma 12:2 a te suā mea e ‵tau o fai ne koe. E fai mai, penei: “Ke fakatalitonu ne koutou me se a te loto o te Atua, te mea ‵lei, te mea e logomalie mo te gali.” Kai fakalotolotolua aka eiloa koe ki mea kolā ne akoako atu ki a koe? Ke na fakalogo la ki te fakamalosiga a te Tusi Tapu kae ‘fakatalitonu aka eiloa ne koe’ a te ‵tonu o mea konei! Ke fai eiloa au sukesukega totino. Ke faitau koe ki te Tusi Tapu mo tusi faka-te-Tusi Tapu. A te tauloto e uiga ki te Atua e se maua fua i ei te poto. Kae e ‵tau foki o fakamāumāu a taimi e uke ke mafaufau faka‵lei ki mea ne faitau ne koe ko te mea ke ‵goto tonu ifo ki tou loto. Ka momea aka i ei te lasi o tou alofa ki te Atua.—Salamo 1:2, 3.

A te suā mea e ‵tau o fai ne koe, ke fakamatala atu a mea kolā e tauloto ne koe, i so se taimi, kāti ki ou taugasoa i te akoga. A te talai atu mai fale ki fale ko te suā mea e ‵tau o fai. E tonu, e mafai o mā koe i te taimi muamua e fetaui ei koe mo sou taugasoa i te galuega talai. Kae e fakamalosi mai a te Tusi Tapu ki a tatou ke “se ma i te tala ‵lei.” (Loma 1:16) E avatu ne koe a te fekau e uiga ki te ola mo se fakamoemoega! Kaia fua la e mā ei koe?

Kafai ou mātua ne Kelisiano, e se taumate ko oti ne kau atu koe ki a laua i te faiga o te galuega tenei. E mata, ka mafai o momea aka te uke o au mea e fai i ei, i lō te tu atu fua i te mataloa e aunoa mo se pati io me ofo atu ne koe se mekesini io me se tamā pepa? E mata, e mafai ne koe o faipati atu ki te tino i te fale kae fakaaogā a te Tusi Tapu ke akoako atu ei a ia? Kafai e se mafai, ke fakamolemole atu ki ou mātua io me se tino i loto i te fakapotopotoga ke fesoasoani atu ki a koe. Taumafai malosi ke toka koe o fai mo fai se tino talai seki papatiso o te tala ‵lei!

Fakamuli loa, ka fakaosofia koe ke fai tau tukuatuga—i te faiga o se tautōga ki te Atua me ka galue koe mō ia mai te taimi tenā o fano ki mua. (Loma 12:1) Kae ko te faiga o te tukuatuga, e se se mea totino fua. E manako te Atua ke ‘molimau ‵tou laugutu, ke fakaolagina ei tatou.’ (Loma 10:10) I te taimi o te papatisoga, e ‵tau o taku atu muamua ne koe tau fakaikuga i mua o tino, ko fatoā papatiso ei koe ki te vai. (Mataio 28:19, 20) Kae ui ei e tāua ‵ki eiloa a te papatisoga, kae ke mo a eiloa ma fakatalave koe ne te manatu me e mafai o toe fai ne koe se mea masei. Kafai e fakalagolago koe ki te Atua, ka tuku atu eiloa ne ia ‘te malosi telā e sili atu i te malosi masani’ ke fesoasoani atu ki a koe ke tu ‵mautakitaki i te fakatuanaki.—2 Kolinito 4:7; 1 Petelu 5:10.

Kafai ko oti koe ne papatiso, ko fai ei koe mo fai se Molimau a Ieova. (Isaia 43:10) Ka ‵fuli malosi i ei tou olaga. E aofia i tau tukuatuga a te sē ‘mafaufau ki a koe eiloa.’ (Mataio 16:24) Kāti ka tiakina ne koe a nisi mea kolā ne fakamoemoe koe ki ei kae ‘‵sala ki te Malo o te Atua.’ (Mataio 6:33) E uke ‵ki a avanoaga e mafai o kausaki ki ei mai tua o tau tukuatuga mo te papatisoga. Ke onoono tatou ki nisi avanoaga konā.

Avanoaga ke Galue Tumau i te Taviniga ki te Atua

● A te galue e pelā me se paenia se avanoaga gali e tasi. A te paenia se Kelisiano papatiso telā e ‵lei ‵ki ana amioga, kae e fakaiku aka ne ia ke fakamāumāu a itula e 70 io me e uke atu i masina takitasi ke talai atu ei te tala ‵lei. A te uke o taimi e fakamāumāu i te galuega talai ka fesoasoani atu ei ke ati aka ne koe tou atamai i te talai mo te akoako atu. Ko oti ne fesoasoani atu a paenia e tokouke ki olotou akoga faka-te-Tusi Tapu ke fai mo fai ne Molimau papatiso. Se a foki la te suā galuega ‵togi telā e mafai o maua ne koe i ei te fiafia mo te lotomalie?

E ga‵lue a te tokoukega o paenia i nisi aso ke maua olotou tupe tausi. E fakaakoako a tino e tokouke ki te faiga o se galuega i te akoga io me mai i olotou mātua, ke fakatoka ei latou mō te galuega tenei. Kafai e mafau‵fau ou mātua ke fai ne au akoakoga fakaopoopo māfai ko oti au akoga lasaga lua, ke mo a ma fakamoemoe koe ke maua a tupe e uke, kae ke ‵lago malosi atu i ei ki tau galuega talai kae kāti ke tavini atu e pelā me se faifeau galue tumau.

Kae e se fakavae a te olaga o te paenia ki tena galuega ‵togi, kae ko te fesoasoani atu ki nisi tino ke maua ne latou a te ola! Kaia e se kausaki atu ei koe ki te galuega faka-paenia? E iku sāle atu a te galuega paenia ki nisi tauliaga. E olo atu a nisi paenia ki kogā koga kolā e manakogina malosi i ei a tino talai o te Malo. E tau‵loto a nisi paenia ki nisi ‵gana kae ga‵lue i fakapotopotoga io me ko fenua kolā e fakaaogā a ‵gana konā. E tonu, ka uke a fakamanuiaga e maua ne koe mai te galue e pelā me se paenia!

● A te Akoga mō Tauavaga Kelisiano se avanoaga foki e tasi. E tuku atu ne te akoga tenei ki tauavaga a akoakoga fakapito ko te mea ke mafai o fakaaoga katoatoa latou ne Ieova mo tena fakapotopotoga. E ‵tofi aka a tauavaga e tokouke kolā ne iku mai i ei, ke tavini atu i koga kolā e manakogina malosi i ei a tino talai i olotou fenua eiloa. E mafai o maua ne nisi tino se tōfiga ke ga‵lue i nisi fenua māfai e fetaui ‵lei mo olotou fakanofonofoga. E mafai o tavini atu a tino kolā ko oti mai te akoga ke tavini atu pelā me ne paenia fakapito sē tumau ke ‵tala aka kae fakamalosi aka te galuega i fenua fo‵liki mo koga ‵mao mai te fa‵kai.

● Ne fai a te Akoga mō Taina Taka ke fakaa‵koga i ei a toeaina mo tavini fakafaifeau kolā e fetaui ‵lei kae e seki a‵vaga. E aofia i te akoga tenei telā e valu vaiaso te leva a vaegā mataupu e pelā mo tiute o toeaina mo tavini fakafaifeau, te fakatokaga o mea, mo te faiga o lauga. Ne ‵tofi aka a nisi tino ke ga‵lue eiloa i olotou fenua. Kae e ‵tofi aka a nisi tino ke ga‵lue i nisi fenua.

● E aofia i te galue i te Peteli ko te galue fakagāmua i ofisa lagolago o Molimau a Ieova. E isi ne tino o te kāiga Peteli e ga‵lue i te faiga o tusi faka-te-Tusi Tapu. E fesoasoani atu a nisi tino ki a latou i te faitega o mea ma‵sei o fale mo masini pelā foki mo te tausiga o te kāiga Peteli i te feitu faka-te-foitino. A tiute katoa konei ne tauliaga tāua ‵ki eiloa i te galuega a Ieova. I tafa i ei, e fia‵fia a te kau o te Peteli me e iloa ne latou me e aogā a mea kolā e fai ne latou ki olotou taina i te lalolagi kātoa.

I nisi taimi e ‵kami mai a nisi taina kolā e isi se lotou atamai fakapito ke ga‵lue i te Peteli. Kae e akoakogina a te tokoukega o latou māfai ko ‵mai ki te Peteli. E se tavini atu a tino i te Peteli ke maua fua a kope faka-te-foitino, kae e lotoma‵lie latou ki mea‵kai, potu ‵moe mo mū tupe kolā e maua ne latou. E fakamatala mai ne se talavou tena galuega i te Peteli, penei: “‵Pisi loa! E tiga eiloa e se se mea faigofie ke tautali atu ki te polokalame masani, e uke ‵ki a fakamanuiaga ne maua ne au i ei.”

● A te galue i galuega fakatu‵tu i te lalolagi kātoa se avanoaga e tasi ke mafai ei ne tatou o ‵kau atu ki te faitega o ofisa lagolago e pelā foki mo Kingdom Halls. E faima‵laga a taina kolā e ga‵lue i galuega fakatu‵tu ki nisi fenua o fesoasoani atu i ei. A te mea tenei se galuega taulia telā e tai ‵pau mo te galuega a tino kolā ne faite ne latou te faletapu o Solomona. (1 Tupu 8:13-18) E ‵pau eiloa te lotou tausiga mo te kāiga Peteli. Ko oko eiloa te taulia o taina mo tuagane konei ke tavini atu i te vaega tenei o te galuega ke avatu i ei a vikiga ki a Ieova!

Ke Tavini Katoatoa Atu ki a Ieova

A te galue mō Ieova ko te ‵toe mea ‵lei eiloa ke fai i tou olaga. Kaia e se fai ei ne koe sau fuafuaga ke tavini atu ki te Atua mai te kau atu ki te galuega tumau? Ke sau‵tala fakatasi mo ou mātua, toeaina i te fakapotopotoga, mo te toeaina asiasi e uiga ki te taviniga tumau. Kafai e fia galue koe i te Peteli, te Akoga mō tavini taka, io me ko te Akoga mō Tauavaga Kelisiano, ke kau atu koe ki fono kolā e fai sāle mō tino kolā e mafau‵fau ki tauliaga konei, kae e fai sāle i te āsiga a te toeaina asiasi mo fono ‵lasi.

E se ko tino katoa e toka io me e avanoa ke ga‵lue tumau. I nisi taimi, e mu‵tana a mea e mafai o fai ne se tino ona ko masaki, tulaga i mea tau tupe mo tiute faka-te-kāiga. Kae ui ei, e ‵tau mo Kelisiano tukugina atu katoa o tau‵tali ki pati polopoloki mai te Tusi Tapu, konei: “E ‵tau mo koe o alofa ki te Aliki tou Atua mo tou loto katoa, mo tou agaga katoa, mo tou mafaufau katoa.” (Mata. 22:37) E manako a Ieova ke fakaoti ou mafi ki ei. Tela la, faitalia tou tulaga i te taimi nei, ke na fakamuamua faeloa ne koe a te taviniga ki a Ieova i tou olaga. Ke kausaki atu faeloa ki fakamoemoega faka-te-agaga. E tonu, kafai e “masaua ne koutou a te Atua tela ne faite ne ia koutou, i aso konei koi tupu ake ei koutou,” ka maua ei ne koutou a fakamanuiaga ki te se-gata-mai!

A tusi siki katoa ne siki mai i te Tusi Tapu i te ‵Fuliga o te Lalolagi Fou seiloga ke fakailoa atu me e se penā.