MATAUPU E 8
E Maua Pefea ne Au a Taugasoa ‵Lei?
“Kafai au ko kaitaua, e manako au o faka‵tu oku ita ki se tino. Kafai e fanoanoa au, e manako au ke fai mai se tino me ka ‵lei a mea katoa. Kafai au e fiafia, e manako au ke fakaasi atu ki se tino. Ki a au loa, a taugasoa ne mea tāua.”—Brittany.
I TE taimi koi foliki ei koe, ne manako koe ki nisi tama‵liki ke ta‵fao tasi mo koe. Ne o‵mai o ta‵fao mo koe ke mo a ma tafao tokotasi koe. Kae nei la, ko manako koe ki taugasoa ‵tonu—se tino ke fesokotaki sāle koe ki ei kae ‵pau a mea kolā e fakatāua ne koulua.
E se gata i ei, e fai mai te Tusi Tapu me i “te taugasoa tonu e fakaasi atu ne ia te alofa i taimi katoa kae fai pelā me se taina ne fanau mai mō taimi o te puapuaga.” (Faataoto 17:17) Kāti e fakamatala mai i konei se va fakataugasoa tai ‵loto i lō tou soa tafao i te taimi koi foliki ei koe!
Manatu tonu: I te taimi e gasolo aka ei koe o matua, ka manako koe ki ne taugasoa kolā e
1. Maua ne latou a uiga ‵gali
2. Ola i se olaga ‵ma
3. Maua ne koe mai i ei a fakamalosiga ‵lei
Fesili: E maua pefea ne koe a taugasoa kolā e fetaui ‵tonu mo mea konā? Ke mafau‵fau tatou ki manatu takitasi konei.
Manatu mō se Taugasoa ‵Lei #1—Uiga ‵Gali
Mea e ‵tau o iloa ne koe. E se ko tino katoa kolā e fai mai me i a ia se taugasoa e mafai o fai pelā me se taugasoa tonu. Ke oko ki te Tusi Tapu, e fai mai me e “isi ne takaga e toka o tuki pala te suā tino.” (Faataoto 18:24) Kāti e ‵tagi ‵mafa te mea tenā. Ke mafaufau la: Kai isi aka loa se tino telā ne fia fai “taugasoa” fakaloiloi atu ke maua fua se mea ‵lei mai i a koe? Kae e pefea a ia telā e fakamasei lēmū io me fakasalalau atu a tala ‵loi e uiga ki a koe? E mafai o seai sou loto talitonu ki se vaegā taugasoa penā.a Ke masaua faeloa me e sili atu te tāua ke maua a taugasoa ‵lei i lō te uke o ou taugasoa!
Mea e mafai ne koe o fai. Ke filifili ou taugasoa mai tino kolā e mafai o fakaakoako koe ki olotou uiga ‵gali.
“Ne fia‵fia a tino katoa ki toku taugasoa ko Fiona. E manako foki au ko tino ke fai‵pati penā e uiga ki a au. E manako foki au ke fai pelā mo ia. Se mea gali ‵ki ki a au te mea tenā.”—Yvette, 17.
‵Tofo ki te mea tenei.
1. Faitau te Kalatia 5:22, 23.
2. Fesili ifo, ‘E mata, e maua ne oku taugasoa a uiga kolā e aofia i “fuataga o te agaga”?’
3. Tusi mai lalo a igoa o ou taugasoa ‵pili. I tafa o igoa takitasi, tusi tena toe uiga sili.
Igoa
․․․․․
Uiga
․․․․․
Masaua: Kafai fua e ‵sae aka uiga sē ‵lei, kāti tenei te taimi ke ‵sala ki taugasoa tai ‵lei atu!
Manatu mō se Taugasoa ‵Lei #2—Olaga ‵Ma
Mea e ‵tau o iloa ne koe. Ko te lasi o tou manako malosi ke maua ne taugasoa, ko te talia vave foki ne koe a taugasoa sē ‵lei. E fai mai te Tusi Tapu: “Te tino telā e fai mea fakatasi mo tino va‵lea ka iku atu ki te masei.” (Faataoto 13:20) A “tino va‵lea” e se fakauiga ki tino kolā e se ‵lei olotou kai i te akoga io me kolā e se ‵poto. Kae ko tino kolā e fulitua atu ki manatu ‵lei kae e tau‵tali atu ki se olaga fai amioga ma‵sei. Konā a taugasoa kolā e mafai o tiaki ne koe!
Mea e mafai ne koe o fai. I lō te fai taugasoa fua ki so se tino, ke kai filifili koe. (Salamo 26:4) Ikai, e se ko tena uiga me e ‵tau mo koe o fakailoga tino. A te kai filifili i konei e fakauiga ki tou atamai ke lavea faka‵lei atu a “te ‵kese o te tino amiotonu mo te tino amio masei, te tino e tavini atu ki te Atua mo te tino e se tavini atu ki a ia.”—Malaki 3:18.
“E fakafetai au ki oku mātua me ne fesoasoani mai ke maua a taugasoa—kolā e kautama mo au kae ma‵losi faka-te-agaga.”—Christopher, 13.
Tali a fesili konei:
Kafai e ‵nofo au mo oku taugasoa, e mata, e manavase au i te mea ma fakamalosi mai ke fai se mea telā e iloa ne au me e se ‵tau o fai?
□ Ao
□ Ikai
E mata, e fakatalave au o fakafetaui oku taugasoa ki oku mātua i te mea ma se fia‵fia a lāua ki a latou?
□ Ao
□ Ikai
Masaua: Kafai tau tali ki fesili mai luga ko te ao, ‵sala ki taugasoa kolā e ma‵luga atu olotou tulaga i mea tau amioga—kolā e fai mo fakaakoakoga ‵lei i te olaga faka-Kelisiano.
Manatu mō se Taugasoa ‵Lei #3—Fakamalosiga ‵Lei
Mea e ‵tau o iloa ne koe. E fai mai te Tusi Tapu: “A taugasoa ma‵sei e fakamasei ne latou te amio ‵lei.” (1 Kolinito 15:33, Tusi Tapu, Tuvalu) E fai mai se talavou e igoa ki a Lauren: “E fia‵fia mai a tama‵liki i te akoga māfai e fai ne au a mea kolā e fai mai latou ke fai ne au. Ne seai ne oku taugasoa, telā ne fai ei au pelā mo latou ko te mea ke fia‵fia mai.” Ne iloa ne Lauren me kafai e tautali koe ki tulaga o nisi tino, ko fai eiloa koe pelā me se manu faka‵tolo, telā e fakagasuesue fua e ‵tusa mo te manakoga o latou. E ‵tau o ‵lei atu koe i lō te mea tenā!
Mea e mafai ne koe o fai. Fakagata te fai taugasoa mo tino kolā e ‵losi mai ke tautali atu koe ki olotou vaegā olaga. Kafai e fai ne koe te mea tenei, kāti ka se uke ou taugasoa; kae ka ‵lei atu ou lagonaga, kae ka maua ne koe a avanoaga e uke ke fai a taugasoa tai ‵lei atu—ko latou kolā ka fakamalosi atu ki a koe i se auala ‵lei.—Loma 12:2.
“A toku taugasoa pili ko Clint, ko ia loa ko ‵lei ana faka‵tauga kae loto malamalama, tela la, ne fai a ia mo fai te ‵toe fakamalosiga sili ki a au.”—Jason, 21.
Ke fesili ifo penei:
E mata, e ‵fuli ne au oku vaegā gatu, taku vaegā faipati, io me fai se mea masei ke fakafiafia atu fua ki oku taugasoa?
□ Ao
□ Ikai
E mata, e fanatu au ki koga sē ‵lei kolā e se fanatu sāle au ki ei māfai e ‵galo oku taugasoa?
□ Ao
□ Ikai
Masaua: Kafai tau tali ko te ao ki fesili mai luga, fano ki ou mātua io me se tino matua faka-te-agaga ke maua ne pati fakatonutonu mai i ei. Kafai koe se tokotasi o Molimau a Ieova, e mafai foki o fanatu koe ki se toeaina Kelisiano kae fai atu me e manako koe ki se fesoasoani i te filifiliga o taugasoa kolā ka maua ne koe a fakamalosiga mai i ei.
FAITAU KI MEA E UKE ATU E UIGA KI TE MATAUPU TENEI I TE TUSI 2, MATAUPU 9
I TE ‵TOU SUĀ MATAUPU
E mata, e isi se taugasoa fakaloiloi—io me kāti ko tou loto—e fakamalosi atu ke fai ne koe a mea ma‵sei? Onoono ki te auala ke ‵teke atu ki ei!
[Fakamatalaga mai lalo]
a E tonu, e fai ne tino katoa a mea ‵se. (Loma 3:23) Tela la, kafai e fakalogo‵mae koe ne se taugasoa, kae oti, ko fakaasi atu tena salamō tonu, ke masaua “me e ‵tao ne te alofa a agasala e uke.”—1 Petelu 4:8.
TUSI FAITAU TĀUA
“E isi se taugasoa e pili atu i lō se taina tonu.”—Faataoto 18:24.
MANATU
Ke ola e ‵tusa mo tulaga ‵ma, kae kāti ka fai taugasoa atu a tino kolā e taumafai ke fai foki penā. Ka fai eiloa latou mo toe taugasoa ‵lei!
E ILOA NE KOE . . .?
A te Atua e se fakailoga tino, kae e kai filifili a ia e uiga ki tino kolā e manako a ia ke fai mo ‘malō i tena faleie.’—Salamo 15:1-5.
AKU PALANI!
Ke maua a taugasoa ‵lei, au ka ․․․․․
A tino ma‵tua kolā e manako au ke fakamasani ki a latou ko ․․․․․
Mea e manako au ke fesili atu ki oku mātua e uiga ki te mataupu tenei ․․․․․
SE A TAU FAKA‵TAU?
● Ne a uiga e fakatāua malosi ne koe i se taugasoa, kae kaia?
● Ne a uiga e ‵tau o fakamalosi aka ke fai ei koe mo taugasoa tai ‵lei atu?
[Ko manatu tāua]
I te taimi ne fakamalosi mai oku mātua ke faka‵mao mai i se potukau o taugasoa, ne fai ifo au me konei fua a tino e fia fai taugasoa au ki ei. Ne ‵lei eiloa a pati fakatonutonu a oku mātua, kae i te taimi ne mafaufau faka‵lei au ki ei, ne iloa aka ne au me e tokouke atu a nisi taugasoa ‵lei.’’—Cole
[Pokisi]
‵Tofo Aka ki Manatu Konei
Faipati ki ou matua e uiga ki taugasoa. Fesili atu e uiga ki lā taugasoa i te taimi koi fo‵liki ei lāua pelā mo koe. E mata, ne sala‵mō lāua ki lā taugasoa ne filifili? Kafai e penā loa, kaia? Fesili atu me ne fakafesagai atu pefea lāua ki nisi fakalavelave ne fe‵paki mo lāua.
Fakafetaui ou taugasoa ki ou mātua. Kafai e fakatalave koe i te fai penā, ke fesili ifo, ‘Kaia?’ E mata, e isi se mea e fai ne ou taugasoa telā e iloa ne koe e se fia‵fia ki ei ou mātua? Kafai e penā loa, e ‵tau o momea aka tou kai filifili ki ou taugasoa.
Ke fai mo tino fakalogologo faka‵lei. Saga tonu atu ki te ‵lei mo mea e manava‵se ki ei ou taugasoa.—Filipi 2:4.
Ke loto fakamagalo. Sa fakamoemoe ke ‵lei katoatoa latou. “A tatou katoa e ‵siga i taimi e uke.”—Iakopo 3:2.
Sa mafaufau me e ‵tau o ‵piki ‵mau faeloa koe mo tou taugasoa. Ke mo a ma pule mālō atu koe ki ei. A taugasoa ‵tonu e toka faeloa māfai e manako koe ki se fesoasoani.—Failauga 4:9, 10.
[Ata i te itulau e 63]
Kafai e tautali koe ki tulaga o nisi tino, ko fai eiloa koe pelā me se manu faka‵tolo, telā e fakagasuesue fua e ‵tusa mo te manakoga o latou